詩篇 線上收聽:中文和合本 現代中文譯本修訂版 現代台語 台語聖經 客語 福州話 希伯來文讀經 下載檔案 關於語音聖經
66:1 Siōng-chàn kám-un Chi Koa
( Chi̍t phiⁿ si-koa, kau hō͘ ga̍k-koaⁿ. )Choân tē lóng tio̍h tùi Siōng-tè lâi chhut hoaⁿ-hí ê siaⁿ!
66:2 Chhiùⁿ koa oló I miâ ê êng-kng, ēng oló ê ōe lâi hián-bêng I ê êng-kng.
66:3 Tio̍h tùi Siōng-tè kóng, Lí ê chok-ûi hiah thang kiaⁿ-ùi! In-ūi Lí ê tōa koân-lêng, Lí ê tùi-te̍k lóng ē khut-ho̍k.
66:4 Choân tē beh kèng-pài Lí, gîm-si oló Lí, beh gîm-si oló Lí ê miâ. [Sè-la̍h]
66:5 Lín tio̍h lâi, lâi khòaⁿ Siōng-tè ê chok-ûi; I tùi sè-kan lâng ê só͘ chò put-chí thang kiaⁿ-ùi.
66:6 I kā hái piàn-chò ta tē, I ê chú-bîn kiâⁿ lō͘ kòe hô; tī hia goán in-ūi I lâi hoaⁿ-hí.
66:7 I ēng I ê koân-lêng tī-lí, it-ti̍t kàu éng-oán. I ê ba̍k-chiu kàm-chhat lia̍t pang; pōe-ge̍k ê lâng m̄ thang kiau-ngō͘. [Sè-la̍h]
66:8 Bān-bîn, lín tio̍h oló goán ê Siōng-tè, hō͘ lâng thiaⁿ tio̍h oló I ê siaⁿ.
66:9 I pó-chûn goán ê sèⁿ-miā, bô hō͘ goán ê kha iô-choah.
66:10 Siōng-tè ah, Lí bat chhì-giām goán, toàn-liān goán chhin-chhiūⁿ teh toàn-liān gîn.
66:11 Lí hō͘ goán ji̍p lô-bāng, kā tāng-tàⁿ hē tī goán ê sin chiūⁿ.
66:12 Lí hō͘ lâng sái chhia kauh kòe goán ê thâu-khak; goán keng-kòe chúi kah hóe, chóng-.sī, Lí chhōa goán lâi-kàu hù-jū ê só͘-chāi.
66:13 Góa beh tòa sio-chè chìn-ji̍p Lí ê tiān, góa beh tùi Lí siā góa ê goān,
66:14 Chiū-sī tī góa hoān-lān ê sî, góa ê chhùi-tûn só͘ kóng ê, góa ê chhùi só͘ hē ê goān.
66:15 Góa beh ēng pûi ê chengseⁿ ê sio-chè kah kang-iûⁿ ê phang-bī hiàn hō͘ Lí, koh ēng kang ê gû kah kang ê soaⁿ-iûⁿ lâi hiàn. [Sè-la̍h]
66:16 Hoān-nā kèng-ùi Siōng-tè ê lô͘-po̍k lóng tio̍h lâi thiaⁿ! Góa beh kóng-khí I ūi góa só͘ chò ê tāichì.
66:17 Góa bat ēng góa ê chhùi kiû-kiò I; ēng góa ê chi̍h oló I, chun I chò koân.
66:18 Góa sim-lāi nā ū chōe-ok ê liām-thâu, Chú it-tēng bô beh thiaⁿ.
66:19 Chóng-.sī, Siōng-tè si̍t-chāi ū thiaⁿ-.tio̍h; I í-keng àⁿ lo̍h-lâi thiaⁿ góa kî-tó ê siaⁿ.
66:20 Siōng-tè sī eng-kai siū oló ê! I m̄ bat the-sî góa ê kî-tó, mā m̄ bat hō͘ I ê chû-ài lī-khui góa.
各聖經譯本著作權如版權說明。
本畫面由信望愛資訊中心之CBOL計畫產生,歡迎連結,無須申請。CBOL計畫之資料版權宣告採用GNU Free Documentation License。願上帝的話能建造每一位使用這系統的人,來榮耀祂自己的名。