Lín tio̍h oló Siōng-chú! In-ūi chhiùⁿ koa oló lán ê Siōng-chú sī chin hó; oló I sī ha̍p-gî ê. 147:2Siōng-chú khí-chō Ê-lú-sa-lèm, chū-chi̍p I-su-la-el tiong siū chhian-sóa khì gōa-pang ê lâng. 147:3 I i hó siong-sim ê lâng, pau-chat in ê siong. 147:4 I sǹg chheⁿ-sîn ê sò͘-bo̍k, sûi lia̍p kā i hō-miâ. 147:5 Lán ê Siōng-chú chì-tōa, ke̍k ū khùi-la̍t; I ê tì-hūi bû kiông-chīn. 147:6 Siōng-chú hû-chhî khiam-pi ê lâng; kā pháiⁿ lâng kàng kē kàu thô͘-kha. 147:7 Lín tio̍h ēng kám-siā ǹg Siōng-chú chhiùⁿ koa; tio̍h tôaⁿ khîm chhiùⁿ koa oló lán ê Siōng-chú. 147:8 I khí hûn jia thiⁿ, ūi tio̍h tē chún-pī hō͘-chúi, hō͘ soaⁿ hoat-chháu. 147:9 I siúⁿ-sù chia̍h-mi̍h hō͘ cháu-siù kah teh háu ê o͘-a kiáⁿ. 147:10 I bô ì-ài bé ê la̍t tōa, I bô kah-ì lâng ê kha gâu cháu. 147:11 Siōng-chú sī ì-ài kèng-ùi I kah gióng-bōng I ê chû-ài ê lâng. 147:12 Ê-lú-sa-lèm, lí tio̍h oló Siōng-chú! Si-óng, lí tio̍h oló lí ê Siōng-tè! 147:13 In-ūi I kian-kò͘ lí ê mn̂g-chhòaⁿ, sù-hok hō͘ lí tiong-kan ê kiáⁿ-jî. 147:14 I hō͘ lí ê kéng lāi thài-pêng, ēng siōng hó ê be̍h hō͘ lí chia̍h pá. 147:15 I hoat-chhut bēng-lēng tī tē-.ni̍h; I ê ōe thoân-pò chin kín. 147:16 I kàng-lo̍h seh chhin-chhiūⁿ mî-hoe, mā lo̍h-sng chhin-chhiūⁿ hóe-hu. 147:17 I hiat lo̍h pha̍uh chi̍t tè chi̍t tè; I hoat-chhut kôaⁿ-chhìn léng-hong, siáⁿ lâng tí-tòng ē-tiâu? 147:18 I chi̍t-ē chhut lēng, chiahê chiū lóng iûⁿ-.khì; I hō͘ hong chhoe, chúi chiū lâu. 147:19 I kā I ê ōe chí-sī Iâ-kop, kā I ê lu̍t-lē kah tián-chiong chí-sī I-su-la-el. 147:20 I m̄ bat ánne khoán-thāi pa̍t kok; I ê tián-chiong, in lóng m̄ bat. Lín tio̍h oló Siōng-chú!