歷代志上 線上收聽:中文和合本 現代中文譯本修訂版 現代台語 台語聖經 客語 福州話 希伯來文讀經 下載檔案 關於語音聖經
21:1 Ta-bi̍t Tiám-sǹg I-su-la-el Lâng ê Sò͘-gia̍h
( SMH 24: 1-25)
Sa-tán khí-lâi ài hāi I-su-la-el, ín-iú Ta-bi̍t sǹg I-su-la-el lâng ê sò͘-gia̍h.
21:2 Ta-bi̍t kā Io-ap kah jîn-bîn tiong-kan ê siú-léng kóng, " Lín khì sǹg I-su-la-el lâng, tùi Bel-sí-bah kàu Tàn, tńg-lâi kā góa kóng, hō͘ góa chai in ê sò͘-gia̍h. "
21:3 Io-ap kóng, " Goān Siōng-chú hō͘ I ê chú-bîn pí hiān-kim ke-thiⁿ pah pōe, góa ê chú — góa ê ông, in kám bô lóng sī góa ê chú ê jîn-bîn? Góa ê chú án-chóaⁿ bēng-lēng chit-ê tāichì? Án-chóaⁿ hō͘ I-su-la-el hoān chōe? "
21:4 Chóng-.sī, ông ê ōe iâⁿ-kòe Io-ap. Io-ap chiū chhut-khì piàn kiâⁿ I-su-la-el tē, koh tńg-lâi Ê-lú-sa-lèm.
21:5 Io-ap chiū kā só͘ sǹg jîn-bîn ê chóng-gia̍h pò-kò Ta-bi̍t, I-su-la-el lâng ē gia̍h to ê ū chi̍t-pah cha̍p-bān, Iô-tah lâng ē gia̍h to ê sì-cha̍p chhit bān.
21:6 To̍k-to̍k Lē-bī lâng kah Biān-iá-mín lâng i bô sǹg chāi-lāi, in-ūi Io-ap thó-ià ông chit-ê bēng-lēng.
21:7 Chit-ê tāichì Siōng-tè khòaⁿ-chò m̄-hó, chiū phah I-su-la-el.
21:8 Ta-bi̍t tùi Siōng-tè kóng, " Góa kiâⁿ chit-ê tāichì, tōa-tōa ū chōe, taⁿ kiû Lí tû-khì Lí ê lô͘-po̍k ê chōe, in-ūi góa só͘ chò ê chin gōng. "
21:9 Siōng-chú hoan-hù Ta-bi̍t ê sian-kiàn Ga̍t, kóng,
21:10 " Lí tio̍h khì kā Ta-bi̍t kóng, Siōng-chú ánne kóng, ' Taⁿ Góa ēng saⁿ hāng pâi tī lí bīn-chêng, lí kéng chi̍t hāng, Góa thang kiâⁿ tī lí ê sin chiūⁿ. '"
21:11 Ga̍t chiū lâi kìⁿ Ta-bi̍t, kā i kóng, " Siōng-chú ánne kóng, ' Lí tio̍h kakī kéng,
21:12 khòaⁿ sī saⁿ nî ê ki-hng, á-.sī saⁿ goe̍h-ji̍t tī lí ê tùi-te̍k ê bīn-chêng tú tio̍h sún-hāi, hō͘ siû-te̍k ê to-kiàm jiok tio̍h lí, á-.sī saⁿ ji̍t Siōng-chú ê kiàm, to̍h-sī un-e̍k tī lí ê kok lāi, Siōng-chú ê sù-chiá tī I-su-la-el ê choân kéng teh húi-bia̍t. ' Taⁿ lí tio̍h siūⁿ khòaⁿ, góa thang ēng siáⁿ-mi̍h ōe hôe-hok chhe góa ê. "
21:13 Ta-bi̍t kā Ga̍t kóng, " Góa khùn-pek kàu-ke̍k, góa goān-ì hām-lo̍h tī Siōng-chú ê chhiú, in-ūi I ê liân-bín chin tōa, góa m̄ goān-ì hām-lo̍h tī lâng ê chhiú. "
21:14 Chiū ánne, Siōng-chú chiū kàng un-e̍k tī I-su-la-el, I-su-la-el lâng sí ê ū chhit bān.
21:15 Siōng-chú chhe chi̍t-ê sù-chiá lâi-kàu Ê-lú-sa-lèm beh kā i bia̍t-tiāu, teh beh kā i bia̍t-tiāu ê sî, Siōng-chú khòaⁿ-.tio̍h, chiū kái-piàn chú-ì, kā húi-bia̍t ê sù-chiá kóng, " Kàu-gia̍h à, taⁿ thang thêng lí ê chhiú. " Hit sî, Siōng-chú ê sù-chiá khiā tī I-é-bú-suh lâng Ol-nân ê tiūⁿ-tiâⁿ.
