約伯記 線上收聽:中文和合本 現代中文譯本修訂版 現代台語 台語聖經 客語 福州話 希伯來文讀經 下載檔案 關於語音聖經
13:1 Lí khòaⁿ, che it-chhè góa ê ba̍k-chiu lóng khòaⁿ-kòe, góa ê hīⁿ-khang lóng thiaⁿ-kòe, mā bêng-pe̍k.
13:2 Lín só͘ chai ê, góa mā chai; góa bô pí lín khah su.
13:3 Góa si̍t-chāi ài kah Choân-lêng-.ê kóng-ōe; góa chin ài kah Siōng-tè lí-lūn.
13:4 Chóng-.sī, lín sī teh liap-chō pe̍h-chha̍t ōe, lóng sī bô lō͘-ēng ê i-seng.
13:5 Goān lín it-khài tiām-tiām, chiah sǹg sī lín ê tì-hūi.
13:6 Chhiáⁿ lín thiaⁿ góa ê lí-lūn, tì-ì thiaⁿ góa chhùi ê piān-kái.
13:7 Lín kám ē ūi Siōng-tè lâi kóng put-gī ê ōe? Kám ē ūi I kóng kúi-chà ê ōe?
13:8 Lín kám ē phian-thán I? Beh ūi Siōng-tè piān-hō͘?
13:9 I nā chhâ-chhut lín, kám ū hó tāichì? Lín kám ē phiàn I chhin-chhiūⁿ teh phiàn lâng?
13:10 Lín nā thau-thau-á phian-thán, I it-tēng ē kā lín chek-pī.
13:11 I ê ui-giâm kám bô hō͘ lí kiaⁿ? I ê thang kiaⁿ-ùi kám bô lîm-kàu lín?
13:12 Lín só͘ kì-liām ê Chim-giân sī chhin-chhiūⁿ hóe-hu; lín ê iâⁿ-chē sī thô͘-môe ê iâⁿ-chē.
13:13 Lín tiām-tiām, m̄ thang chhap góa, chhut-chāi góa kóng, chiū bô-lūn siáⁿ-mi̍h chò i lâi.
13:14 Góa ná ē kā góa ê bah kā tī góa ê chhùi-khí, kā góa ê sèⁿ-miā hē tī góa ê chhiú?
13:15 Lí khòaⁿ, I beh thâi-sí góa, góa bô thang ǹg-bāng, chóng-.sī, góa beh tī I ê bīn-chêng piáu-bêng góa ê só͘ chò.
13:16 Che ē chiâⁿ-chò chín-kiù góa ê, in-ūi bô khiân-sêng ê lâng bē tit kàu I ê bīn-chêng.
13:17 Lín tio̍h sè-jī thiaⁿ góa ê ōe, hō͘ góa só͘ piān-lūn ê ji̍p-khì lín ê hīⁿ-khang.
13:18 Lí khòaⁿ, góa ū pâi-lia̍t góa ê àn-kiāⁿ, góa chai góa ē hông kiò-chò gī.
13:19 Siáⁿ lâng ē-tàng kah góa piān-lūn? Ū, góa chiū tiām-tiām lâi tn̄g-khùi.
13:20 Chóng-.sī, ū nn̄g hāng m̄-bián kiâⁿ tī góa, góa chiū bô siám-phiah lī-khui Lí ê bīn.
13:21 Chiū-sī Lí ê chhiú kiu tò tńg-.khì, lī-khui góa hn̄g-hn̄g; koh bô ēng Lí ê ui-giâm hō͘ góa kiaⁿ.
13:22 Lí ánne kiò, góa chiū ìn; á-.sī hō͘ góa kóng, Lí lâi ìn góa.
13:23 Góa ê chōe-kò kah kòe-sit ū gōa chē? Kiû Lí hō͘ góa chai góa ê kòe-sit kah góa ê chōe-kò.
13:24 Lí ná ē am Lí ê bīn, kā góa lia̍h-chò sī Lí ê tùi-te̍k?
13:25 Lí kám ē iô-tāng hō͘ hong chhoe ê chhiū-hio̍h? Lí kám ē khì jiok ta-.khì ê chháu?
13:26 In-ūi Lí kì-chài kan-khó͘ ê tāichì lâi pān góa; koh hō͘ góa tam-tng siàu-liân ê sî ê chōe-kò.
13:27 Lí ēng kha-liâu chhiú-khàu khàu góa ê kha, tì-ì khòaⁿ góa só͘-ū ê lō͘; Lí kā góa ê kha-té ōe kài-hān.
13:28 Góa ē siū pāi-hoāi, chhin-chhiūⁿ chhàu-nōa ê mi̍h, chhin-chhiūⁿ tio̍h chiù-thâng ê saⁿ.
各聖經譯本著作權如版權說明。
本畫面由信望愛資訊中心之CBOL計畫產生,歡迎連結,無須申請。CBOL計畫之資料版權宣告採用GNU Free Documentation License。願上帝的話能建造每一位使用這系統的人,來榮耀祂自己的名。