出埃及記 線上收聽:中文和合本 現代中文譯本修訂版 現代台語 台語聖經 客語 福州話 希伯來文讀經 下載檔案 關於語音聖經
36 「比撒列、亞何利亞伯，kah所有心有智慧ê人，to̍h是得tio̍h上主賞賜智慧聰明hō͘ in知來做聖所ta̍k種路用ê工ê，lóng tio̍h照上主所吩咐ê來做工。」
2 人民奉獻禮物
摩西召比撒列、亞何利亞伯kah見若心有智慧ê人來，to̍h是上主用智慧賞賜hō͘ in ê心，心受感動來做工ê。
3 In tùi摩西the̍h一切ê禮物，to̍h是以色列人為tio̍h做聖所kah內面所用ê物the̍h來獻ê。人民ta̍k早起猶原用甘心獻ê禮物，the̍h來獻hō͘上主。
4 見若做聖所ê工chiahê有智慧ê人，lóng暫停in所做ê工，
5 來對摩西講：「人民所the̍h來ê，比上主命令做ê工所tio̍h用ê料，過頭有chhun。」
6 摩西出命令，in to̍hti7全營宣布，講：「無論男女lóng m̄ thang koh做啥物來獻hō͘聖所。」就ánne阻止人民無koh the̍h來。
7 因為in所有ê材料已經夠額thang做一切所tio̍h做ê工，soah有chhun。
8 建造上主ê聖幕
(出26：1-37)
In中間見若心有智慧做工ê人用十幅ê帳做會幕，chiahê帳是用過紡ê幼苧kah藍色、紫色、朱紅色ê料，mā用奇巧ê工夫織成ki-lō͘-peng來做。
9 每幅帳長二十八肘，闊四肘，帳lóng是相siâng ê寸尺。
10 Chit五幅帳，伊創hō͘ in ta̍k幅相連，hit五幅帳 mā ta̍k幅相連。
11 Tī chitê相連ê帳，路尾幅ê邊á做藍色ê鈕襻（phàn），tī hitê相連ê帳，路尾幅ê邊á mā ánne做。
12 伊tī chit領帳做五十個鈕襻，koh tī第二領帳相連ê邊á，mā做五十個鈕襻，鈕襻lóng是兩 个兩 个相對。
13 Koh做五十個金鉤，用來hō͘帳鉤相連，to̍h成做一个會幕。
14 伊koh用山羊毛織十一幅ê帳，做會幕頂ê布棚。
15 每幅帳長三十肘，闊四肘；十一幅帳lóng是相siâng ê寸尺。
16 Kā五幅帳連做一幅，koh kā六幅帳連做一幅。
17 Tī chitê相連ê帳ê路尾幅ê邊á，伊做五十個鈕襻，tī hitê相連ê路尾幅ê邊á mā做五十個鈕襻。
18 伊koh做五十個銅鉤，hō͘布棚連做一个。
19 Koh用染紅ê羊皮做布棚ê蓋（khàm），koh用海狗皮掛tī頂面。
20 伊用皂莢柴做會幕ê khiā板。
21 Khiā板長十肘，闊一肘半。
22 Ta̍k塊板有兩 个榫相對排，會幕所有ê板lóng照ánne做。
23 伊做會幕ê板，南pêng有二十塊板。
24 Τī chiahê二十塊板ê下面做四十個銀臼，一塊板ê下面有兩 个臼來穿它ê兩支榫，koh一塊板ê下面mā有兩 个臼來穿它ê兩支榫。
25 會幕ê第二面，to̍h是北面，mā做板二十塊，
26 kah in ê銀臼四十個；chitê板ê下面有兩 个臼，hitê板ê下面mā有兩 个臼。
27 會幕ê後面，to̍h是西面mā做六塊板。
28 會幕後面ê兩 个角頭，做兩塊板。
29 板ê下底長度，兩 个相仝，一直到頂面第一个環lóng是全部ê；兩 个角頭ê板lóng是ánne做。
30 有八個板kah十六個銀臼，ta̍k塊板ê下面有兩 个臼。
31 伊用皂莢柴做橫栱，為tio̍h會幕chit pêng ê板做五支，
32 為tio̍h會幕hit-pêng ê板做五支，koh為tio̍h會幕後西面ê板做五支。
33 板ê對中hit支橫栱，hō͘它tùi chit頭到hit頭。
34 板用金包起來，koh做板ê金環來套栱，栱mā用金包。
35 Koh用藍色、紫色、朱紅色ê料kah過紡ê幼苧織帳簾，chitê帳簾用奇巧ê工夫織成ki-lō͘-peng來做ê。
36 Koh用皂莢柴為tio̍h它做四支柱，用金包起來，in ê鉤是金ê，koh為tio̍h in鑄四個銀臼。
37 用藍色、紫色、朱紅色ê料kah過紡ê幼苧，用繡花ê工夫做布棚門ê門簾，
38 kah它ê五支柱，kah in ê鉤；in ê柱斗kah橫杆用金包起來，hit五個臼是銅ê。
各聖經譯本著作權如版權說明。
本畫面由信望愛資訊中心之CBOL計畫產生，歡迎連結，無須申請。CBOL計畫之資料版權宣告採用GNU Free Documentation License。願上帝的話能建造每一位使用這系統的人，來榮耀祂自己的名。