利未記 線上收聽:中文和合本 現代中文譯本修訂版 現代台語 台語聖經 客語 福州話 希伯來文讀經 下載檔案 關於語音聖經
1 燒化祭ê規定
上主tùi會幕內叫摩西,kā伊講:
2 「你tio̍h吩咐以色列人講:Lín中間若有人獻禮物hō͘上主,tio̍h tùi牛群、羊群中獻chengseⁿ做禮物。
3 「伊ê禮物若tùi牛群取做燒祭,to̍h tio̍h獻一隻無缺點ê牛káng-á,tio̍h tī會幕門口獻,chiah ē tàng tī上主ê面前得tio̍h接納。
4 伊tio̍h hōaⁿ手tī燒祭ê chengseⁿ ê頭殼頂,to̍h為tio̍h伊受接納,替伊kakī 贖罪。
5 伊tio̍h tī上主ê面前thâi牛káng-á。亞倫ê kiáⁿ孫做祭司ê,tio̍h獻hitê血,kā血hiù tī會幕門口kah壇ê四箍圍。
6 伊tio̍h剝燒祭ê chengseⁿ ê皮,kā牠ê肉切做一塊一塊。
7 祭司亞倫ê kiáⁿ孫tio̍h用火hē tī壇頂,用柴排tī火ê頂面。
8 亞倫ê kiáⁿ孫做祭司ê,tio̍h kā肉塊、頭kah油,排tī壇頂火裡ê柴。
9 獨獨燒祭ê腹內kah腿,伊tio̍h用水洗清氣;祭司to̍h tio̍h kā一切lóng燒tī壇頂做燒祭,獻hō͘上主做芳芳ê火祭。
10 「伊ê禮物若tùi羊群中來做燒祭,á是綿羊,á是山羊,tio̍h用無缺點ê公ê來獻。
11 Tio̍h tī壇邊ê北pêng,tī上主ê面前kā牠thâi。亞倫ê kiáⁿ孫做祭司ê,tio̍h用伊ê血hiù tī壇ê四箍圍。
12 Tio̍h kā牠切做一塊一塊,連頭kah油,祭司tio̍h排tī壇頂火裡ê柴。
13 獨獨腹內kah腿,tio̍h用水洗清氣,祭司tio̍h kā全部lóng獻,燒tī壇頂。這是燒祭,獻hō͘上主做芳芳ê火祭。
14 「伊獻hō͘上主ê禮物,若用鳥隻做燒祭,to̍h tio̍h獻斑鴿á是粉鳥kiáⁿ做禮物。
15 祭司tio̍h帶鳥á到壇前,kā牠ê頭chūn斷,tio̍h hē tī壇邊,一直到血流kah乾chiah tī壇頂燒。
16 Koh tio̍h kā鳥á ê胿kah毛除去,hiat tī壇邊ê東pêng有火灰ê所在。
17 Tio̍h khiú鳥ê雙翼,kā伊拆開,總是,m̄ thang破hō͘它斷;祭司tio̍h kā它燒tī壇頂火裡ê柴。這是燒祭,獻hō͘上主做芳芳ê火祭。
各聖經譯本著作權如版權說明。
本畫面由信望愛資訊中心之CBOL計畫產生,歡迎連結,無須申請。CBOL計畫之資料版權宣告採用GNU Free Documentation License。願上帝的話能建造每一位使用這系統的人,來榮耀祂自己的名。