詩篇 線上收聽:中文和合本 現代中文譯本修訂版 現代台語 台語聖經 客語 福州話 希伯來文讀經 下載檔案 關於語音聖經
34:1 Siōng-chàn Siōng-tè ê Bí-hó
( Ta-bi̍t ê si; to̍h-sī i tī A-mí-me-le̍k ê bīn-chêng ké hong-tian, siū kóaⁿ chhut-.khì ê sî só͘ chò ê. )Góa beh sî-sî oló Siōng-chú; góa ê chhùi beh tiāⁿtiāⁿ oló I.
34:2 Góa ê sim-sîn beh in-ūi Siōng-chú lâi khoa-kháu; khiam-pi ê lâng thiaⁿ tio̍h mā ē hoaⁿ-hí.
34:3 Lín kah góa tio̍h oló Siōng-chú chò tōa, chò-hóe chun-chông I ê miâ.
34:4 Góa bat kiû Siōng-chú, I ū ìn góa, I kiù góa thoat-lī it-chhè ê kiaⁿ-hiâⁿ.
34:5 Gióng-bōng I ê lâng chiū tit tio̍h kng-bêng; in ê bīn éng-oán bē tì-kàu kiàn-siàu.
34:6 Khùn-khó͘ ê lâng kiû-kiò, Siōng-chú ū thiaⁿ-.tio̍h, koh kiù i thoat-lī só͘-ū ê hoān-lān.
34:7 Siōng-chú ê sù-chiá tī kèng-ùi I ê lâng ê sì-kho͘-ûi chat iâⁿ, lâi kā in chín-kiù.
34:8 Lín tio̍h chhì-khòaⁿ, chiū chai Siōng-chú sī hó; óa-khò I ê lâng chin ū hok-khì.
34:9 Siōng-chú sèng ê chú-bîn, lín tio̍h kèng-ùi I, in-ūi kèng-ùi I ê lâng bô khiàm-khoeh pòaⁿ-hāng.
34:10 Sai-á-thûn mā ē ū khiàm-khoeh, ē iau, to̍k-to̍k cháu-chhōe Siōng-chú ê lâng bô khiàm siáⁿ-mi̍h hó mi̍h.
34:11 Sè-kiáⁿ, lín tio̍h lâi thiaⁿ góa kóng, góa beh kā kèng-ùi Siōng-chú ê tō-lí kà-sī lín.
34:12 Siáⁿ lâng ì-ài oa̍h-miā, him-bō͘ hòe-siū, ài beh tit tio̍h hok-khì,
34:13 Chiū tio̍h kìm lí ê chi̍h, bô kóng pháiⁿ ōe; kìm lí ê chhùi-tûn, bô kóng kan-chà ê ōe.
34:14 Tio̍h lī-khui pháiⁿ, chò hó sū, jia̍t-sim tui-kiû hô-pêng.
34:15 Siōng-chú ê ba̍k-chiu khòaⁿ-kò͘ gī lâng; I ê hīⁿ-khang thiaⁿ in ê kî-tó.
34:16 Siōng-chú ê bīn ǹg kiâⁿ pháiⁿ ê lâng, beh tùi sè-kan kā in ê miâ chhat-siau.
34:17 Siōng-chú thiaⁿ tio̍h gī lâng kiû-kiò, chiū kiù in thoat-lī it-chhè ê hoān-lān.
34:18 Siōng-chú chhin-kīn siong-sim ê lâng, chín-kiù sim-sîn thòng-hóe ê lâng.
34:19 Gī lâng ū chin chē khó͘-lān, chóng-.sī, Siōng-chú kiù in lóng thoat-lī hiahê khó͘-lān.
34:20 Siōng-chú pó-choân in só͘-ū ê kut, chi̍t ki mā bô phah-tn̄g.
34:21 Chōe-ok ē hāi-sí pháiⁿ lâng; oàn-hūn gī lâng ê ē siū tēng chōe.
34:22 Siōng-chú kiù-sio̍k I ê lô͘-po̍k ê sîn-hûn; óa-khò I ê lâng bô kah chi̍t-ê siū tēng chōe.
各聖經譯本著作權如版權說明。
本畫面由信望愛資訊中心之CBOL計畫產生,歡迎連結,無須申請。CBOL計畫之資料版權宣告採用GNU Free Documentation License。願上帝的話能建造每一位使用這系統的人,來榮耀祂自己的名。