Hi-che-kia ū chin chē châi-bu̍t kah tōa êng-kng, chiū ūi kakī khí kim-khò͘, siu-chông kim-gîn, pó-chio̍h, phang-liāu, pîn-pâi kah ta̍k chióng ê pó-khì, 32:28 koh ūi tio̍h só͘ chhut ê ngó͘-kok, sin chiú kah iû lâi khí khò͘-pâng, koh ūi tio̍h ta̍k chióng ê chengseⁿ tah chháu-pêⁿ, khí iûⁿ-tiâu; 32:29 koh ūi kakī khí siâⁿ, koh ū chin chē gû-kûn, iûⁿ-kûn, in-ūi Siōng-tè siúⁿ-sù hō͘ i chin chē châi-sán. 32:30 Chit-ê Hi-che-kia mā that-ba̍t Gi-hóng téng-bīn ê chúi-chôaⁿ, ín chúi hō͘ i lo̍h-.lâi, lâu kàu Ta-bi̍t siâⁿ ê sai pêng. Hi-che-kia kiàn só͘ kiâⁿ ê lóng heng-thong. 32:31 Chóng-.sī, Ba-bú-lông hiahê siú-léng chhe sù-chiá lâi i hia, beh mn̄g kok lāi só͘-ū ê kî-sū; tī chit-ê tāichì Siōng-tè lī-khui i, beh kā i chhì-giām, thang chai i sim-lāi choân-pō͘ só͘-ū ê. 32:32
Hi-che-kia Thóng-tī ê Kiat-sok
( LOH 20: 20-21)
Hi-che-kia kî-tha ê tāichì kah i ê hó só͘ kiâⁿ, lóng kì tī A-mô͘-su ê kiáⁿ I-sá-iah sian-ti be̍k-sī ê chheh kah Iô-tah I-su-la-el chiahê ông ê kì-lio̍k. 32:33 Hi-che-kia kah i ê chó͘-sian tâng khùn, bâi-chòng tī Ta-bi̍t ê kiáⁿ-sun hûn-bōng khah koân ê só͘-chāi. I sí ê sî, Iô-tah lâng kah tòa tī Ê-lú-sa-lèm ê jîn-bîn, lóng chun-kèng i. I ê kiáⁿ Má-ná-se sòa-chiap i chò ông.