Tī chit-ê soaⁿ, bān-kun ê Siōng-chú ē ūi tio̍h bān-bîn ēng hó mi̍h pâi-siat iàn-se̍k, ēng kū chiú kah kut-chhóe móa-móa ê hó mi̍h, í-ki̍p chē-chheng ê kū chiú pâi-siat iàn-se̍k. 25:7 Koh tī chit-ê soaⁿ, I ē tû-khì tà bān-bîn ê phè kah jia-khàm bān-kok ê pò͘-phâng. 25:8 I ū thun-bia̍t sí-bông kàu éng-oán. Chì-koân Siōng-chú ē chhit-khì kûn-chiòng bīn-.ni̍h ê ba̍k-sái, koh tùi phó͘-thiⁿ-ē tû-khì I ê chú-bîn ê kiàn-siàu; in-ūi che sī Siōng-chú kóng ê. 25:9 Kàu hit ji̍t, lâng ē kóng, " Lí khòaⁿ, I sī goán ê Siōng-chú, goán pêng-sî thèng-hāu I, I beh chín-kiù goán. Che sī Siōng-chú, goán pêng-sî thèng-hāu I, goán beh in-ūi I ê kiù-un lâi hoaⁿ-hí khoài-lo̍k. " 25:10
Siōng-tè Chek-hoa̍t Mô͘-ap
Siōng-chú ê chhiú ē hōaⁿ tī chit-ê soaⁿ, Mô͘-ap lâng tī só͘ tòa ê tē ē siū thún-ta̍h, chhin-chhiūⁿ ta chháu siū thún-ta̍h tī pùn-sò tî ê chúi lāi. 25:11 I ē tī hit tiong-kan thí-khui chhiú, chhin-chhiūⁿ siû-chúi ê thí-khui chhiú teh siû; chóng-.sī, I ē hō͘ i ê kiau-ngō͘ kah i chhiú só͘ kiâⁿ ê kúi-kè, chò chi̍t-ē soe-pāi-.khì. 25:12 Lí siâⁿ chhiûⁿ kian-kò͘ ê siâⁿ-pó, I ē kā i chhia-tó, kā i húi bia̍t-tiāu, thiah kàu pêⁿ-tē, kē kàu tîn-ai.