詩篇 線上收聽:中文和合本 現代中文譯本修訂版 現代台語 台語聖經 客語 福州話 希伯來文讀經 下載檔案 關於語音聖經
60:1 Khún-kiû Siōng-chú Kiù-oān
( Ta-bi̍t tī nn̄g tiâu khe ê A-lâm, í-ki̍p Cho͘-ba ê A-lâm kau-chiàn ê sî, Io-ap tńg-lâi tī iâm-kok, thâi-sí E-tóm lâng chi̍t-bān nn̄g-chheng; hit sî Ta-bi̍t chò chit-siú kim ê si, hō͘ lâng ha̍k-si̍p, kau hō͘ ga̍k-koaⁿ; tiāu ēng " Chò kiàn-chèng ê pek-ha̍p hoe. ")Siōng-tè ah, Lí bat khì-sak goán, phò-hoāi goán; Lí bat tùi goán siū-khì, kiû Lí hō͘ goán koh heng-khí.
60:2 Lí hō͘ tē tín-tāng, mā hō͘ i pang-li̍h; goān Lí i hó i ê li̍h-hûn, in-ūi tē iáu teh iô-tāng.
60:3 Lí hō͘ Lí ê chú-bîn tú tio̍h kan-lân; Lí hō͘ goán lim hit-ê hō͘ lâng tian-lâi tó-khì ê chiú.
60:4 Lí kā tōa kî siúⁿ-sù hō͘ kèng-ùi Lí ê lâng, thang ūi chin-lí gia̍h-khí-lâi ia̍t. [Sè-la̍h]
60:5 Kiû Lí thiaⁿ goán ê kiû-kiò, ēng chiàⁿ chhiú khan-kiù goán, thang hō͘ Lí só͘ thiàⁿ ê lâng tit tio̍h kái-kiù.
60:6 Siōng-tè kí I ê sèng-kiat lâi kóng, góa beh tōa hoaⁿ-hí; góa beh hun-khui Sī-khiàm, niû Su-kot ê soaⁿ-kok.
60:7 Gi-lia̍t sī góa ê, Má-ná-se mā sī góa ê. E-hu-laim sī góa ê thâu-khoe; Iô-tah sī góa ê koân-pèng.
60:8 Mô͘-ap teh beh chò góa ê e̍k-phûn; góa beh kā góa ê ê hiat tī E-tóm lâi ióng-iú. Góa beh tùi Hui-lī-sū tōa-siaⁿ hoah góa sèng-lī.
60:9 Siáⁿ lâng ē chhōa góa ji̍p-khì kian-kò͘ ê siâⁿ? Siáⁿ lâng chhōa góa ji̍p-khì E-tóm ê tē?
60:10 Siōng-tè ah, Lí kám sī beh khì-sak goán? Siōng-tè ah, Lí kám bô beh kah goán ê kun-peng chò-hóe chhut-cheng?
60:11 Kiû Lí pang-chān goán kong-kek tùi-te̍k, in-ūi lâng ê chín-kiù sī bē khò tit.
60:12 Goán óa-khò Siōng-tè chiah ē chò-chiâⁿ tōa tāichì, in-ūi I chiah ē-tàng thún-ta̍h goán ê tùi-te̍k.
各聖經譯本著作權如版權說明。
本畫面由信望愛資訊中心之CBOL計畫產生,歡迎連結,無須申請。CBOL計畫之資料版權宣告採用GNU Free Documentation License。願上帝的話能建造每一位使用這系統的人,來榮耀祂自己的名。