Só͘-í, Siōng-chú — i ê Siōng-tè kā i kau tī A-lâm ông ê chhiú, in chiū kā i phah, lia̍h i ê jîn-bîn chin chōe, ah kàu Ta-má-su-ko, koh kau i tī I-su-la-el ông ê chhiú, i kā in thâi-sí chin chōe lâng. 28:6 Le-má-liah ê kiáⁿ Pe-kah tī Iô-tah, chò chi̍t ji̍t thâi-sí cha̍p-jī bān lâng, lóng sī ióng-sū, in-ūi in lī-khui Siōng-chú — in chó͘-sian ê Siōng-tè. 28:7 Ū chi̍t-ê E-hu-laim tiong ê ióng-sū miâ kiò-chò Chik-lī, thâi ông ê kiáⁿ Ma-a-se-iah kah koán-lí ông-kiong ê A-chu-li-kam, í-ki̍p cháiⁿ-siòng El-ká-nah. 28:8 I-su-la-el lâng lia̍h in ê hiaⁿ-tī, liân chabó͘ lâng, kiáⁿ-jî kiōng jī-cha̍p bān, koh chhiúⁿ chin chē châi-bu̍t, tòa in só͘ chhiúⁿ ê tńg-khì Sa-má-lī-a. 28:9
O͘-tiat Sian-ti
M̄ koh, tī hia ū Siōng-chú ê sian-ti, miâ kiò-chò O͘-tiat, chhut-khì chiap hiahê lâi Sa-má-lī-a ê kun-tūi, kā in kóng: " In-ūi Siōng-chú — lín chó͘-sian ê Siōng-tè siū-khì Iô-tah, só͘-í, kā in kau tī lín ê chhiú, lín kèng-jiân siū-khì tú thiⁿ, thâi in chin chē. 28:10 Taⁿ lín ū ì-sù ū beh ap-chè Iô-tah lâng kah Ê-lú-sa-lèm lâng chò lín ê lô͘-po̍k kah lú-pī, chóng-.sī, lín pún-sin kám bô tek-chōe Siōng-chú — lín ê Siōng-tè? 28:11 Taⁿ lín tio̍h thiaⁿ góa kóng, Lín só͘ lia̍h-.lâi lín ê hiaⁿ-tī, tio̍h pàng i tńg-.khì, in-ūi Siōng-chú ê tōa siū-khì ē lîm-kàu lín. " 28:12 Chiū ánne, E-hu-laim ê siú-léng kúi-nā-ê lâng, to̍h-sī Io-ha-nân ê kiáⁿ A-cha-lí-ah, Me-si-le-mo͘t ê kiáⁿ Be-lé-kiah, Sia-lúm ê kiáⁿ Ia-hi-che-kiah, Hat-lâi ê kiáⁿ A-ma-sa, khí-lâi chó͘-chí hiahê tùi chiàn-tīn tńg-.lâi ê, 28:13 kā in kóng, " Lín m̄ thang ah só͘ lia̍h ê lâng ji̍p-lâi chia, in-ūi lín só͘ siūⁿ beh chò ê sī ē hō͘ goán tek-chōe Siōng-chú, ke-thiⁿ goán ê chōe-kò kah goán ê kòe-sit, in-ūi goán ê kòe-sit chin tōa, í-keng ū Siōng-tè ê tōa siū-khì lîm-kàu I-su-la-el à. " 28:14 Chiū ánne, gia̍h ke-si ê lâng chiū kā in só͘ lia̍h ê lâng kah só͘ chhiúⁿ ê mi̍h, pàng tī hiahê siú-léng kah hōe-chiòng ê bīn-chêng. 28:15 Téng-bīn hiahê kì miâ ê lâng chiū khí-.lâi, hō͘ siū lia̍h ê lâng lâi, kî-tiong ū thǹgpaktheh ê, chiū tùi só͘ chhiúⁿ-.lâi ê mi̍h tiong-kan, the̍h saⁿ hō͘ in chhēng, koh the̍h ê hō͘ in, koh hō͘ in lim-chia̍h, ēng iû kā in boah; kî-tiong loán-jio̍k ê chiū hō͘ in khiâ lî-á, kā in sàng kàu chó-chhiū siâⁿ kah I-é-lī-kho siâⁿ in ê hiaⁿ-tī hia; āu-lâi chiū tńg-khì Sa-má-lī-a. 28:16
A-khà-chuh Hiòng A-siul Ông Kiû Pang-chō͘
( LOH 16: 7-9)
Hit sî, A-khà-chuh ông chhe sù-chiá khì kìⁿ A-siul hiahê ông, kiû in pang-chān; 28:17 In-ūi E-tóm lâng koh lâi phah Iô-tah, kā jîn-bîn lia̍h-.khì. 28:18 Hui-lī-sū lâng mā lâi chhim-hoān kē ê pêng-goân kah Iô-tah lâm pêng hiahê siâⁿ, cheng-ho̍k Bia̍t-si-mé-si, A-iá-lông, Ge-te-lo͘t, So͘-koh kah i ê chng-thâu, Tim-ná kah i ê chng-thâu, Gim-chó͘ kah i ê chng-thâu, chiū tī hia tòa lo̍h-.lâi. 28:19 In-ūi Siōng-chú ūi tio̍h I-su-la-el ông A-khà-chuh ê iân-kò͘, hō͘ Iô-tah pi-bî, sī in-ūi A-khà-chuh tī Iô-tah hòng-sù, tōa-tōa tek-chōe Siōng-chú. 28:20 A-siul ông Thi-gú-la̍t-pi-lé-sel khí-.lâi, bô kā i oân-chō͘, tian-tò kā i pek-hāi. 28:21 A-khà-chuh tùi Siōng-chú ê tiān, ông-kiong kah siú-léng ê ke, the̍h-chhut châi-pó lâi hō͘ A-siul ông, chóng-.sī, lóng bô lī-ek. 28:22
A-khà-chuh ê Chōe
Chit-ê A-khà-chuh ông tī kín-kip ê sî, koh khah tek-chōe Siōng-chú. 28:23 In-ūi i chè-sū Ta-má-su-ko ê sîn-bêng. Chiū-sī kā i phah ê, kóng, " In-ūi A-lâm ông ê sîn-bêng kā in pang-chān, góa mā kā i chè-sū, hō͘ i pang-chān góa. " Chóng-.sī, hiahê sîn-bêng hō͘ i kah I-su-la-el jîn-bîn lóng tó-hoāi. 28:24 A-khà-chuh chū-chi̍p Siōng-chú tiān ê khì-kū, phah-phòa Siōng-chú tiān lāi ê khì-kū, koh hong-só Siōng-chú tiān ê mn̂g, tī Ê-lú-sa-lèm ta̍k-ê oat-kak ê só͘-chāi khí tôaⁿ. 28:25 Koh tī Iô-tah ta̍k-ê siâⁿ khí soaⁿ-thâu tôaⁿ, sio hiuⁿ hō͘ pa̍t-ê sîn-bêng, kek-khí Siōng-chú — i ê chó͘-sian ê Siōng-tè ê siū-khì. 28:26 A-khà-chuh kî-tha ê tāichì kah i ê hêng-ûi, tùi-thâu kàu-bóe, lóng kì tī Iô-tah kah I-su-la-el chiahê ông ê kì-lio̍k. 28:27 A-khà-chuh kah i ê chó͘-sian tâng khùn, kā i bâi-chòng tī Ê-lú-sa-lèm siâⁿ, bô hō͘ i ji̍p tī I-su-la-el chiahê ông ê bōng. I ê kiáⁿ Hi-che-kia sòa-chiap i chò ông.