出埃及記 線上收聽:中文和合本 現代中文譯本修訂版 現代台語 台語聖經 客語 福州話 希伯來文讀經 下載檔案 關於語音聖經
35 安息日ê規定
摩西招集以色列全會眾，對in講：「上主所吩咐ê話，kah lín tio̍h行ê，to̍h是chiahê：
2 六日tio̍h做工，第七日是lín ê聖日，是大ê安息日，來服事上主。所有tī chit日做工ê，tio̍h hō͘伊死。
3 安息日hit工，tī lín ta̍k間厝內lóng m̄ thang起火。」
4 為聖幕奉獻
(出25：1-9)
摩西對以色列全會眾講：「上主所吩咐ê話，是ánne講：
5 Lín中間tio̍h the̍h禮物來獻hō͘上主，見若心願ê lóng thang the̍h來，做獻hō͘上主ê禮物，to̍h是金、銀、銅，
6 藍色、紫色、朱紅色ê料，幼苧、山羊毛、
7 染紅ê羊káng皮，海狗皮, 皂莢柴，
8 點燈ê油，thang做抹油ê kah香ê芳料，
9 紅瑪瑙kah別種ê寶石，thang鑲tī 祭司服kah捕褂。」
10 聖幕ê器物
(出39：32-43)
「Lín中間見若心有智慧ê，lóng tio̍h來做上主一切所吩咐ê：
11 to̍h是會幕，它ê布棚kah它ê蓋、它ê鉤、它ê板、它ê橫栱、它ê柱、它ê 臼，
12 櫃kah它ê槓，施恩所kah遮閘ê帳簾，
13 桌á kah它ê槓，kah伊ê器具，kah排列ê餅，
14 點光ê燈台kah它ê器具，燈盞kah點光ê油，
15 香壇kah它ê槓，抹油ê kah香ê芳香，以及會幕門ê門簾，
16 燒祭ê壇kah它銅ê網，kah它ê槓，以及它所有ê器具，洗盪ê盆kah它ê座，
17 埕ê帳帷kah伊ê柱，in ê臼kah場門ê門簾，
18 會幕所釘（tèng）ê釘kah埕所釘ê釘，kah in ê索，
19 手工幼ê衫褲，tī聖所穿來服事ê，to̍h是祭司亞倫ê聖衫 kah伊ê kiáⁿ ê衫，穿來擔當祭司ê職。」
20 人民ê奉獻
以色列全會眾tùi摩西ê面前出去。
21 見若受感動，tùi心內歡喜ê lóng來the̍h禮物獻hō͘上主，用來做會幕ê工kah一切ê路用，mā用來做聖衫。
22 見若出tī心所歡喜ê，chapo͘ kah chabó͘ lóng來，ta̍k个kā金器，to̍h是胸前ê pín針、耳鉤、phah印ê手指kah手環。這是ta̍k人kā伊ê禮物獻hō͘上主。
23 見若人有藍色、紫色、朱紅色ê料、幼苧、山羊毛、染紅ê羊káng皮、海狗皮lóng the̍h來。
24 見若獻銀kah銅做禮物ê，lóng the̍h來獻hō͘上主；見若有皂莢柴thang做啥物路用ê mā the̍h來獻。
25 見若心內有智慧ê chabó͘人親手紡紗，kā所紡ê藍色、紫色、朱紅色ê布料kah幼苧lóng the̍h來獻。
26 見若有智慧ê心受感動ê chabó͘人，就紡山羊毛。
27 Chiahê頭人kā紅瑪瑙kah別種ê寶石，thang鑲tī祭司服kah捕褂ê，lóng the̍h來獻。
28 Koh the̍h香料kah thang用它來點燈ê油，做抹油ê，做香ê芳料。
29 以色列人無論男女，見若心歡喜獻禮物hō͘上主ê，lóng歡喜the̍h禮物來獻，做上主交託摩西所kā in吩咐去做一切ê工。
30 造聖幕ê師傅
(出31：1-11)
摩西對以色列人講：「Lín看，偤大ê支族戶珥ê孫，烏利 ê kiáⁿ比撒列，上主已經指名揀召伊，
31 koh用上帝ê靈充滿伊，hō͘伊有智慧，有聰明，有智識，會做ta̍k種ê工，
32 會想出奇巧ê工夫來做金、銀、銅hiahê物，
33 mā ē彫刻寶石來鑲，mā ē雕刻柴，會做ta̍k種奇巧ê工。
34 Koh hō͘伊kah但ê支族，A-hi-sat-boat ê kiáⁿ亞何利亞伯，心有靈竅，ē教示人。
35 上帝用智慧充滿chiahê人ê心，hō͘ in ē做ta̍k種ê工，無論雕刻ê工，奇巧ê工，用藍色、紫色、朱紅色ê料kah幼苧，繡花ê，織布ê kah ta̍k種ê工lóng ē做，mā ē想出奇巧ê工夫。」
各聖經譯本著作權如版權說明。
本畫面由信望愛資訊中心之CBOL計畫產生，歡迎連結，無須申請。CBOL計畫之資料版權宣告採用GNU Free Documentation License。願上帝的話能建造每一位使用這系統的人，來榮耀祂自己的名。