列王紀下 線上收聽:中文和合本 現代中文譯本修訂版 現代台語 台語聖經 客語 福州話 希伯來文讀經 下載檔案 關於語音聖經
19:1 Ông Chhéng-kàu I-sá-iah sian-ti
( ISI 37: 1-7)
Hi-che-kia ông thiaⁿ-.tio̍h, chiū thiah-li̍h i ê saⁿ, chhēng môa-pò͘ ji̍p-khì Siōng-chú ê tiān;
19:2 chhe koán-ke ê E-li-a-kim kah su-kì Siap-ná kah chè-si tiong ê ló-pòe ê, lóng chhēng môa-pò͘ khì kìⁿ A-mô͘-su ê kiáⁿ I-sá-iah sian-ti,
19:3 tùi i kóng, " Hi-che-kia ánne kóng, ' Kin-á-ji̍t sī hoān-lān chek-hoa̍t lêng-jio̍k ê ji̍t, sī chhin-chhiūⁿ kiáⁿ beh chhut-sì, ā bô la̍t thang seⁿ chhut-.lâi.
19:4 Kiám-chhái Siōng-chú — lí ê Siōng-tè thiaⁿ tio̍h Lap-siá-keh ê ōe, to̍h-sī i ê chú A-siul ông chhe i lâi bú-bān éng-oán oa̍h ê Siōng-chú ê ōe, kiámchhái Siōng-chú — lí ê Siōng-tè ūi tio̍h thiaⁿ tio̍h chiahê ōe, chiū ē kā i chek-pī, só͘-í, kiû lí ūi tio̍h chhun lo̍h-.lâi ê jîn-bîn chhut siaⁿ kî-tó. '"
19:5 Hi-che-kia ông ê jîn-sîn chiū khì kìⁿ I-sá-iah.
19:6 I-sá-iah tùi in kóng, " Tio̍h ánne tùi lín ê chú kóng, Siōng-chú ánne kóng, ' Lí thiaⁿ tio̍h A-siul ông ê lô͘-po̍k siat-to̍k Góa ê ōe, m̄-bián kiaⁿ in.
19:7 Lí khòaⁿ, Góa ē ēng chi̍t-ê sim-sîn ji̍p-khì i ê sim, i ē thiaⁿ tio̍h hong-siaⁿ, chiū tò tńg-khì pún só͘-chāi. Góa ē hō͘ i tī pún só͘-chāi tó tī to hā. '"
19:8 A-siul Lâng Koh Lâi Ui-hia̍p
( ISI 37: 8-20)
Lap-siá-keh tńg-.khì, tú tio̍h A-siul ông teh phah Lip-nah, in-ūi i ū thiaⁿ tio̍h A-siul ông lī-khui La̍h-ki-sih.
19:9 Ông thiaⁿ tio̍h kóng, " Kú-si̍t ông Te̍k-hap-ka chhut-lâi beh kah lí kau-chiàn. " I chiū chhe sù-chiá khì kìⁿ Hi-che-kia, kā in hoan-hù kóng,
19:10 " Tio̍h kā Iô-tah ông Hi-che-kia ánne kóng, ' Lí só͘ óa-khò ê lí ê Siōng-tè kóng, Ê-lú-sa-lèm it-tēng bô beh kau tī A-siul ông ê chhiú, lí m̄ thang hō͘ I khi-phiàn.
19:11 Lí khòaⁿ, lí chóng ū thiaⁿ tio̍h A-siul chiahê ông tùi lia̍t kok só͘ kiâⁿ ê, sī choân-pō͘ kā i bia̍t-tiāu, chóng-bô lí kám iáu ē tit tio̍h kiù?
19:12 Goán ê chó͘-sian só͘ húi-bia̍t ê, to̍h-sī Go-chán, Khal-lân, Le-che-hu kah sio̍k The-la-sal ê E-tiân lâng, chiahê kok ê sîn-bêng kám bat kā in kiù?
