雅歌 線上收聽:中文和合本 現代中文譯本修訂版 現代台語 台語聖經 客語 福州話 希伯來文讀經 下載檔案 關於語音聖經
4:1 [chùn-lâm] Góa só͘ ài ê, lí khòaⁿ, lí chin súi; lí khòaⁿ, lí chin súi. Tī phè ê lāi-bīn, lí ê ba̍k-chiu chhin-chhiūⁿ hún-chiáu; lí ê thâu-mn̂g chhin-chhiūⁿ soaⁿ-iûⁿ kui tīn, tó tī Gi-lia̍t ê soaⁿ piⁿ.
4:2 Lí ê chhùi-khí chhin-chhiūⁿ tú-á chián-mn̂g ê chi̍t kûn iûⁿ, sé chheng-khì chiūⁿ-.lâi, ta̍k chiah lóng ū siang-seⁿ kiáⁿ, bô kah chi̍t chiah sit-lo̍h i ê kiáⁿ.
4:3 Lí ê chhùi-tûn chhin-chhiūⁿ chu-âng sòaⁿ, lí ê chhùi mā seⁿ-chò súi, lí ê chhùi-phóe tī phè lāi, chhin-chhiūⁿ peh khui ê sia̍h-liû.
4:4 Lí ê ām-kún chhin-chhiūⁿ Ta-bi̍t ê tâi khí chò kun-khì khò͘; piah téng tiàu chi̍t chheng-ê pîn-pâi, lóng sī ióng-sū ê tîn-pâi.
4:5 Lí ê nn̄g lia̍p leng chhin-chhiūⁿ tī pek-ha̍p hoe tiong teh chia̍h chháu ê chi̍t tùi lo̍k-á, to̍h-sī lo̍k-bú siang-seⁿ ê.
4:6 Kàu ji̍t-thâu liâng-léng, iáⁿ chhun tn̂g ê sî, góa beh khì bu̍t-io̍h soaⁿ kah jú-hiuⁿ soaⁿ ê soaⁿ-thâu.
4:7 Góa só͘ ài ê, lí súi kah chiah cha̍p-chn̂g, lí bô chi̍t-tiám-á khoat-tiám.
4:8 Góa ê ài-jîn-á, lí tio̍h tùi Le-ba-nòng kah góa lâi, tùi Le-ba-nòng kah góa lâi. Tùi A-má-nah ê téng-bīn, tùi Se-nil kah Hel-móng ê téng-bīn, tùi sai ê hia̍t, tùi pà ê soaⁿ khòaⁿ lo̍h-.khì.
4:9 Góa ê sió-mōe, góa ê sin-niû, lí toa̍t-khì góa ê sim; ēng lí ê ba̍k-chiu chi̍t-ē khòaⁿ, ēng lí ê ām-kún ê chi̍t tiâu kim liān-á, lí toa̍t-khì góa ê sim!
4:10 Góa ê sió-mōe, góa ê ài-jîn-á, lí ê ài-chêng ná ē hiah bí-biāu! Lí ê ài-chêng ná ē pí chiú khah hó! Lí ê ko-iû ê phang-bī ná ē pí só͘-ū ê phang-liāu khah phang!
4:11 Góa ê ài-jîn-á, lí ê chhùi-tûn chhin-chhiūⁿ bi̍t-pâng ê bi̍t teh tih, lí ê chi̍h ē ū bi̍t ū leng; lí ê saⁿ-khò͘ ê phang-bī chhin-chhiūⁿ Le-ba-nòng ê phang-bī.
4:12 Góa ê sió-mōe, góa ê ài-jîn-á, lí to̍h-sī koaiⁿ-só ê hn̂g, khàm ba̍t ê chéⁿ, hong ba̍t ê chúi-chôaⁿ.
4:13 Lí só͘ chhut sī sia̍h-liû ê hn̂g, ū siōng hó ê kóe-chí, ū chéng-kah hoe kah ná-ta̍t ê chhiū,
4:14 ū ná-ta̍t kah hoan-âng hoe, chhiong-pô͘ kah jio̍k-kùi, í-ki̍p chiahê jú-hiuⁿ, bu̍t-io̍h, tîm-hiuⁿ kah só͘-ū siōng-téng ê phang-liāu.
4:15 Lí sī hn̂g tiong ê chúi-chôaⁿ, oa̍h-chúi ê chéⁿ, lí sī tùi Le-ba-nòng lâu lo̍h-.lâi ê khe chúi.
4:16 [siàu-lí] Pak-hong, tio̍h khí-.lâi! Lâm-hong, tio̍h lâi! Tio̍h chhoe-lâi góa ê hn̂g, hō͘ i ê phang-bī hoat chhut-.lâi; goān góa ê lông-kun ji̍p-khì hn̂g lāi, chia̍h hiahê siōng hó ê kóe-chí.
各聖經譯本著作權如版權說明。
本畫面由信望愛資訊中心之CBOL計畫產生,歡迎連結,無須申請。CBOL計畫之資料版權宣告採用GNU Free Documentation License。願上帝的話能建造每一位使用這系統的人,來榮耀祂自己的名。