以斯帖記 線上收聽:中文和合本 現代中文譯本修訂版 現代台語 台語聖經 客語 福州話 希伯來文讀經 下載檔案 關於語音聖經
4:1 Mol-té-kái Kiû Ê-su-tel Pang-chō͘
Mol-té-kái í-keng chai it-chhè ê só͘ chò, Mol-té-kái chiū thiah-li̍h saⁿ, chhēng môa-saⁿ, sám hóe-hu, chhut-khì siâⁿ lāi, tōa-siaⁿ pi-ai thî-khàu.
4:2 Kàu tī ông-kiong ê mn̂g chêng, in-ūi kiàn-nā chhēng môa-saⁿ ê lâng bē tàng ji̍p-khì ông-kiong ê mn̂g.
4:3 Tī ta̍k séng, to̍h-sī ông ê bēng-lēng kah jū-chí só͘ kàu ê só͘-chāi, tī Iô-tah lâng ê tiong-kan, ū pi-ai, kìm-chia̍h, thî-khàu, chhiⁿ-chhám, koh ū chin chē lâng tó tī môa-saⁿ kah hóe-hu-.ni̍h.
4:4 Ê-su-tel ê kiong-lí kah i ê thài-kàm lâi kā i kóng, ông-hō͘ chiū iu-būn kàu-ke̍k, kià saⁿ-khò͘ khì hō͘ Mol-té-kái-ōaⁿ-chhēng, ài thǹg-khì i ê môa-saⁿ, chóng-.sī, i m̄ chiap-siū.
4:5 Ê-su-tel chiū tiàu ông só͘ phài sū-hāu i ê thài-kàm lâi, i ê miâ kiò-chò Ha-thak, kiò i khì Mol-té-kái hia, ài chai chit-ê sī siáⁿ-mi̍h tāichì, siáⁿ-mi̍h goân-in.
4:6 Ha-thak chiū chhut-khì kàu siâⁿ ê kóng-tiûⁿ, to̍h-sī tī ông-kiong ê mn̂g chêng, lâi-kàu Mol-té-kái hia.
4:7 Mol-té-kái chiū kā i só͘ tú-.tio̍h ê tāichì, í-ki̍p Ha-mán só͘ kóng beh hiàn tī ông ê khò͘-pâng ê gîn ê khak-si̍t sò͘-gia̍h, thang châu-bia̍t Iô-tah lâng ê, lóng kā i kóng;
4:8 koh kā i chhau-siá tī Su-san siâⁿ só͘ thoân beh châu-bia̍t Iô-tah lâng ê jū-chí hō͘ i, kiò i the̍h hō͘ Ê-su-tel khòaⁿ, sūn-sòa kā i kóng bêng, koh hoan-hù i ji̍p-khì kìⁿ ông lâi kā i khún-kiû, tī ông ê bīn-chêng ūi tio̍h pún cho̍k ê jîn-bîn khún-chhiat kî-kiû.
4:9 Ha-thak tńg-.lâi, chiū kā Mol-té-kái ê ōe tùi Ê-su-tel kóng.
4:10 Ê-su-tel koh kā Ha-thak kóng, thok i kā Mol-té-kái kóng,
4:11 " Ông ê chèng jîn-sîn kah ông hiahê séng ê jîn-bîn, lóng chai ū chi̍t tiâu tiāⁿ tio̍h ê lē, nā bô siū-tiàu, ngē-ngē beh ji̍p-khì lāi-īⁿ kìⁿ ông ê lâng, bô-lūn lâm-lí, nā m̄-sī ông gia̍h i kim ê koái-á hō͘ i tit tio̍h oa̍h ê, chiū tio̍h hō͘ i sí. Taⁿ góa bô siū-tiàu kàu ông hia í-keng saⁿ-cha̍p kang à. "
4:12 In chiū kā Ê-su-tel ê ōe tùi Mol-té-kái kóng.
4:13 Mol-té-kái hoan-hù lâng kā Ê-su-tel kóng, " Lí m̄ thang siūⁿ kóng lí tī ông-kiong lāi pí chèng Iô-tah lâng khah ē thoat-lī.
4:14 Tī chit sî lí nā tiām-tiām lóng bô kóng-ōe, Iô-tah lâng ē tùi pa̍t ūi tit tio̍h thoat-lī, tit tio̍h chín-kiù, lí kah lí ê lāu-pē ê ke ē tú tio̍h bia̍t-bông. Lí tit tio̍h ông-hō͘ ê ūi, kám m̄-sī ūi tio̍h kin-á-ji̍t ê sî-sè? "
4:15 Ê-su-tel chiū hoan-hù lâng hôe-hok Mol-té-kái kóng,
4:16 " Khì chio-chi̍p tī Su-san só͘-ū ê Iô-tah lâng, ūi tio̍h góa kìm-chia̍h saⁿ ji̍t, mê-ji̍t bô chia̍h bô lim; góa kah góa ê kiong-lí mā beh kìm-chia̍h. Jiân-āu góa beh bô chiàu lē ji̍p-khì kìⁿ ông, sí chiū hō͘ i sí! "
4:17 Mol-té-kái chiū khì, chiàu Ê-su-tel it-chhè só͘ bēng-lēng ê khì chò.
各聖經譯本著作權如版權說明。
本畫面由信望愛資訊中心之CBOL計畫產生,歡迎連結,無須申請。CBOL計畫之資料版權宣告採用GNU Free Documentation License。願上帝的話能建造每一位使用這系統的人,來榮耀祂自己的名。