啟示錄 線上收聽:中文和合本 現代中文譯本修訂版 現代台語 台語聖經 台語(長老會傳播中心授權) 客語 現代客語 福州話 粵語和合本 希臘文(WH-NT) 下載檔案 關於語音聖經
17 Ba-bú-lông kah Béng-siù
Hiahê the̍h chhit tè óaⁿ ê chhit-ê thiⁿ-sài, kî-tiong chi̍t-ê lâi kah góa kóng-ōe, kóng, " Lâi, góa beh hō͘ lí khòaⁿ hit-ê tōa îm-hū, to̍h-sī khí-chō tī chin-chē tiâu hô hit-ê tōa siâⁿ só͘ tio̍h siū ê sím-phòaⁿ.
2 Tē chiūⁿ ê kun-ông bat kah i kiâⁿ kan-îm, tē-chiūⁿ ê chū-bîn mā í-keng bat lim i îm-loān ê chiú, lim kah chiú-chùi. "
3 Góa siū Sèng Sîn kám-tōng, hō͘ thiⁿ-sài chhōa-khì khòng-iá. Góa ū khòaⁿ tio̍h chi̍t-ê chabó͘ lâng, i khiâ chi̍t chiah chu-âng sek koh sī kui seng-khu lóng ū siat-to̍k miâ-hō ê béng-siù; hit chiah béng-siù ū chhit-ê thâu, cha̍p ki kak.
4 Chit-ê chabó͘ lâng chhēng chí-sek kah chu-âng sek ê saⁿ, kui seng-khu chng kah lóng sī kim, pó-chio̍h kah chin-chu. I ê chhiú-.ni̍h phâng kim poe, té-móa hiahê khó-ò͘ⁿ ê mi̍h kah îm-loān ê ù-òe.
5 I ê thâu-hia̍h siá chi̍t-ê ū ún-ba̍t ì-sù ê miâ, to̍h-sī " Tōa Ba-bú-lông, tē-chiūⁿ ê îm-hū kah khó-ò͘ⁿ ê mi̍h ê lāu-bú. "
6 Góa khòaⁿ tio̍h hit-ê chabó͘ lâng teh lim sìn-tô͘ kah ūi tio̍h I-é-su chò kiàn-chèng lâi sûn-kàu ê lâng ê hoeh, lim kàu chùi. Góa khòaⁿ tio̍h i ê sî chiū tōa tio̍h-kiaⁿ.
7 Hitê thiⁿ-sài kā góa kóng, " Lí án-chóaⁿ teh tio̍h-kiaⁿ? Góa beh kā chit-ê chabó͘ lâng kah i só͘ khiâ hit chiah ū chhit-ê thâu-khak kah cha̍p ki kak ê béng-siù ê pì-bi̍t kā lí kóng.
8 Lí só͘ khòaⁿ-.tio̍h ê hit chiah béng-siù, i khah chá ū teh oa̍h, chitmá bô teh oa̍h, i teh beh koh tùi bô-té chhim kheⁿ khí-.lâi, khì siū chòe-āu ê bia̍t-bông. Tē chiūⁿ hiahê tùi chhòng-sè í-lâi miâ bô kì tī oa̍h-miā-chheh ê lâng, khòaⁿ tio̍h hit chiah béng-siù ē tio̍h-kiaⁿ, in-ūi chit chiah béng-siù khah chá ū teh oa̍h, chitmá bô teh oa̍h, chiong-lâi ē koh-chài chhut-hiān.
9 " Tùi chit-tiám su-iàu ēng tì-hūi lâi lí-kái. Hit chhit-ê thâu-khak to̍h-sī chabó͘ lâng só͘ chē ê chhit chō soaⁿ, mā sī chhit-ê ông.
10 Kî-tiong gō͘-ê í-keng tó lo̍h-.khì, chi̍t-ê hiān-chāi iáu chûn-chāi, lēng-gōa chi̍t-ê iáu-bōe kàu; i nā lâi-kàu, mā sī chù-tiāⁿ chiām-sî chûn-chāi.
11 Hitê khah chá ū teh oa̍h, chitmá bô teh oa̍h ê béng-siù, to̍h-sī tē-peh-ê ông, mā sī hit chhit-ê ông tiong-kan ê chi̍t-ê, i mā tio̍h khì siū húi-bia̍t.
12 " Lí só͘ khòaⁿ-.tio̍h ê cha̍p ki kak, to̍h-sī hit cha̍p-ê iáu m̄ bat thóng-tī ê kun-ông, to̍k-to̍k in ē tit tio̍h ông-koân, lâi kah hit chiah béng-siù chò-hóe thóng-tī chi̍t-tiám-cheng.
13 Chit cha̍p-ê ông lóng tông-ì kā kakī ê châi-lêng kah koân-pèng kau hō͘ hit chiah béng-siù.
14 In beh kah iûⁿ-ko kau-chiàn, iûⁿ-ko ē chiàn-iâⁿ, in-ūi I sī bān-chú ê Chú, bān-ông ê Ông. Kah I chò-hóe ê hiahê siū ho͘-tiàu, siū kéng-soán ê tiong-si̍t sìn-tô͘ mā ē tek-sèng. "
15 Hitê thiⁿ-sài koh kā góa kóng, " Lí só͘ khòaⁿ tio̍h hit-ê îm-hū teh chē ê hô-liû, to̍h-sī chí ta̍k-ê bîn-cho̍k, ta̍k-ê jîn-bîn, ta̍k-ê pang-kok kah ta̍k chióng gí-giân ê lâng.
16 Lí só͘ khòaⁿ-.tio̍h ê hit cha̍p ki kak kah hit chiah béng-siù ē oàn-hūn hit-ê îm-hū, mā ē chhiúⁿ-toa̍t i ê châi-bu̍t, hō͘ i thǹgpaktheh. In koh ē chia̍h i ê bah, ēng hóe kā i sio-bia̍t.
17 In-ūi Siōng-tè hō͘ hit cha̍p-ê ông ê sim-lāi ū chit khoán ê ì-liām, lâi si̍t-hêng I ê chí-ì, hō͘ in tâng-sim kā in ê kok kau hō͘ béng-siù, it-ti̍t kàu Siōng-tè ê ōe èng-giām.
18 Lí só͘ khòaⁿ tio̍h hit-ê chabó͘ lâng, to̍h-sī teh chiáng-koán tē-chiūⁿ hiahê kun-ông ê hit chō tōa siâⁿ. "
各聖經譯本著作權如版權說明。
本畫面由信望愛資訊中心之CBOL計畫產生,歡迎連結,無須申請。CBOL計畫之資料版權宣告採用GNU Free Documentation License。願上帝的話能建造每一位使用這系統的人,來榮耀祂自己的名。