歷代志上 線上收聽:中文和合本 現代中文譯本修訂版 現代台語 台語聖經 客語 希伯來文讀經 下載檔案 關於語音聖經
28:1 Ta-bi̍t Tùi Khí-chō Sèng-tiān ê Chí-sī
Ta-bi̍t chio-chi̍p I-su-la-el ê siú-léng, kok chi-cho̍k ê siú-léng kah lûn-pan ho̍k-sāi ông ê kun-tiúⁿ, iâⁿ-tiúⁿ, liân-tiúⁿ, chiáng-koán ông kah ông ê kiáⁿ ê sán-gia̍p chengseⁿ ê kah thài-kàm, í-ki̍p tōa koân-lêng ê kah tōa koân-lêng ê ióng-sū, lóng lâi-kàu Ê-lú-sa-lèm.
28:2 Ta-bi̍t ông chiū khiā khí-lâi kóng, " Góa ê hiaⁿ-tī, góa ê jîn-bîn, lín tio̍h thiaⁿ góa ê ōe, góa ê sim pún siūⁿ beh ūi tio̍h Siōng-chú ê iok-kūi, koh ūi tio̍h lán ê Siōng-tè ê kha-ta̍h-í, khí tiān lâi kā i an-tì; góa í-keng chún-pī beh khí,
28:3 chóng-.sī, Siōng-tè tùi góa kóng, " Lí bē tàng ūi Góa ê miâ khí tiān, in-ūi lí sī chiàn-sū, ū hō͘ lâng lâu hoeh. '
28:4 M̄ koh, Siōng-chú — I-su-la-el ê Siōng-tè, tī góa ê pē choân ke kéng góa chò I-su-la-el ông ti̍t-kàu éng-oán. In-ūi I kéng Iô-tah chò siú-léng, tī Iô-tah ê chi-cho̍k tiong-kan kéng góa ê pē ê ke, tī góa ê pē ê chèng kiáⁿ tiong-kan kah-ì góa, siat-li̍p góa chò I-su-la-el jîn-bîn ê ông.
28:5 Siōng-chú siúⁿ-sù góa chin chē kiáⁿ, tī góa ê kiáⁿ ê tiong-kan, kéng góa ê kiáⁿ Só͘-lô-móng tī Siōng-chú ê kok chē-ūi, tī-lí I-su-la-el.
28:6 " I koh tùi góa kóng, ' Lí ê kiáⁿ Só͘-lô-móng ē khí Góa ê tiān kah Góa ê īⁿ, in-ūi Góa kéng i chò Góa ê kiáⁿ, Góa mā beh chò i ê pē.
28:7 I nā kú-tn̂g chun-thàn Góa ê kài-bēng kah hoat-tō͘, chhin-chhiūⁿ kin-á-ji̍t, Góa chiū beh kian-kò͘ i ê kok-ūi, it-ti̍t kàu éng-oán. '
28:8 " Taⁿ tī Siōng-chú kah I-su-la-el jîn-bîn ê bīn-chêng, lán ê Siōng-chú mā ū thiaⁿ-.tio̍h, lín tio̍h chhâ-khó lín ê Siōng-tè — Siōng-chú ê kài-bēng, lâi kā i chip-siú, ánne lín chiū thang hióng-siū chit-ê hó ê tē, lâu hō͘ lín āu-tāi ê kiáⁿ-sun, éng-oán chò sán-gia̍p.
28:9 " Góa ê kiáⁿ Só͘-lô-móng, lí tio̍h jīn-bat lí ê pē ê Siōng-tè, ēng sêng-si̍t ê sim lâi hoaⁿ-hí ho̍k-sāi I; in-ūi Siōng-chú kàm-chhat kûn-chiòng ê sim, chai só͘-ū ê sim-su liām-thâu. Lí nā chhōe I, I ē hō͘ lí tú-.tio̍h; lí nā pàng-sak I, I ē éng-oán kī-choa̍t lí.