19:13 Ha-mat ê ông, Al-pat ê ông, Se-hoa-ba-im siâⁿ ê ông He-ná kah A-boah ê ông, lóng tī tó-ūi? '"
19:14 Hi-che-kia tùi sù-chiá ê chhiú chiap tio̍h phoe chiū tha̍k, Hi-che-kia chiū khì Siōng-chú ê tiān, kā phoe pâi tī Siōng-chú ê bīn-chêng.
19:15 Hi-che-kia tī Siōng-chú ê bīn-chêng kî-tó, kóng, " Chē tī ki-lō͘-peng ê tiong-kan, Siōng-chú — I-su-la-el ê Siōng-tè ah, to̍k-to̍k Lí chò thian-hā bān-kok ê Siōng-tè, Lí bat chhòng-chō thiⁿ kah tē.
19:16 Siōng-chú ah, kiû Lí àⁿ hīⁿ-khang lâi thiaⁿ! Siōng-chú ah, kiû Lí khui ba̍k-chiu lâi khòaⁿ! Tio̍h thiaⁿ Se-nah-khe-lip ê ōe, sī chhe sù-chiá lâi bú-bān éng-oán oa̍h ê Siōng-tè ê.
19:17 Siōng-chú ah, A-siul chiahê ông kó-jiân hō͘ lia̍t kok kah in ê tē piàn-chò pha-hng,
19:18 mā kā in ê sîn-bêng hiat tī hóe-.ni̍h, in-ūi in m̄-sī Siōng-tè, sī lâng ê chhiú só͘ chō ê, chhâ chò ê, chio̍h-thâu chò ê, in chiū kā i châu-bia̍t tiāu.
19:19 Siōng-chú — goán ê Siōng-tè ah, taⁿ góa kiû Lí kiù goán thoat-lī i ê chhiú, hō͘ thiⁿ-ē bān-kok lóng chai, to̍k-to̍k Lí — Siōng-chú sī Siōng-tè! "
19:20 I-sá-iah hō͘ Ông ê Sìn-sit
( ISI 37: 20-37)
A-mô͘-su ê kiáⁿ I-sá-iah chiū chhe lâng khì kìⁿ Hi-che-kia, kóng, " Siōng-chú — I-su-la-el ê Siōng-tè ánne kóng, ' Lí kì-jiân in-ūi A-siul ông Se-nah-khe-lip ê iân-kò͘ lâi kā Góa kî-kiû, Góa ū thiaⁿ-.tio̍h. '
19:21 Taⁿ kóng tio̍h i, Siōng-chú ū ánne kóng, ' Si-óng ê chāi-sek-lí biáu-sī lí, kā lí thí-chhiò, Ê-lú-sa-lèm ê chabó͘ gín'á tùi lí iô thâu.
19:22 Lí sī teh lêng-jio̍k bú-bān siáⁿ lâng? Chhut tōa-siaⁿ, ba̍k-chiu khiàu koân-koân teh biáu-sī kong-kek siáⁿ lâng? Chiū-sī kong-kek I-su-la-el ê sèng ê!
19:23 Lí chhe lí ê sù-chiá lâi bú-bān Chú, kóng, " Góa chhōa chin chē chiàn-chhia lâi-kàu soaⁿ koân ê só͘-chāi, lâi-kàu Le-ba-nòng ke̍k chhim ê só͘-chāi; góa beh chhò hit tè koân-tōa ê pek-hiuⁿ chhâ kah siōng hó ê siông chhiū; góa beh kàu i ke̍k-hn̄g hioh-khùn ê só͘-chāi kah i ê pûi tē ê chhiū-nâ.
19:24 Góa ū khui chéⁿ lim gōa-pang ê chúi, góa ēng kha-chiúⁿ ta̍h Ai-gi̍p só͘-ū ê hô, hō͘ i ta-.khì.
19:25 Siōng-chú kóng ê, lí kám m̄ bat thiaⁿ-.tio̍h, góa tī goân-khí-thâu só͘ chò, tī kó͘-chá só͘ tiāⁿ tio̍h ê? Taⁿ góa kā i chiâⁿ, sī hō͘ lí khì húi-hoāi kian-kò͘ ê siâⁿ, piàn-chò hòe-hi.
