約伯記 線上收聽:中文和合本 現代中文譯本修訂版 現代台語 台語聖經 客語 福州話 希伯來文讀經 下載檔案 關於語音聖經
14:1 Tùi chabó͘ lâng só͘ seⁿ ê lâng ji̍t-chí té, koh ū chin chē hoân-ló.
14:2 I chhut chhin-chhiūⁿ hoe, sòa siā-.khì, i cháu-.khì chhin-chhiūⁿ iáⁿ, mā bô thêng-.leh.
14:3 Chhin-chhiūⁿ chit khoán ê lâng, Lí kám ē khui lí ê ba̍k-chiu khòaⁿ i? Koh chhōa góa siū Lí ê sím-phòaⁿ?
14:4 Siáⁿ lâng ē hō͘ chheng-khì ê tùi bô chheng-khì ê chhut-.lâi? Bô chi̍t-ê ē.
14:5 I ê ji̍t-chí kì-jiân siū hān-tiāⁿ, i ê goe̍h ê sò͘-gia̍h chāi tī Lí; Lí mā kā i siat kài-hān, hō͘ i bē tàng pôaⁿ kòe-.khì;
14:6 kiû Lí ba̍k-chiu oa̍t tńg-.khì bô khòaⁿ i, hō͘ i ē tit an-jiân, chhin-chhiūⁿ kang-lâng chò oân i ê kang.
14:7 In-ūi chhiū-á nā chhò khí-.lâi, iáu koh ū ǹg-bāng koh puh íⁿ, nńg ê ki hoat bē soah.
14:8 Sûi-jiân i ê kin tī tē-.ni̍h chin lāu, i ê châng mā sí tī thô͘-.ni̍h ;
14:9 nā tit tio̍h chúi chu-jūn chiū ē koh hoat íⁿ, mā chhin-chhiūⁿ chai-chèng ê mi̍h hoat ki.
14:10 Chóng-.sī, lâng sí chiū tó ti̍t-ti̍t; khùi chi̍t-ē tn̄g, lâng tī tó-ūi?
14:11 Hái tiong ê chúi ē toān-choa̍t, hô chúi ē siau-sit ta-.khì.
14:12 Lâng mā sī ánne, tó lo̍h-.khì bē koh khí-.lâi, kàu thiⁿ lap lo̍h-.lâi mā bē cheng-sîn; kú-kú khùn-.khì kiò bē chhéⁿ.
14:13 Goān Lí kā góa khǹg tī im-kan, kā góa siu tī ún-ba̍t ê só͘-chāi, thèng-hāu Lí ê siū-khì soah, kā góa tiāⁿ tio̍h ji̍t-kî lâi kì-liām góa.
14:14 Lâng sí-.khì kám ē koh oa̍h? Góa tio̍h jím-nāi góa lô-khó͘ ê ji̍t-chí, thèng-hāu góa thè-ōaⁿ ê ji̍t-chí kàu.
14:15 Lí chi̍t-ē kiò, góa chiū ìn Lí; Lí ē him-bō͘ Lí ê chhiú só͘ chò ê lâng.
14:16 Chóng-.sī, taⁿ Lí sǹg góa ê kha-pō͘, kám bô kàm-chhat góa ê chōe-kò?
14:17 Góa ê kòe-sit hō͘ Lí hong tī tē-á lāi; góa ê chōe-kò hō͘ Lí pa̍k tiâu-tiâu.
14:18 Soaⁿ pang chiū sòaⁿ-sòaⁿ-.khì, chio̍h-thâu sóa-lī i ê pún ūi.
14:19 Chúi ē kā chio̍h-thâu bôa tiāu; tōa-chúi ē kā tē-chiūⁿ ê thô͘ chhiong tiāu; Lí mā ánne teh choa̍t lâng ê ǹg-bāng.
14:20 Lí éng-oán khah iâⁿ i, i chiū kòe-.khì; Lí piàn-ōaⁿ i ê bīn-māu, lâi chhe i khì.
14:21 I ê kiáⁿ-jî tit tio̍h êng-kng, i m̄-chai; in tú tio̍h kàng kē, i mā m̄-chai.
14:22 Chóng-.sī, i ê jio̍k-sin kakī teh thàng-thiàⁿ, i ê sîn-hûn kakī teh iu-būn.
各聖經譯本著作權如版權說明。
本畫面由信望愛資訊中心之CBOL計畫產生,歡迎連結,無須申請。CBOL計畫之資料版權宣告採用GNU Free Documentation License。願上帝的話能建造每一位使用這系統的人,來榮耀祂自己的名。