歷代志下 線上收聽:中文和合本 現代中文譯本修訂版 現代台語 台語聖經 客語 希伯來文讀經 下載檔案 關於語音聖經
31:1 Hi-che-kia Kái-kek Chong-kàu Seng-oa̍h
Chiahê tāichì lóng liáu-āu, tī hia ê I-su-la-el jîn-bîn chhut-.khì, kàu Iô-tah hiahê siâⁿ, phah-chhùi thiāu-siōng, chhò-tn̄g hiahê A-si-lah, koh tī Iô-tah, Biān-iá-mín, E-hu-laim, Má-ná-se choân tē, thiah-húi soaⁿ-thâu tôaⁿ kah chè-tôaⁿ, kàu choân-pō͘ húi-bia̍t ûi-chí. Chiū ánne, I-su-la-el jîn-bîn ta̍k-ê tńg-khì in ê sán-gia̍p ê tē, kàu in ê pún-siâⁿ.
31:2 Hi-che-kia siat-li̍p chè-si Lē-bī lâng ê pan-lia̍t, chiàu in ê pan-lia̍t, kok chiàu in ê chit-hūn, chè-si kah Lē-bī lâng hiàn sio-chè kah siā-un-chè, koh tī Siōng-chú hiahê iâⁿ ê mn̂g lāi ho̍k-sāi, kám-siā, oló.
31:3 Koh tùi i ê sán-gia̍p tiong tiāⁿ tio̍h ông ê hūn-gia̍h chò sio-chè, to̍h-sī chá-àm ê sio-chè kah hiahê An-hioh-ji̍t, goe̍h ê chhe-it kah cheh-kî ê sio-chè, lóng sī chiàu Siōng-chú ê lu̍t-hoat só͘ kì-chài ê.
31:4 Koh hoan-hù tòa tī Ê-lú-sa-lèm ê jîn-bîn, tio̍h kiong-kip chè-si kah Lē-bī lâng eng-kai tit tio̍h ê hūn-gia̍h, hō͘ in choan-sim tī Siōng-chú ê lu̍t-hoat.
31:5 Bēng-lēng chi̍t-ē chhut, I-su-la-el lâng chiū tòa chin chē khí-thâu se̍k ê ngó͘-kok, chiú, iû, bi̍t kah chhân-.ni̍h só͘ chhut ê, koh kā ta̍k hāng mi̍h ê cha̍p-hūn chi-it tòa chin chē lâi.
31:6 Tòa tī Iô-tah chiahê siâⁿ ê I-su-la-el lâng kah Iô-tah lâng, mā khan gû, iûⁿ ê cha̍p-hūn chi-it lâi, koh tòa hun-pia̍t chò sèng kui hō͘ Siōng-chú — in ê Siōng-tè ê mi̍h cha̍p-hūn chi-it, thia̍p chò chi̍t-tui chi̍t-tui.
31:7 Tùi saⁿ-.goe̍h khí, chek-chū hiahê tui, kàu chhit-.goe̍h chiah kiat-sok.
31:8 Hi-che-kia kah hiahê siú-léng lâi khòaⁿ hiahê tui, chiū oló Siōng-chú ū chiok-hok I ê chú-bîn — I-su-la-el lâng.
31:9 Hi-che-kia tùi chè-si kah Lē-bī lâng cha-mn̄g hiahê tui.
31:10 Sio̍k Cha-tok ê ke, tōa-chè-si A-cha-lí-ah ìn kóng, " Tùi jîn-bîn tòa kiong-kip ê mi̍h kàu Siōng-chú ê tiān í-lâi, goán chia̍h kàu-gia̍h, koh chhun chin chē, in-ūi Siōng-chú sù-hok I ê chú-bîn, só͘ chhun lo̍h-.lâi ê kàu hiah chē. "
31:11 Hi-che-kia hoan-hù tī Siōng-chú ê tiān lāi tio̍h chún-pī chhek-chhng, in chiū ánne chún-pī.
