詩篇 線上收聽:中文和合本 現代中文譯本修訂版 現代台語 台語聖經 客語 福州話 希伯來文讀經 下載檔案 關於語音聖經
77 Khó͘-lān Sî ê An-ùi
( A-sah ê si, chiàu E-to-tòng ê chò-hoat, kau hō͘ ga̍k-koaⁿ. )Góa beh tùi Siōng-tè chhut siaⁿ kiû-kiò; góa tùi Siōng-tè chhut siaⁿ, I ē àⁿ hīⁿ-khang lâi thiaⁿ.
2 Tī góa hoān-lān ê ji̍t, góa cháu-chhōe Chú; tī àm-sî, góa gia̍h-khí chhiú, bô thêng kî-tó; góa ê sim m̄-khéng siū an-ùi.
3 Góa siàu-liām Siōng-tè, chiū iu-būn; góa tiām-tiām siūⁿ, sim-sîn soah hūn-.khì. [Sè-la̍h]
4 Lí hō͘ góa ê ba̍k-chiu bô chi̍t sî kheh; góa hoân-ló kàu lóng bē kóng-ōe.
5 Góa tui-liām kó͘-chá ê ji̍t-chí, to̍h-sī ke̍k-chá ê nî-ji̍t.
6 Góa siūⁿ-khí góa àm-sî ê si-koa, góa bong sim-koaⁿ kakī mn̄g; góa ê sim-sîn mā siông-sè séng-chhat.
7 Chú kám ē éng-oán pàng-sak góa? I kám ē bô koh si un hō͘ góa?
8 I ê chû-ài kám ē éng-oán siau-sit? I ê èng-ín kám ē tāi-tāi hùi-tû?
9 Siōng-tè kám ē bē kì-tit si un? Kám ē in-ūi siū-khì soah that-ba̍t I ê chû-pi? [Sè-la̍h]
10 Góa kóng: Che sī góa ê loán-jio̍k, Chì-koân-.ê chhun-chhut chiàⁿ chhiú ê nî-ji̍t, góa beh siàu-liām I.
11 Góa beh kóng-khí Siōng-chú ê chok-ûi; siàu-liām I chá-chêng ê sîn-jiah.
12 Góa beh chhim-su Lí ê chok-ûi, tiām-tiām siūⁿ Lí ê só͘ chò.
13 Siōng-tè ah, Lí ê tō-lō͘ sîn-sèng; ū siáⁿ-mi̍h sîn-bêng chhin-chhiūⁿ Lí hiah úi-tāi?
14 Lí sī kiâⁿ kî-sū ê Siōng-tè; Lí bat tī bān-bîn ê tiong-kan hián-bêng Lí ê koân-lêng.
15 Lí bat ēng Lí ê chhiú sio̍k-hôe Lí ê chú-bîn, to̍h-sī Iâ-kop kah Iô-sé-huh ê kiáⁿ-sun. [Sè-la̍h]
16 Siōng-tè ah, chiahê chúi kìⁿ tio̍h Lí, chiahê chúi kìⁿ tio̍h Lí chiū lóng kiaⁿ-hiâⁿ; chhim-ian mā phi̍h-phi̍h chhoah.
17 Ba̍t hûn piàⁿ-lo̍h hō͘-chúi, kiong-chhong chhut siaⁿ; Lí ê chìⁿ sì-kè siā.
18 Tī kńg-lê-á hong lāi-bīn ū Lí tân-lûi ê siaⁿ; sihnà ê kng sih kàu choân sè-kài; tē phi̍h-phi̍h chhoah koh tín-tāng.
19 Lí ê tō-lō͘ tī hái tiong, Lí ê lō͘-kèng tī tōa-chúi tiong; Lí ê kha-jiah bô lâng ē chai.
20 Chá-chêng Lí ēng Mô͘-se kah A-lông ê chhiú, chhōa Lí ê chú-bîn chhin-chhiūⁿ iûⁿ-kûn.
各聖經譯本著作權如版權說明。
本畫面由信望愛資訊中心之CBOL計畫產生,歡迎連結,無須申請。CBOL計畫之資料版權宣告採用GNU Free Documentation License。願上帝的話能建造每一位使用這系統的人,來榮耀祂自己的名。