詩篇 線上收聽:中文和合本 現代中文譯本修訂版 現代台語 台語聖經 客語 福州話 希伯來文讀經 下載檔案 關於語音聖經
92:1 O-ló ê Si-koa
( An-hioh-ji̍t ê si-koa. ) Siōng-tè ah, goán kám-siā Lí, chhiùⁿ koa oló Lí — Chì-koân-.ê ê miâ, si̍t-chāi chin hó!
92:2 Chá-khí sî soan-iông Lí ê chû-ài; ê-hng sî soan-iông Lí ê sìn-si̍t.
92:3 Ēng cha̍p tiâu hiân ê ga̍k-khì kah sek, ēng khîm tôaⁿ chong-giâm ê siaⁿ-im.
92:4 In-ūi Siōng-tè — Lí ēng Lí ê chok-ûi hō͘ góa hoaⁿ-hí, góa beh in-ūi Lí ê chhiú só͘ chò ê lâi khoài-lo̍k.
92:5 Siōng-chú, Lí ê chok-ûi ná ē hiah úi-tāi! Lí ê sim-su ì-liām hui-siông chhim-ò!
92:6 Bû-ti ê lâng bē liáu-kái; gû-chhún ê lâng mā bē bêng-pe̍k chit-ê ò-pì.
92:7 Pháiⁿ lâng chhin-chhiūⁿ chháu ū bō͘-sēng ê sî, m̄ koh, in it-tēng ē éng-oán bia̍t-bông,
92:8 In-ūi Siōng-chú — Lí ko-ko chāi-siōng, chiáng-koân it-ti̍t kàu éng-oán.
92:9 Siōng-chú ah, Lí khòaⁿ Lí ê tùi-te̍k! Lí ê tùi-te̍k it-tēng ē bia̍t-bông; só͘-ū chò pháiⁿ ê lâng mā ē siū phah sì-sòaⁿ-.khì.
92:10 M̄ koh, Lí hō͘ góa ê kak chhin-chhiūⁿ iá-gû ê kak gia̍h koân; Lí ū ēng sin ê iû kā góa boah.
92:11 Góa chhin-ba̍k khòaⁿ tio̍h góa ê tùi-te̍k tú tio̍h pò-èng; góa chhin-hīⁿ thiaⁿ tio̍h hiahê khí-lâi kong-kek góa ê pháiⁿ lâng siū hêng-hoa̍t.
92:12 Gī lâng ē chhin-chhiūⁿ chó chhiū heng-ōng, ē tióng-tōa chhin-chhiūⁿ Le-ba-nòng ê pek-hiuⁿ chhiū.
92:13 Kiàn-nā chai tī Siōng-chú sèng-tiān ê chhiū, ē tī lán ê Siōng-tè ê īⁿ lāi bō͘-sēng.
92:14 In nî lāu ê sî iû-goân ē kiat kóe-chí, in ê chiap chin chē, sek chheⁿ-chhùi,
92:15 Thang hián-bêng Siōng-chú ê chèng-ti̍t, I sī góa ê chio̍h-pôaⁿ, I lóng bô put-gī.
各聖經譯本著作權如版權說明。
本畫面由信望愛資訊中心之CBOL計畫產生,歡迎連結,無須申請。CBOL計畫之資料版權宣告採用GNU Free Documentation License。願上帝的話能建造每一位使用這系統的人,來榮耀祂自己的名。