28:10 Lí tio̍h kín-sīn, in-ūi Siōng-chú kéng lí lâi khí chhù chò sèng-só͘. Lí tio̍h ióng-kám khì chò. "
28:11 Ta-bi̍t kā sèng-tiān ê mn̂g-lông, pâng-keng, kim-khò͘, lâu-koh, lāi-tiān kah si-un-só͘ hit keng, só͘-ū ê tô͘-iūⁿ kau hō͘ i ê kiáⁿ Só͘-lô-móng,
28:12 Koh ēng tùi Sèng Sîn só͘ tit tio̍h it-chhè ê tô͘-iūⁿ, to̍h-sī Siōng-chú tiān ê īⁿ, sì-kho͘-ûi ê pâng, Siōng-chú tiān ê kim-khò͘ kah sèng-mi̍h ê kim-khò͘ chiahê tô͘-iūⁿ lóng kau hō͘ i;
28:13 koh chí-sī i iú-koan chè-si kah Lē-bī lâng ê pan-lia̍t kah Siōng-chú tiān lāi ho̍k-sāi ê kang, í-ki̍p Siōng-chú tiān lāi ho̍k-sāi ê khì-kū;
28:14 koh chhìn kim hō͘ i chò ta̍k chióng èng-iōng ê kim-khì, mā chhìn gîn hō͘ i chò ta̍k chióng èng-iōng ê gîn-khì,
28:15 to̍h-sī chiahê kim teng-tâi kah i ê chóaⁿ, chiū chhìn kim lâi chò ta̍k-ê teng-tâi kah i ê chóaⁿ, koh ēng-chò gîn teng-tâi ê gîn lâi chhìn hō͘ i, teng-tâi kah i ê chóaⁿ lóng sī ánne, chiàu ta̍k-ê teng-tâi ê lō͘-ēng;
28:16 koh chhìn kim hō͘ i lâi chò pâi-lia̍t piáⁿ ê toh, mā chhìn gîn lâi chò gîn ê toh,
28:17 koh ēng sûn-kim hō͘ i chò bah-chhe, pôaⁿ kah poe, koh chhìn kim hō͘ i thang chò ta̍k-ê kim óaⁿ, chhìn gîn hō͘ i chò ta̍k-ê gîn-óaⁿ,
28:18 koh chhìn sûn-kim hō͘ i thang chò hiuⁿ-tôaⁿ, mā ēng kim chò ki-lō͘-peng chhia ê khoán-sit, in thí-khui si̍t, jia-khàm Siōng-chú ê iok-kūi.
28:19 Ta-bi̍t kóng, " Téng-bīn chiahê kui-bô͘, lóng sī góa tit tio̍h Siōng-chú be̍k-sī siá chhut-.lâi ê. "
28:20 Ta-bi̍t koh kā i ê kiáⁿ Só͘-lô-móng kóng, " Lí tio̍h ióng-kám chòng-táⁿ khì chò, m̄-bián lún, mā m̄-bián kiaⁿ, in-ūi Siōng-chú — Siōng-tè, to̍h-sī góa ê Siōng-tè kah lí tông-chāi, I it-tēng bô lī-khui lí, mā bô pàng-sak lí, it-ti̍t kàu Siōng-chú tiān ê kang lóng oân-sêng.
28:21 Lí khòaⁿ, ū chè-si kah Lē-bī lâng ê ta̍k pan, ūi tio̍h beh pān-lí Siōng-chú tiān ta̍k hāng ê tāichì, koh ū kî-khiáu ê lâng, tī ta̍k hāng ê kang hoaⁿ-hí pang-chān lí, mā ū chiahê siú-léng kah chèng lâng tâng-sim chun-thàn lí ê bēng-lēng. "
各聖經譯本著作權如版權說明。
本畫面由信望愛資訊中心之CBOL計畫產生，歡迎連結，無須申請。CBOL計畫之資料版權宣告採用GNU Free Documentation License。願上帝的話能建造每一位使用這系統的人，來榮耀祂自己的名。