箴言 線上收聽:中文和合本 現代中文譯本修訂版 現代台語 台語聖經 客語 福州話 希伯來文讀經 下載檔案 關於語音聖經
15 Un-hô ê ìn-tap ē hō͘ siū-khì soah; kóng-ōe hoâiⁿ-pà ē kek-khí siū-khì.
2 Tì-hūi lâng ê chi̍h gâu kóng tì-sek; gōng lâng ê chhùi thò͘-chhut gû-gōng.
3 Siōng-chú ê ba̍k-chiu ta̍k só͘-chāi teh khòaⁿ; hó-pháiⁿ lóng ū teh kàm-chhat.
4 Sûn-liông ê chi̍h sī oa̍h-miā ê chhiū; nā-sī o͘-pe̍h-kóng chiū ē sún-siong sim-sîn.
5 Gōng lâng khòaⁿ-khin lāu-pē ê kàu-tok; goān-ì siū chek-pī ê lâng ē tit tio̍h kiàn-sek.
6 Gī lâng ê chhù lāi ū chin chē châi-pó; pháiⁿ lâng só͘ thàn ê ē hām-hāi kakī.
7 Tì-hūi lâng ê chhùi-tûn soan-iông tì-sek; gōng lâng ê sim lóng bô ánne.
8 Pháiⁿ lâng hiàn chè sī Siōng-chú só͘ thó-ià; chèng-ti̍t lâng ê kî-tó sī I só͘ hoaⁿ-hí.
9 Pháiⁿ lâng ê lō͘ sī Siōng-chú só͘ thó-ià ê; to̍k-to̍k tui-kiû kong-gī ê lâng ē tit I thiàⁿ.
10 Pàng-sak chiàⁿ lō͘ ê lâng ē siū chin tāng ê chek-hoa̍t; oàn-hūn chek-pī ê lâng ē tì-kàu sí-bông.
11 Im-hú kah bia̍t-bô lóng tī Siōng-chú ê ba̍k-chiu chêng, hô-hòng sè-kan lâng ê sim kám bô koh khah siū I kàm-chhat?
12 Bú-bān ê lâng bô ài siū chek-pī, mā bô beh lâi kìⁿ tì-hūi ê lâng.
13 Khoài-lo̍k ê sim ē hō͘ bīn chhiò-chhiò; iu-būn ê sim ē sún-siong sim-sîn.
14 Chhong-bêng lâng ē choan-sim cháu-chhōe tì-sek; gōng lâng ê chhùi kantaⁿ ì-ài gû-gōng.
15 Khùn-khó͘ ê lâng ji̍t-chí lóng ū chai-hō; sim khoài-lo̍k ê jîn-iàn-se̍k bô tn̄g.
16 Hó-gia̍h mā ū chhau-hoân, put-jû sànchhiah lâi kèng-ùi Siōng-chú.
17 Chia̍h chhài-se, tāi-ke sio-thiàⁿ, iâⁿ-kòe chia̍h pûi gû-á, tāi-ke sio oàn-hūn.
18 Pháiⁿ sèng-tē ê lâng ē jiá-khí oan-ke; bô khoài siū-khì ê lâng ē hō͘ sio-cheⁿ soah.
19 Pìn-tōaⁿ lâng ê lō͘ ná chhin-chhiūⁿ chhì-phè ê lî-pa; chèng-ti̍t lâng ê lō͘ chiâⁿ-chò tōa lō͘.
20 Tì-hūi ê kiáⁿ hō͘ lāu-pē hoaⁿ-hí; gōng lâng khòaⁿ-khin kakī ê lāu-bú.
21 Bû-ti ê lâng lia̍h gû-gōng chò hoaⁿ-hí; bêng-lí ê lâng chiàu chèng-ti̍t lâi kiâⁿ.
22 Bô chò-hóe chham-siông ê kè-ōe ē sit-pāi; chin chē bô͘-sū chò-hóe kè-ōe ē sêng-kong.
23 Lâng ê chhùi ìn-tap ha̍p-gî chiū ē hoaⁿ-hí; ha̍p sî ê ōe si̍t-chāi chin hó!
24 Tì-hūi ê lâng ū oa̍h-miā ê lō͘ thang kiâⁿ, chiah ē-tàng lī-khui im-hú.
25 Siōng-chú ē thiah-húi kiau-ngō͘ ê lâng ê chhù, ē pó-hō͘ kóaⁿ-hū ê tē-kài.
26 Pháiⁿ ê kè-bô͘ sī Siōng-chú só͘ thó-ià; m̄ koh, hó ê ōe tī I gán-tiong sī chheng-kiat.
27 Tham-châi ê lâng ē hām-hāi kakī ê ke, oàn-hūn o͘-se ê lâng ē tit tio̍h oa̍h-miā.
28 Gī lâng ê sim siūⁿ liáu chiah ìn; pháiⁿ lâng ê chhùi thò͘-chhut pháiⁿ tāi.
29 Siōng-chú lī-khui pháiⁿ lâng hn̄g-hn̄g; chóng-.sī, I thiaⁿ gī lâng ê kî-tó.
30 Ba̍k-chiu ê kng-bêng hō͘ sim hoaⁿ-hí; hó siau-sit ē chu-jūn kin-kut.
31 Chun-thàn chek-pī ê lâng ē tit tio̍h oa̍h-miā, ē tòa tī tì-hūi lâng ê tiong-kan.
32 M̄-thiaⁿ kéng-kài ê lâng to̍h-sī khòaⁿ-khin kakī; chóng-.sī, chun-thàn chek-pī ê lâng ē tit tio̍h kiàn-sek.
33 Kèng-ùi Siōng-chú sī tì-hūi ê kà-sī; seng khiam-pi chiah ū êng-kng.
各聖經譯本著作權如版權說明。
本畫面由信望愛資訊中心之CBOL計畫產生，歡迎連結，無須申請。CBOL計畫之資料版權宣告採用GNU Free Documentation License。願上帝的話能建造每一位使用這系統的人，來榮耀祂自己的名。