詩篇 線上收聽:中文和合本 現代中文譯本修訂版 現代台語 台語聖經 客語 福州話 希伯來文讀經 下載檔案 關於語音聖經
94:1 Siōng-tè Sím-phòaⁿ Bān-bîn
Siōng-chú — sin-oan ê Siōng-tè ah; sin-oan ê Siōng-tè ah, kiû Lí hián-chhut kng!
94:2 Sím-phòaⁿ sè-kài ê Chú ah, kiû Lí khí-.lâi, hō͘ kiau-ngō͘ ê lâng siū eng-kai siū ê pò-èng!
94:3 Siōng-chú ah, pháiⁿ lâng ē koh chûn-chāi gōa kú? Pháiⁿ lâng tek-sèng tōa hoaⁿ-hí ē kàu gōa kú?
94:4 In sûi-piān kóng-chhut kiau-ngō͘ ê ōe; só͘-ū chò pháiⁿ ê lâng lóng kakī phòng-hong.
94:5 Siōng-chú ah, in ap-chè Lí ê chú-bîn, khó͘-to̍k Lí ê sán-gia̍p — I-su-la-el.
94:6 In thâi-sí kóaⁿ-hū kah chhut-gōa lâng, koh hāi-sí ko͘-jî.
94:7 In kóng, " Siōng-chú it-tēng bô teh khòaⁿ; Iâ-kop ê Siōng-tè it-tēng bô teh tì-ì. "
94:8 Lín jîn-bîn tiong chhin-chhiūⁿ chengseⁿ hit khoán ê lâng tio̍h siūⁿ; gû-gōng ê lâng kàu tang-sî chiah ē ū tì-hūi?
94:9 An-tì hīⁿ-khang ê Siōng-tè kám ē bô thiaⁿ-.tio̍h? Chhòng-chō ba̍k-chiu ê Siōng-tè kám ē bô khòaⁿ-.tio̍h?
94:10 Kàu-tok lia̍t pang ê Siōng-tè hō͘ lâng tit tio̍h tì-sek, I kám bē hiáu pān-lí lâng?
94:11 Siōng-chú chai lâng ê sim-su, chai in ê só͘ chò lóng sī bô chhái-kang.
94:12 Siōng-chú ah, Lí só͘ kàu-tok koh ēng Lí ê lu̍t-hoat só͘ kà-sī ê hiahê lâng chin ū hok-khì.
94:13 I ē hō͘ i tī hoān-lān ê ji̍t-chí tit tio̍h pêng-an, ti̍t-kàu-ūi tio̍h pháiⁿ lâng khui hó hām-kheⁿ ê sî.
94:14 In-ūi Siōng-chú it-tēng bē khì-sak I ê chú-bîn, mā bē pàng-lī I ê sán-gia̍p — I-su-la-el.
94:15 In-ūi sím-phòaⁿ ē chiàu kong-gī; sim chèng-ti̍t ê lâng lóng ē tòe I.
94:16 Siáⁿ lâng ē ūi góa khí-lâi kong-kek pháiⁿ lâng? Siáⁿ lâng ē ūi góa khiā khí-lâi kong-kek chò pháiⁿ ê lâng?
94:17 Nā m̄-sī Siōng-chú pang-chān góa, góa ê sîn-hûn chiū chin kín lo̍h-khì tī léng-chēng ê só͘-chāi.
94:18 Góa kóng góa ê kha that tio̍h; Siōng-chú ah, hit sî, Lí ê chû-ài hû-chhî góa.
94:19 Góa sim-lāi ū chin chē iu-būn kah chhau-hoân, Lí ê an-ùi chiū hō͘ góa ê sim-sîn khoài-lo̍k.
94:20 Kan-ok ê koaⁿ-oân chiá-ēng lu̍t-lē lâi kè-bô͘ chân-hāi, in kám ē kah Lí kau-thong?
94:21 In tāi-ke chū-chi̍p lâi kong-kek gī lâng ê sèⁿ-miā, kā bô chōe ê lâng tēng sí-chōe.
94:22 M̄ koh, Siōng-chú pêng-sî chò góa ê siâⁿ-pó; góa ê Siōng-tè chò góa tô-siám ê chio̍h-pôaⁿ.
94:23 I hō͘ pháiⁿ lâng ê chōe-ok kui tī in kakī ê sin chiūⁿ. In chò pháiⁿ ê sî, I ē kā in châu-bia̍t; Siōng-chú — lán ê Siōng-tè ē kā in châu-bia̍t.
各聖經譯本著作權如版權說明。
本畫面由信望愛資訊中心之CBOL計畫產生,歡迎連結,無須申請。CBOL計畫之資料版權宣告採用GNU Free Documentation License。願上帝的話能建造每一位使用這系統的人,來榮耀祂自己的名。