雅歌 線上收聽:中文和合本 現代中文譯本修訂版 現代台語 台語聖經 客語 福州話 希伯來文讀經 下載檔案 關於語音聖經
6 [chèng chabó͘ gín'á] Lí chit-ê lú-kài tiong siōng súi ê, chhiáⁿ lí kā góa kóng lí ê lông-kun khì tó-ūi? Lí ê lông-kun oa̍t tńg-khì tó-ūi? Thang hō͘ goán kah lí chò-hóe khì chhōe i.
2 [siàu-lí] Góa ê lông-kun lo̍h-khì i ê hn̂g, khì-kàu phang hoe kui pâi ê só͘-chāi. I tī hn̂g lāi teh chhī iûⁿ-kûn, koh bán pek-ha̍p hoe.
3 Góa sio̍k góa ê lông-kun, góa ê lông-kun mā sio̍k góa; i tī pek-ha̍p hoe ê tiong-kan teh chhī iûⁿ-kûn.
4 [chùn-lâm] Góa só͘ thiàⁿ ê, lí súi kah ná chhin-chhiūⁿ Til-chah, hó kah ná chhin-chhiūⁿ Ê-lú-sa-lèm, ui-gî kah ná chhin-chhiūⁿ gia̍h tōa kî ê kun-tūi.
5 Lí ê ba̍k-chiu m̄ thang khòaⁿ góa, in-ūi in ē toa̍t-khì góa ê sim-sîn; lí ê thâu-mn̂g chhin-chhiūⁿ soaⁿ-iûⁿ kui tīn, tó tī Gi-lia̍t ê soaⁿ piⁿ.
6 Lí ê chhùi-khí chhin-chhiūⁿ kui tīn ê iûⁿ-bó, seng-khu sé chheng-khì khí-.lâi; ta̍k chiah lóng ū siang-seⁿ kiáⁿ, bô kah chi̍t chiah sit-lo̍h i ê kiáⁿ.
7 Lí ê chhùi-phóe tī phè lāi, chhin-chhiūⁿ peh khui ê sia̍h-liû.
8 Ū la̍k-cha̍p-ê ông-hō͘, peh-cha̍p-ê pîn-hui, mā ū sǹg bē liáu ê kiong-lí.
9 Góa ê hún-chiáu, góa ê sûn-choân ê sī to̍k-it ê; i sī in lāu-bú to̍k-seⁿ ê, sī seⁿ i ê só͘ te̍k-pia̍t thiàⁿ ê. Chiahê chabó͘ gín'á khòaⁿ-.tio̍h, chiū oló i ū hok-khì; ông-hō͘ kah pîn-hui khòaⁿ-.tio̍h, mā oló i.
10 Hitê ǹg gōa-bīn khòaⁿ chhut-.khì, chhin-chhiūⁿ chá-khí sî ê kng, koh súi kah ná chhin-chhiūⁿ goe̍h-niû, chheng-kiat kah ná chhin-chhiūⁿ ji̍t-thâu, ui-gî kah ná chhin-chhiūⁿ gia̍h tōa kî ê kun-tūi ê, i sī siáⁿ lâng?
11 Góa lo̍h-khì hu̍t-thô hn̂g, beh khòaⁿ soaⁿ-kok tiong chheⁿ-chhùi ê si̍t-bu̍t, beh khòaⁿ phû-tô hoat íⁿ á-bōe, sia̍h-liû khui hoe á-bōe.
12 Tī bô phah-sǹg ê tiong-kan, góa ê sim-sîn kā góa an-tì tī chun-kùi ê lâng ê chhia tiong.
13 [chèng chabó͘ gín'á] Tò tńg-.lâi, Su-la-mih( Chù, " Ngá-ko " tiong lí-sióng chêng-jîn ê hòa-sin. )! Tò tńg-.lâi, hō͘ goán thang khòaⁿ tio̍h lí. [siàu-lí] Lín ūi siáⁿ-mi̍h beh khòaⁿ Su-la-mih, chhin-chhiūⁿ khòaⁿ Ma-há-niam ( Chù, Iol-tàn hô tang ê chi̍t-ê só͘-chāi, in-ūi Iâ-kop kah thiⁿ-sài siong-hōe lâi hō-miâ, tī Ga̍t pian-kéng, pun hō͘ Lē-bī lâng. )ê thiàu-bú?
各聖經譯本著作權如版權說明。
本畫面由信望愛資訊中心之CBOL計畫產生,歡迎連結,無須申請。CBOL計畫之資料版權宣告採用GNU Free Documentation License。願上帝的話能建造每一位使用這系統的人,來榮耀祂自己的名。