歷代志下 線上收聽:中文和合本 現代中文譯本修訂版 現代台語 台語聖經 客語 福州話 希伯來文讀經 下載檔案 關於語音聖經
12:1 Ai-gi̍p Chhim-lio̍k Iô-tah
( LOS 14: 25-28)
Lô-bo-àm ê kok kian-kò͘, i kiông-sēng ê sî, chiū khì-sak Siōng-chú ê lu̍t-hoat, I-su-la-el mā lóng tòe i.
12:2 Lô-bo-àm ông gō͘ nî, Ai-gi̍p ông Si-siak khí-lâi kong-kek Ê-lú-sa-lèm, in-ūi in tek-chōe Siōng-chú.
12:3 Si-siak ū chiàn-chhia chi̍t-chheng nn̄g-pah tâi, bé-peng la̍k-bān, koh ū tòe i tùi Ai-gi̍p chhut-.lâi ê lâng, to̍h-sī Lu-bí lâng, Su-ki lâng, Kú-si̍t lâng, chē kàu sǹg bē liáu.
12:4 I cheng-ho̍k Iô-tah kian-kò͘ ê siâⁿ, chiū lâi-kàu Ê-lú-sa-lèm.
12:5 Hit sî, Iô-tah ê siú-léng ūi tio̍h Si-siak ê iân-kò͘, chū-chi̍p tī Ê-lú-sa-lèm, sian-ti Si-má-iah lâi kìⁿ Lô-bo-àm kah hiahê siú-léng, kā in kóng, " Siōng-chú ánne kóng, ' Lín khì-sak Góa, só͘-í, Góa kā lín khì-sak tī Si-siak ê chhiú. '"
12:6 Chiū ánne, I-su-la-el hiahê siú-léng kah ông kakī khiam-pi, kóng, " Siōng-chú sī kong-gī. "
12:7 Siōng-chú khòaⁿ tio̍h in kakī khiam-pi, Siōng-chú ê ōe chiū lîm-kàu Si-má-iah kóng, " In kì-jiân kakī khiam-pi, Góa bô beh kā in châu-bia̍t, beh hō͘ in lio̍h-á tit tio̍h chín-kiù, Góa bô beh ēng Si-siak ê chhiú piàⁿ-lo̍h Góa ê siū-khì tī Ê-lú-sa-lèm.
12:8 Chóng-.sī, in ē chò Si-siak ê lô͘-po̍k, hō͘ in chai-iáⁿ ho̍k-sāi Góa kah ho̍k-sāi lia̍t kok ū siáⁿ-mi̍h hun-pia̍t. "
12:9 Chiū ánne, Ai-gi̍p ông Si-siak khí-lâi kong-kek Ê-lú-sa-lèm, chhiúⁿ Siōng-chú tiān ê pó-bu̍t kah ông-kiong ê pó-bu̍t, lóng tòa-.khì, koh chhiúⁿ Só͘-lô-móng só͘ chò kim ê pîn-pâi.
12:10 Lô-bo-àm ông chò tâng ê pîn-pâi lâi tāi-thè, kau hō͘ siú ông-kiong mn̂g ê sī-ōe-tiúⁿ khì kò͘-siú.
12:11 Ông ta̍k pái ji̍p-khì Siōng-chú ê tiān, sī-ōe chiū tòa chiahê pîn-pâi, āu-lâi chiū tòa tò tńg-.lâi, hē tī sī-ōe ê chhù.
12:12 Ông kakī khiam-pi ê sî, Siōng-chú ê siū-khì chiū siu tò-tńg, bô choân-pō͘ kā i siau-bia̍t, jî-chhiáⁿ tī Iô-tah ê tiong-kan mā ū hó ê tāichì.
12:13 Lô-bo-àm Thóng-tī ê Kì-chài
Lô-bo-àm ông kakī kiông-sēng, tī Ê-lú-sa-lèm chò ông. Lô-bo-àm chē-ūi ê sî sì-cha̍p-it hòe, tī Ê-lú-sa-lèm, to̍h-sī Siōng-chú tùi I-su-la-el chèng chi-cho̍k tiong-kan só͘ kéng lâi an-tì I ê miâ ê siâⁿ, chò ông cha̍p-chhit nî. I ê lāu-bú ê miâ kiò-chò Ná-má, sī Am-móng lâng.
12:14 Lô-bo-àm kiâⁿ pháiⁿ, in-ūi i bô tiāⁿ tio̍h ì-sù lâi cháu-chhōe Siōng-chú.
12:15 Lô-bo-àm só͘ kiâⁿ ê tāichì, tùi-thâu kàu-bóe, kám bô kì tī sian-ti Si-má-iah kah sian-kiàn It-tó͘ ê chheh iú-koan cho̍k-phó͘ ê? Lô-bo-àm kah Ia-lô-ba-am tiāⁿtiāⁿ kau-chiàn.
12:16 Lô-bo-àm kah i ê chó͘-sian tâng khùn, bâi-chòng tī Ta-bi̍t siâⁿ. I ê kiáⁿ A-bi-iah sòa-chiap i chò ông.
各聖經譯本著作權如版權說明。
本畫面由信望愛資訊中心之CBOL計畫產生,歡迎連結,無須申請。CBOL計畫之資料版權宣告採用GNU Free Documentation License。願上帝的話能建造每一位使用這系統的人,來榮耀祂自己的名。