詩篇 線上收聽:中文和合本 現代中文譯本修訂版 現代台語 台語聖經 客語 福州話 希伯來文讀經 下載檔案 關於語音聖經
72:1 Ūi Kun-ông Kî-tó
( Só͘-lô-móng ê si. )Siōng-tè ah, kiû Lí kā Lí ê phòaⁿ-toàn siúⁿ-sù hō͘ ông, kā Lí ê kong-gī siúⁿ-sù hō͘ ông ê kiáⁿ.
72:2 Hō͘ i ē-tàng chiàu kong-gī sím-phòaⁿ Lí ê chú-bîn, chiàu kong-pêⁿ phòaⁿ-toàn Lí hiahê khùn-khó͘ ê lâng.
72:3 Goān tōa soaⁿ ē in-ūi kong-gī tòa hō͘ jîn-bîn pêng-an, sió soaⁿ mā ē ánne.
72:4 Goān ông ē thè khùn-khó͘ ê jîn-bîn sin-oan, ē kiù sànchhiah lâng, ē kā pō-gio̍k ê lâng teh chhùi.
72:5 Goān jîn-bîn ē kèng-ùi Lí nî kú goe̍h chhim, it-ti̍t kàu bān-sè-tāi.
72:6 Goān ông ē chhin-chhiūⁿ hō͘-chúi lo̍h tī koah kòe chháu ê hn̂g, chhin-chhiūⁿ ki̍p-sî ê hō͘-chúi chu-jūn thó͘-tē.
72:7 Tī i chò ông ê ji̍t-chí, gī lâng ē heng-ōng, hióng-siū kah goe̍h pêⁿ kú ê tōa pêng-an.
72:8 I ē chiáng-koân tùi chit-ê hái kàu hit-ê hái, tùi tōa hô it-ti̍t kàu tē-ke̍k.
72:9 Tòa tī khòng-iá ê lâng ē kūi-pài tī i ê bīn-chêng; i ê tùi-te̍k ē chīⁿ thô͘-soa hún.
72:10 Tal-si-sih kah tó-sū ê lia̍t ông ē lâi chìn-kòng; Sí-bah kah Se-bah ê ông ē lâi hiàn lé-mi̍h.
72:11 Lia̍t ông lóng ē phak lo̍h-lâi kā i pài; bān-kok lóng ē kā i ho̍k-sāi.
72:12 In-ūi sànchhiah lâng kiû-kiò ê sî, i ē kā in kiù; khùn-khó͘ bô i-óa ê lâng, i mā ē kā in kiù.
72:13 I ē liân-bín chheng-tām sànchhiah lâng, i ē chín-kiù sànchhiah lâng ê sèⁿ-miā.
72:14 I ē kiù-sio̍k in ê sèⁿ-miā thoat-lī ap-pek kah pō-gio̍k; i ē khòaⁿ in ê hoeh chò pó-pòe.
72:15 Goān i ē kú-tn̂g oa̍h-.leh. Lâng ē kā Sí-bah ê kim hō͘ i; ē tiāⁿtiāⁿ ūi i kî-tó, kui ji̍t oló i.
72:16 Goān tī tē-.ni̍h, tī soaⁿ téng, ngó͘-kok bō͘-sēng; só͘ kiat ê ngó͘-kok ē chhin-chhiūⁿ Le-ba-nòng ê chhiū iô-tāng; siâⁿ lāi ê lâng ē chhin-chhiūⁿ tē-chiūⁿ ê chháu heng-ōng.
72:17 I ê miâ ē liû-thoân kàu éng-oán, i ê miâ ē chhin-chhiūⁿ ji̍t-thâu kú-tn̂g liû-thoân lo̍h-.khì. Lâng ē in-ūi i lâi tit tio̍h hok-khì; bān-kok ē chheng-ho͘ i ū hok-khì.
72:18 Siōng-chú — Siōng-tè, to̍h-sī I-su-la-el ê Siōng-tè, chí ū I kiâⁿ kî-ī ê tāichì, lán eng-kai oló I!
72:19 Goān I êng-kng ê miâ éng-oán siū oló. Goān I ê êng-kng chhiong-móa choân tē! A-men! Koh A-men!
72:20 I-é-sái ê kiáⁿ Ta-bi̍t ê kî-tó kàu chia kiat-sok.
各聖經譯本著作權如版權說明。
本畫面由信望愛資訊中心之CBOL計畫產生,歡迎連結,無須申請。CBOL計畫之資料版權宣告採用GNU Free Documentation License。願上帝的話能建造每一位使用這系統的人,來榮耀祂自己的名。