詩篇 線上收聽:中文和合本 現代中文譯本修訂版 現代台語 台語聖經 客語 福州話 希伯來文讀經 下載檔案 關於語音聖經
135:1 O-ló ê Si-koa
Lín tio̍h oló Siōng-chú! Tiàm tī Siōng-chú ê tiān teh ho̍k-sāi ê lô͘-po̍k, lín tio̍h oló Siōng-chú ê miâ!
135:2 Tiàm tī lán Siōng-chú ê tiān-īⁿ lāi ê chhe-ēng, lín tio̍h oló I!
135:3 Lín tio̍h oló Siōng-chú, in-ūi Siōng-chú sī hó; tio̍h chhiùⁿ koa oló I ê miâ, in-ūi che sī chin kî-biāu.
135:4 In-ūi Siōng-chú kéng-soán Iâ-kop kui I kakī, kéng-soán I-su-la-el chò I kakī te̍k-pia̍t ê soán-bîn.
135:5 Góa chai Siōng-chú chò tōa, mā chai lán ê Chú pôaⁿ-kòe só͘-ū ê sîn-bêng.
135:6 Siōng-chú tī thiⁿ-téng, tī tē-chiūⁿ, tī hái tiong, tī só͘-ū ê chhim-ian, lóng chiàu I kakī ê chí-ì lâi kiâⁿ.
135:7 I hō͘ hûn-bū tùi tē-ke̍k chhèng khí-.lâi, I ūi tio̍h hō͘ chhòng-chō sihnà, hō͘ hong tùi I ê khò͘-pâng chhoe chhut-.lâi.
135:8 I kā thâu-chiūⁿ seⁿ ê Ai-gi̍p lâng kah chengseⁿ lóng phah-sí.
135:9 Ai-gi̍p, I tī lí ê tiong-kan kiâⁿ sîn-jiah kî-sū, lâi tùi-hù Hôa-láu kah i ê jîn-sîn.
135:10 I phah-iâⁿ chin chē pang-kok, koh thâi-sí tōa koân-lêng ê ông,
135:11 Chiū-sī A-mô͘-lī ông Si-hông kah Ba-siáng ông O͘-k, í-ki̍p Ka-nân ta̍k kok ê ông.
135:12 I kā in ê tē hō͘ I ê chú-bîn — I-su-la-el chò sán-gia̍p.
135:13 Siōng-chú ah, Lí ê miâ liû-thoân kàu éng-oán! Siōng-chú ah, Lí thang kì-liām ê miâ liû-thoân kàu bān tāi!
135:14 In-ūi Siōng-chú beh thè I ê chú-bîn sin-oan, ūi tio̍h I ê lô͘-po̍k hôe-sim choán-ì.
135:15 Gōa-pang ê ngó͘-siōng sī gîn ê, kim ê, sī lâng ê chhiú só͘ chō ê.
135:16 In ū chhùi mā bē kóng-ōe, ū ba̍k-chiu mā khòaⁿ bē tio̍h,
135:17 In ū hīⁿ-khang mā thiaⁿ bē tio̍h, ū chhùi mā bē chhoán-khùi.
135:18 Goān chō in kah óa-khò in ê lâng, lóng ē kah in kāng-khoán.
135:19 I-su-la-el ê chú-bîn, lín tio̍h oló Siōng-chú! A-lông ê ke, lín tio̍h oló Siōng-chú!
135:20 Lē-bī ê ke, lín tio̍h oló Siōng-chú! Kèng-ùi Siōng-chú ê lâng, lín tio̍h oló Siōng-chú!
135:21 Siōng-chú tòa tī Ê-lú-sa-lèm, goān I tùi Si-óng tit tio̍h oló. Lín tio̍h oló Siōng-chú!
各聖經譯本著作權如版權說明。
本畫面由信望愛資訊中心之CBOL計畫產生,歡迎連結,無須申請。CBOL計畫之資料版權宣告採用GNU Free Documentation License。願上帝的話能建造每一位使用這系統的人,來榮耀祂自己的名。