( Ta-bi̍t ê si. )Góa ê sim-sîn ah, lí tio̍h oló Siōng-chú; hoān-nā tī góa lāi-bīn ê mā lóng oló I ê sèng-miâ. 103:2 Góa ê sim-sîn ah, lí tio̍h oló Siōng-chú! M̄-thang bē kì-tit I it-chhè ê un-hūi! 103:3 I sià-bián lí só͘-ū ê chōe, i hó lí it-chhè ê pēⁿ. 103:4 I kiù-sio̍k lí ê sèⁿ-miā thoat-lī sí-bông, ēng thiàⁿ-sim kah chû-pi chò lí ê bián-liû. 103:5 Ēng hó mi̍h hō͘ lí chi̍t-sì-lâng sim-móa ì-chiok, hō͘ lí hôe-ho̍k siàu-liân chhin-chhiūⁿ eng-chiáu. 103:6 Siōng-chú kiâⁿ kong-gī, ūi tio̍h só͘-ū siū oan-óng ê lâng sin-oan. 103:7 I ēng I ê tō-lō͘ chí-sī Mô͘-se, ēng I ê chok-ûi chí-sī I-su-la-el lâng. 103:8 Siōng-chú ū liân-bín, ū un-tián, bē khoài siū-khì, koh ū hong-sēng ê chû-ài. 103:9 I bē kú-tn̂g chek-pī, mā bē éng-oán khǹg siū-khì. 103:10 I bē chiàu lán ê chōe-kò kā lán chhú-hoa̍t, mā bē chiàu lán ê chōe-gia̍t kā lán pò-èng. 103:11 In-ūi thiⁿ lī-khui tē hiahni̍h koân, I ê chû-ài tùi kèng-ùi I ê lâng mā sī hiah tōa! 103:12 Tang lī-khui sai ū gōa hn̄g, I hō͘ lán ê chōe-kò lī-khui lán mā sī hiah hn̄g! 103:13 Lāu-pē án-chóaⁿ liân-bín i ê kiáⁿ-jî, Siōng-chú liân-bín kèng-ùi I ê lâng mā sī ánne! 103:14 In-ūi I chai lán ê thé-chit, siàu-liām lán sī thô͘-soa hún. 103:15 Kóng-kàu lâng, i ê ji̍t-chí chhin-chhiūⁿ chháu. I ê heng-ōng chhin-chhiūⁿ soaⁿ-.ni̍h ê hoe, 103:16 Keng-kòe hong chi̍t ē chhoe chiū siau-sit-khì; bô lâng ē koh jīn-tit i ê goân ūi. 103:17 M̄ koh, Siōng-chú ê chû-ài kui tī kèng-ùi I ê lâng, tùi éng-oán kàu éng-oán; I ê kong-gī mā kui tī i ê kiáⁿ-kiáⁿ sun-sun; 103:18 to̍h-sī hiahê chun-siú I ê iok, kì-liām I ê kà-sī lâi chun-thàn ê lâng. 103:19 Siōng-chú tī thiⁿ-téng siat-li̍p I ê pó-chō; I ê chú-koân chiáng-koán bān-mi̍h. 103:20 Lín chiahê ū tōa koân-lêng ê thiⁿ-sài, tio̍h thiaⁿ-thàn I ê ōe, chip-hêng I ê bēng-lēng ê lóng tio̍h oló Siōng-chú! 103:21 Lín chiahê chò I ê kun-peng, chò I ê chhe-sài, kiâⁿ I só͘ hoaⁿ-hí ê lâng lóng tio̍h oló Siōng-chú! 103:22Lín só͘-ū siū I chhòng-chō ê, tī I só͘ koán-lí ê ta̍k ūi, lóng tio̍h oló Siōng-chú! Góa ê sim-sîn ah, lí tio̍h oló Siōng-chú!