31:12 In ēng sêng-si̍t sim kā lé-mi̍h kah só͘ thiu ê cha̍p-hūn chi-it, í-ki̍p hun-pia̍t chò sèng ê mi̍h lóng poaⁿ ji̍p-.lâi. Lē-bī lâng Ko-na-ni-iah pān-lí chit-ê tāichì, i ê sió-tī Si-mí chò chō͘-chhiú.
31:13 Ia-chi-el, A-cha-chiah, Ná-hat, A-sa-hel, E-li-mo͘t, Io-cha-bat, E-li-el, I-su-má-khiah, Ma-hat, Be-ná-iah, lóng sī úi-goân, tī Ko-na-ni-iah kah i ê sió-tī Si-mí ê chhiú-hā, sī Hi-che-kia ông kah koán-lí Siōng-chú ê tiān ê A-cha-lí-ah só͘ phài ê.
31:14 Kò͘ tang-mn̂g ê Lē-bī lâng Im-nah ê kiáⁿ Kho-lē, chiáng-koán kam-sim hiàn hō͘ Siōng-chú ê mi̍h, hun-hoat hiàn hō͘ Siōng-chú ê lé-mi̍h kah hiahê chì-sèng ê mi̍h.
31:15 Chò i ê jī-chhiú ê ū E-tiân, Mi-niah-mín, E-siu-ah, Si-má-iah, A-ma-lí-ah, Si-ka-niah, tī chè-si chiahê siâⁿ, chiàu pan-lia̍t ēng sêng-si̍t sim hun-hoat hō͘ in ê hiaⁿ-tī, bô-lūn tōa-sè lóng hō͘ in.
31:16 Che to̍h-sī tī hiahê kì-ji̍p cho̍k-phó͘ saⁿ hòe í-siōng ê chapo͘ teng í-gōa, to̍h-sī kiàn-nā ji̍p-lâi Siōng-chú ê tiān ê, chiàu ta̍k ji̍t ê hūn-gia̍h só͘ eng-kai tit ê, ūi tio̍h in chiàu pan-lia̍t chīn i ê chit lâi ho̍k-sāi.
31:17 Jî-chhiáⁿ chè-si chiàu in ê sè-hē kì tī cho̍k-phó͘, í-ki̍p Lē-bī lâng tùi jī-cha̍p hòe í-siōng, chiàu in ê pan-lia̍t chīn in ê chit.
31:18 Koh kì-chài tī cho̍k-phó͘ tiong ê, in ê sè-hàn ê, in ê bó͘, in ê kiáⁿ, in ê chabó͘ kiáⁿ, tī choân hōe-chiòng tiong ê, in-ūi in chīn chit-hūn kakī chheng-khì chiâⁿ-sèng.
31:19 Mā ūi tio̍h A-lông ê kiáⁿ-sun, to̍h-sī tòa tī in ê siâⁿ gōa ê chhân-tē ê chè-si, tī ta̍k-ê siâⁿ ū kì miâ ê lâng, lâi hun-hoat in eng-kai tit tio̍h ê hūn-gia̍h, hō͘ chè-si ê chapo͘ teng, í-ki̍p kiàn-nā kì tī cho̍k-phó͘ ê Lē-bī lâng.
31:20 Hi-che-kia tī Iô-tah choân tē ánne pān-lí, kiâⁿ siān-liông chèng-ti̍t, tī Siōng-chú — i ê Siōng-tè ê bīn-chêng chīn-tiong.
31:21 Kiàn-nā i khí chhiú só͘ chò ê, tī pān-lí Siōng-chú tiān ê tāichì, tī lu̍t-hoat, tī kài-bēng, lâi chhōe i ê Siōng-tè, lóng choan-sim lâi chò, lâi heng-thong.
各聖經譯本著作權如版權說明。
本畫面由信望愛資訊中心之CBOL計畫產生，歡迎連結，無須申請。CBOL計畫之資料版權宣告採用GNU Free Documentation License。願上帝的話能建造每一位使用這系統的人，來榮耀祂自己的名。