申命記 線上收聽:中文和合本 現代中文譯本修訂版 現代台語 台語聖經 客語 福州話 希伯來文讀經 下載檔案 關於語音聖經
30 復興kah幸福ê條件
「Chiahê tāichì to̍h是我所排列tī你ê面前ê祝福kah咒詛,將來ē到tī你,你tī上主—你ê上帝所趕你到ê列國中,
2 你kah你ê kiáⁿ孫若盡心盡性歸向上主—你ê上帝,遵thàn祂ê話,照我今á日一切所命令你ê;
3 上主—你ê上帝to̍h ēhō͘你受掠ê人倒tńg來,會憐憫你,ē tùi上主—你ê上帝所四散你到ê列國,kā你聚集倒tńg來。
4 你受趕逐ê,若有tī天邊ê,上主—你ê上帝mā ētùi hia kā你聚集,tùi hia kā你chhōa tńg來。
5 上主—你ê上帝ē chhōa你入去你ê祖先所承接ê地,你mā承接它;祂mā ē好款待你,hō͘你ê人額加添比你ê祖先khah chē。
6 上主—你ê上帝ē tī你ê心kah你ê kiáⁿ孫ê心行割禮,hō͘你盡心盡性疼上主—你ê上帝,hō͘你thang得tio̍h活。
7 上主—你ê上帝ē kā這一切ê咒詛,hē tī你ê對敵kah怨恨你koh迫害你ê人ê身上。
8 你ē倒tńg去遵thàn上主ê話,行祂一切ê誡命,to̍h是我今á日所命令你ê。
9 你若遵thàn上主—你ê上帝ê話,執守chitê律法所記ê誡命律例,koh盡心盡性歸向上主—你ê上帝,
10 上主—你ê上帝to̍h ēhō͘你ê手所做一切ê tāichì,kah你ê身軀所生ê,chengseⁿ所出ê,土地所出ê,充足kah有chhun,因為上主beh koh歡喜你,kā你賜福,親像以前ánne歡喜你ê祖先。
11 「因為我今á日所命令你ê誡命,m̄是你所做bōe到,mā m̄是tī遠遠。
12 M̄是tī天頂,致使你講:『啥人為阮上天,帶來阮chia,hō͘阮聽來照ánne去行?』
13 Mā m̄是tī海外,致使你講:『啥人為阮過海帶來阮chia,hō͘阮聽來照ánne去行?』
14 Chitê話kah你真近,to̍h是tī你ê嘴tī你ê心,hō͘你thang來照ánne去行。
15 「你看,我今á日有用活kah福氣,死kah災禍,排列tī你ê面前。
16 to̍h是我今á日命令你tio̍h疼上主—你ê上帝,行祂ê道路,守祂ê誡命、律例、法度,hō͘你thang活leh,加添人額,上主—你ê上帝to̍h ētī你所beh入去承接ê地,kā你賜福。
17 設使你ê心偏邪m̄遵thàn,koh受誘惑去敬拜別个神明,kā伊服事,
18 我今á日就明明kā lín講:Lín一定ē滅亡;tī你過約旦河入去承接ê地,你ê日子bē tàng久長。
19 我今á日叫天叫地對lín做見證,我用生死、祝福kah咒詛排列tī你ê面前;所以,你tio̍h揀選活命,hō͘你kah你ê kiáⁿ孫lóng ē活leh,
20 來疼上主—你ê上帝,聽祂ê話,結聯tī祂,因為祂是你ê活命,你ê日子久長mā在tī祂。Hō͘你thang tòa tī上主對你ê祖先亞伯拉罕、以撒、雅各,chiùchōa所beh賞賜hō͘ in ê地。」
各聖經譯本著作權如版權說明。
本畫面由信望愛資訊中心之CBOL計畫產生,歡迎連結,無須申請。CBOL計畫之資料版權宣告採用GNU Free Documentation License。願上帝的話能建造每一位使用這系統的人,來榮耀祂自己的名。