箴言 線上收聽:中文和合本 現代中文譯本修訂版 現代台語 台語聖經 客語 福州話 希伯來文讀經 下載檔案 關於語音聖經
10 Só͘-lô-móng ê Chim-giân
Só͘-lô-móng ê Chim-giân, tì-hūi ê kiáⁿ hō͘ lāu-pē hoaⁿ-hí; gû-gōng ê kiáⁿ hō͘ lāu-bú iu-būn.
2 Put-gī ê chîⁿ-châi lóng bô lī-ek; chí ū kong-gī ē kiù lâng thoat-lī sí-bông.
3 Siōng-chú bô hō͘ gī lâng tú tio̍h iau-gō; pháiⁿ lâng só͘ him-bō͘ ê tāichì, I bô hō͘ i sêng-kong.
4 Chhiú pîntōaⁿ ê lâng ē tú tio̍h sànchhiah; chhiú kut-la̍t ê lâng ē tit tio̍h hó-gia̍h.
5 Joa̍h-thiⁿ chek-chū bí-niûⁿ ê lâng sī tì-hūi ê kiáⁿ; siu-koah ê sî ài-khùn ê lâng sī pāi-ke ê kiáⁿ.
6 Hok-khì lîm-kàu gī lâng ê thâu-khak; kiông-pō am-khàm pháiⁿ lâng ê chhùi.
7 Gī lâng ê kì-liām siū oló; pháiⁿ lâng ê miâ it-tēng sī chhàu.
8 Sim lāi ū tì-hūi ê lâng ē thiaⁿ siū bēng-lēng; chhùi kóng gōng ōe ê lâng ē sit-pāi.
9 Kiâⁿ chèng-ti̍t lō͘ ê lâng kiâⁿ-ta̍h an-ún; kiâⁿ oan-khiau lō͘ ê lâng lō͘-hiān goân-hêng.
10 Sái ba̍k-bóe lâi hōe-ì ê lâng hō͘ lâng iu-būn; chhùi kóng gōng ōe ê lâng ē sit-pāi.
11 Gī lâng ê chhùi sī oa̍h-miā ê chúi-chôaⁿ; kiông-pō am-khàm pháiⁿ lâng ê chhùi.
12 Oàn-hūn ē jiá-khí sio-cheⁿ; thiàⁿ-sim ē jia-khàm só͘-ū ê kòe-sit.
13 Tī bêng-lí ê lâng chhùi lāi chhōe tio̍h tì-hūi; bû-ti ê lâng ê kha-chiah-phiaⁿ ū koái-á piān-piān.
14 Tì-hūi ê lâng chek-chū kiàn-sek; gōng lâng ê chhùi ē chin kín sit-pāi.
15 Hó-gia̍h lâng ê châi-bu̍t sī i kian-kò͘ ê siâⁿ; sànchhiah lâng ê khiàm-khoeh sī i sit-pāi ê goân-in.
16 Gī lâng ê lô-khó͘ tì-sú ū oa̍h-miā; pháiⁿ lâng só͘ thàn ê tì-sú ū chōe.
17 Thiaⁿ siū khoàn-kài sī kiâⁿ tī oa̍h-miā ê lō͘; khì-sak chek-pī to̍h-sī kiâⁿ bê-lō͘.
18 Am-khàm oàn-hūn ê lâng, chhùi kóng pe̍h-chha̍t; húi-pòng lâng ê lâng sī gōng lâng.
19 Kāu-ōe ê lâng bē bián ū kòe-sit; iok-sok chhùi-chi̍h ê lâng sī ū tì-hūi.
20 Gī lâng ê chi̍h chhin-chhiūⁿ bûn-gîn; pháiⁿ lâng ê sim bô siáⁿ-mi̍h kè-ta̍t.
21 Gī lâng ê chhùi pôe-ióng chin chē lâng; gōng lâng in-ūi bû-ti lâi sí.
22 Siōng-chú ê sù-hok hō͘ lâng hó-gia̍h; lāi-bīn bô chham iu-būn.
23 Gû-gōng ê lâng lia̍h kiâⁿ pháiⁿ chò kún-chhiò; chóng-.sī, bêng-lí ê lâng lia̍h tì-hūi chò hoaⁿ-hí.
24 Pháiⁿ lâng só͘ kiaⁿ ê tāichì ē lîm-kàu i; gī lâng só͘ ì-ài ê tāichì ē tit tio̍h ín-chún.
25 Kông hong chi̍t ē chhoe kòe, pháiⁿ lâng kui tī bô; gī lâng sī éng-oán ê tē-ki.
26 Lâng chhe pîntōaⁿ lâng chò tāichì, ná chhin-chhiūⁿ chhùi-khí tú tio̍h chhò͘, ba̍k-chiu tú tio̍h hóe-ian.
27 Kèng-ùi Siōng-tè chiū ē ke-thiⁿ ji̍t-chí; chóng-.sī, pháiⁿ lâng ê nî-hòe ē kiám-chió.
28 Gī lâng ê ǹg-bāng sī hoaⁿ-hí; pháiⁿ lâng ê him-bō͘ sī bô chhái-kang.
29 Siōng-chú ê lō͘ tùi chèng-ti̍t ê lâng lâi kóng sī siâⁿ-pó, tùi kiâⁿ pháiⁿ ê lâng lâi kóng sī húi-bia̍t.
30 Gī lâng éng-oán bô î-sóa; pháiⁿ lâng bē tàng tī tē-chiūⁿ khiā-khí.
31 Gī lâng ê chhùi seⁿ-chhut tì-hūi; o͘-pe̍h-kóng ê chi̍h ē hông koah-tn̄g.
32 Gī lâng ê chhùi-tûn chai thang hō͘ lâng hoaⁿ-hí; pháiⁿ lâng ê chhùi o͘-pe̍h kóng-ōe.
各聖經譯本著作權如版權說明。
本畫面由信望愛資訊中心之CBOL計畫產生,歡迎連結,無須申請。CBOL計畫之資料版權宣告採用GNU Free Documentation License。願上帝的話能建造每一位使用這系統的人,來榮耀祂自己的名。