約伯記 線上收聽:中文和合本 現代中文譯本修訂版 現代台語 台語聖經 客語 福州話 希伯來文讀經 下載檔案 關於語音聖經
12:1 Io-buh ìn i kóng:
12:2 Lín chin-chiàⁿ sī jîn-bîn, lín sí, tì-hūi mā kah lín chò-hóe sí.
12:3 Góa mā ū sim-su, kah lín sio-siâng; góa bô pí lín khah su; chiahê tāichì siáⁿ lâng m̄-chai?
12:4 Góa sī kiû-kiò Siōng-tè tit tio̍h I thiaⁿ ê lâng, iáu koh hō͘ tâng-phōaⁿ khau-sé; kong-gī oân-siān ê lâng, mā hō͘ lâng khau-sé.
12:5 Hó kòe-ji̍t ê lâng sim-lāi khòaⁿ-khin hoān-lān, che hoān-lān sûi-sî teh thèng-hāu kha that tio̍h ê lâng.
12:6 Kiông-tō ê pò͘-pêⁿ heng-thong, jiá tio̍h Siōng-tè ê lô͘-po̍k tit tio̍h an-jiân, to̍h-sī Siōng-tè tōa-tōa siúⁿ-sù un-tián hō͘ in.
12:7 Taⁿ lí khì mn̄g cháu-siù, in ē kà-sī lí, mā khì mn̄g khong-tiong ê chiáu, in ē kā lí kóng;
12:8 á-.sī kah tē kóng, i ē kà-sī lí; hái tiong ê hî mā ē kā lí kóng bêng.
12:9 Tī chiahê it-chhè, siáⁿ lâng m̄-chai sī Siōng-tè ê chhiú ánne chò?
12:10 Só͘-ū tōng-bu̍t ê sèⁿ-miā kah jîn-lūi ê chhoán-khùi, lóng tī I ê chhiú.
12:11 Hīⁿ-khang kám bē chhì-giām giân-gí, chhin-chhiūⁿ chi̍h-thâu chhì-thàm chu-bī?
12:12 Nî-lāu ê ū tì-hūi, hòe-siū chē ê ū kiàn-sek.
12:13 Tì-hūi kah lêng-le̍k chāi tī Siōng-tè; I ū kè-ōe kah kiàn-sek.
12:14 Lí khòaⁿ, I só͘ thiah-húi ê bē tàng koh khí-chō; I koaiⁿ-kìm ê lâng bē tàng koh tháu-pàng.
12:15 Lí khòaⁿ, I kìm-chí hiahê chúi, chúi chiū ta-.khì; I koh hō͘ chúi lâu chhut-.lâi, tē chiū piàn-chhian.
12:16 Koân-lêng kah hāu-le̍k chāi tī I; siū bê-he̍k kah bê-he̍k lâng ê lóng sio̍k tī I.
12:17 I hō͘ bô͘-sū tú tio̍h chhiúⁿ-toa̍t, koh hō͘ sím-phòaⁿ-koaⁿ piàn-chò gōng lâng.
12:18 I tháu-pàng kun-ông ê khún-pa̍k, koh ēng tòa pa̍k in ê io.
12:19 I hō͘ chè-si tú tio̍h chhiúⁿ-toa̍t, koh chhia-tó ū koân-lêng ê lâng.
12:20 I hùi-tû tiong-sìn ê lâng ê ōe, koh tû-khì lāu lâng ê kiàn-sek.
12:21 I hō͘ kùi-cho̍k siū lêng-jio̍k, koh tháu-khui ū la̍t ê lâng ê io-tòa.
12:22 I tùi o͘-àm tiong hián-chhut chhim-ò ê tāichì, koh tòa-chhut sí-ìm kàu kng-bêng ê só͘-chāi.
12:23 I hō͘ pang-kok heng-ōng, mā koh kā i húi bia̍t-tiāu; I hō͘ pang-kok khui-khoah, mā koh kā in chhian-sóa.
12:24 Tē chiūⁿ jîn-bîn ê thâu-lâng, I tû-khì in ê sim-su, hō͘ in phiau-liû tī bô lō͘ ê khòng-iá.
12:25 In bô kng, tī o͘-àm tiong sì-kè bong; koh hō͘ in tian-lâi tian-khì, chhin-chhiūⁿ chiú-chùi ê lâng.
各聖經譯本著作權如版權說明。
本畫面由信望愛資訊中心之CBOL計畫產生,歡迎連結,無須申請。CBOL計畫之資料版權宣告採用GNU Free Documentation License。願上帝的話能建造每一位使用這系統的人,來榮耀祂自己的名。