21:16 a-bi̍t gia̍h thâu khòaⁿ tio̍h Siōng-chú ê sù-chiá khiā tī pòaⁿ khong-tiong, poe̍h to tī chhiú-.ni̍h, chhun tī Ê-lú-sa-lèm ê téng-bīn. Ta-bi̍t kah chiahê tiúⁿ-ló lóng chhēng môa-saⁿ, bīn phak tī thô͘-kha.
21:17 Ta-bi̍t tùi Siōng-tè kóng, " Hoan-hù tiám-sǹg jîn-bîn ê kám m̄-sī góa? Góa hoān chōe kiâⁿ tōa pháiⁿ, chóng-.sī, chiahê iûⁿ-kûn kám ū chò siáⁿ-mi̍h? Kiû Siōng-chú — góa ê Siōng-tè, chhun chhiú tī góa kah góa ê pē ê ke, m̄ thang kong-kek Lí ê chú-bîn, kàng un-e̍k hō͘ in. "
21:18 Hit tong-sî, Siōng-chú ê sù-chiá bēng-lēng Ga̍t khì kā Ta-bi̍t kóng, Ta-bi̍t tio̍h chiūⁿ-.khì, tī I-é-bú-suh lâng Ol-nân ê tiūⁿ-tiâⁿ, kā Siōng-chú khí chi̍t chō tôaⁿ.
21:19 Ta-bi̍t chiū chiàu Ga̍t hōng Siōng-chú ê miâ só͘ kóng ê ōe chiūⁿ-.khì.
21:20 Hit sî, Ol-nân teh phah-be̍h, oa̍t thâu khòaⁿ tio̍h thiⁿ-sài, kah i chò-hóe hit sì-ê kiáⁿ cháu-khì bih.
21:21 Ta-bi̍t lâi-kàu Ol-nân hia, Ol-nân khòaⁿ tio̍h Ta-bi̍t, chiū tùi tiūⁿ-tiâⁿ chhut-.lâi, àⁿ thâu pài Ta-bi̍t.
21:22 Ta-bi̍t tùi Ol-nân kóng, " Lí kā chit-ê tiūⁿ-tiâⁿ ê tē hō͘ góa, hō͘ góa tī hia thang kā Siōng-chú khí chi̍t chō tôaⁿ, lí tio̍h chiàu chiok-gia̍h ê kè-chîⁿ bē góa, hō͘ un-e̍k soah, bô hāi tio̍h jîn-bîn. "
21:23 Ol-nân kā Ta-bi̍t kóng, " Lí thang the̍h-khì ēng, goān góa ê chú — góa ê ông, chiàu lí só͘ khòaⁿ-chò hó ê khì kiâⁿ. Lí khòaⁿ, góa ēng gû hō͘ lí chò sio-chè, ēng phah ngó͘-kok ê khì-kū chò chhâ, mā ēng be̍h-á chò sò͘-chè, chiahê góa lóng hō͘ lí. "
21:24 Ta-bi̍t ông kā Ol-nân kóng, " M̄-sī ánne, góa choa̍t-tùi beh ēng chiok-gia̍h ê kè-chîⁿ lâi bé, in-ūi góa bô ài the̍h lí ê mi̍h hō͘ Siōng-chú, bô ài ēng bô khai-hùi lâi hiàn sio-chè. "
21:25 Chiū ánne, Ta-bi̍t ūi tio̍h hit tè tē chhìn la̍k pah si-khel ê kim hō͘ Ol-nân.
21:26 Ta-bi̍t tī hia kā Siōng-chú khí chi̍t chō tôaⁿ, hiàn sio-chè kah pêng-an-chè, koh kiû-kiò Siōng-chú. Siōng-chú tùi thiⁿ kàng hóe tī chè-tôaⁿ téng lâi kā i ìn-tap.
21:27 Siōng-chú bēng-lēng sù-chiá, i chiū kā to siu ji̍p-khì siù lāi.
21:28 Hit sî, Ta-bi̍t khòaⁿ tio̍h Siōng-chú tī I-é-bú-suh lâng Ol-nân ê tiūⁿ-tiâⁿ kā i ìn-tap, chiū tī hia hiàn chè.
21:29 In-ūi Mô͘-se tī khòng-iá só͘ chō Siōng-chú ê hōe-bō͘ kah sio-chè ê tôaⁿ, hit sî lóng tī Gi-bóng koân ê só͘-chāi.
21:30 Chóng-.sī, Ta-bi̍t bē tàng chiūⁿ-kàu I ê bīn-chêng lâi mn̄g Siōng-tè, in-ūi i kiaⁿ Siōng-chú ê sù-chiá ê to.
各聖經譯本著作權如版權說明。
本畫面由信望愛資訊中心之CBOL計畫產生，歡迎連結，無須申請。CBOL計畫之資料版權宣告採用GNU Free Documentation License。願上帝的話能建造每一位使用這系統的人，來榮耀祂自己的名。