約書亞記 線上收聽:中文和合本 現代中文譯本修訂版 現代台語 台語聖經 客語 福州話 希伯來文讀經 下載檔案 關於語音聖經
23 約書亞ê遺言
上主已經hō͘以色列人安靜，無kah四箍圍所有ê對敵交戰，已經經過真chē日，約書亞mā年老，有歲à。
2 Hit時，約書亞to̍h叫以色列人民、in ê長老kah in ê族長、in ê審判官、in ê官長，所有ê人lóng來，對in講：「我已經歲壽chē年老。
3 上主—lín ê上帝因為lín ê緣故，對hiahê國所行一切ê tāichì，lín有看tio̍h，因為替lín交戰ê是上主—lín ê上帝。
4 所chhun chiahê國，以及我所消滅ê hiahê國，tùi約旦河到大海，ǹg日落ê所在，我已經分hō͘ lín ta̍k支族做產業。
5 上主—lín ê上帝ē tùi lín ê面前kā in趕走，mā beh tùi lín ê頭前kā in趕散，lín to̍h ē得tio̍h in ê地做產業，照上主—lín ê上帝所對lín講ê。
6 「所以，lín tio̍h大大壯膽，執守來行摩西律法ê冊一切所記載ê，m̄ thang離開祂來偏左á是偏右。
7 Τī lín中間所chhun hiahê國，lín m̄ thang kah伊參插，m̄ thang提起in hiahê神明ê名，m̄ thang hō͘人kí in來chiùchōa，mā m̄ thang kā伊服事，m̄ thang kā伊跪拜；
8 總是，tio̍h照lín到今á日所行ê，kah上主—lín ê上帝結聯。
9 因為上主已經用大koh強ê國kā in tùi lín ê面前趕出去，到今á日，lóng無一个人ē tàng tī lín ê面前khiā-tiâu。
10 Lín一个人beh趕逐一千人，因為替lín交戰ê是上主—lín ê上帝，照祂所對lín講ê。
11 Lín tio̍h kakī 大大謹慎，疼上主—lín ê上帝。
12 「Lín若略á倒退，kah存tī lín中間所chhun hiahê人民結聯，kah in結親，做伙往來，
13 lín tio̍h確實知，上主—lín ê上帝一定無beh koh kā hiahê人民tùi lín ê面前趕出去；總是，in beh成做lín ê羅網活tauh，phah lín身軀ê箠，目chiu 內ê刺，一直到lín tī上主—lín ê上帝所賞賜hō͘ lín chitê好ê地滅亡。
14 「你看，我今á日beh行世間人所tio̍h行ê路，lín一心一意知影，上主—lín ê上帝所應允賜福hō͘ lín ê話，無一句落空，lóng tī lín ê身上應驗，其中無落空kah一項。
15 上主—lín ê上帝所應允一切ê福氣，án怎臨到lín ê，上主mā beh照ánne hō͘ ta̍k種ê災禍臨到tī lín中間，一直到祂tī上主—lín ê上帝所賞賜hō͘ lín chitê好ê地kā lín滅亡。
16 Lín若違背上主—lín ê上帝所命令lín ê約，去服事別个神明，kā伊跪拜，上主ê受氣to̍h ē對lín發出，lín會真緊tī祂所賞賜hō͘ lín好ê地滅亡。」
各聖經譯本著作權如版權說明。
本畫面由信望愛資訊中心之CBOL計畫產生，歡迎連結，無須申請。CBOL計畫之資料版權宣告採用GNU Free Documentation License。願上帝的話能建造每一位使用這系統的人，來榮耀祂自己的名。