19:26 Só͘-í, tòa tī kî-tiong ê jîn-bîn khùi-la̍t chin chió, kiaⁿ-hiâⁿ koh kiàn-siàu. In chhin-chhiūⁿ khòng-iá ê chháu, chheⁿ-chhùi ê chhài, chhin-chhiūⁿ chhù téng ê chháu, chhin-chhiūⁿ iáu-bōe tōa châng chiū ta-.khì ê tiū-á.
19:27 Lí chē lo̍h-.khì, lí chhut-.khì, lí ji̍p-.lâi, lí tùi Góa ê tōa siū-khì, Góa lóng chai.
19:28 In-ūi lí tùi Góa tōa siū-khì, koh in-ūi lí kiau-ngō͘ ê ōe thàng-kàu Góa ê hīⁿ-khang, Góa chiū ē ēng Góa ê kau lâi kau lí ê phīⁿ, ēng Góa ê bé-kā-kiuⁿ khòa tī lí ê chhùi, hō͘ lí tùi goân-lō͘ tńg-.khì.
19:29 " Hi-che-kia, chit-ê hō͘ lí chò tiāu-thâu, kin-nî lín ē chia̍h kakī hoat-chhut ê mi̍h, mê-nî ē chia̍h tùi hit-ê só͘ chhut-sán ê, kàu tē-saⁿ nî, lín tio̍h chèng-choh siu-koah, chai-chèng phû-tô hn̂g, lâi chia̍h i ê kóe-chí.
19:30 Iô-tah ke thoat-lī hoān-lān só͘ chhun lo̍h-.lâi ê jîn-bîn, ē iû-goân ē-bīn tèng-kin, téng-bīn kiat kóe-chí.
19:31 In-ūi ē ū chhun lo̍h-.lâi ê jîn-bîn tùi Ê-lú-sa-lèm chhut-.lâi, ē ū tô-cháu ê lâng tùi Si-óng soaⁿ lâi. Siōng-chú ê jia̍t-sim ē chiâⁿ chit-ê tāichì.
19:32 " Só͘-í, Siōng-chú koan-hē A-siul ông, kóng, ' I it-tēng bē kàu chit-ê siâⁿ, mā bē tī chia siā chìⁿ, bē tàng giâ tîn-pâi lâi-kàu siâⁿ chêng, mā bē khí thô͘-tui lâi kong-kek i.
19:33 I tùi hit tiâu lō͘ lâi, ē tùi hit tiâu lō͘ tńg-.khì, bē tàng lâi-kàu chit-ê siâⁿ. Che sī Siōng-chú só͘ kóng ê.
19:34 In-ūi Góa ūi tio̍h kakī ê iân-kò͘, koh ūi tio̍h Góa ê lô͘-po̍k — Ta-bi̍t ê iân-kò͘, ē pó-hō͘ chit-ê siâⁿ, lâi kā i chín-kiù. '"
19:35 Hit mê, Siōng-chú ê sù-chiá chhut-.khì, tī A-siul iâⁿ tiong phah-sí cha̍p-peh bān gō͘ chheng lâng. Kàu thiⁿ-kng chá-khí khí-.lâi ê sî, lí khòaⁿ, lóng sī sí-lâng ê sin-si.
19:36 A-siul ông Se-nah-khe-lip chiū lī-khui tńg-.khì, tòa tī Ni-ne-beh.
19:37 Tī i ê sîn-bêng Nî-su-lo̍k ê biō kèng-pài ê sî, i ê kiáⁿ A-to-lam-me-le̍k kah Sia-lé-chel ēng to kā i thâi-sí, in chiū cháu kàu A-la̍h-la̍t ê só͘-chāi. I ê kiáⁿ E-sal-ha-tóng sòa-chiap i chò ông.
各聖經譯本著作權如版權說明。
本畫面由信望愛資訊中心之CBOL計畫產生，歡迎連結，無須申請。CBOL計畫之資料版權宣告採用GNU Free Documentation License。願上帝的話能建造每一位使用這系統的人，來榮耀祂自己的名。