詩篇 線上收聽:中文和合本 現代中文譯本修訂版 現代台語 台語聖經 客語 福州話 希伯來文讀經 下載檔案 關於語音聖經
38 Lo̍h-lān ê Lâng ê Kî-tó
( Ta-bi̍t ê kì-liām si. )Siōng-chú ah, kiû Lí m̄ thang tī siū-khì tiong chek-pī góa, m̄ thang tī tōa siū-khì tiong kéng-kài góa.
2 In-ūi Lí ê chìⁿ siā tio̍h góa ê seng-khu, Lí ê chhiú tāng-tāng kā góa chhi̍h tiâu-.leh.
3 Lí ê siū-khì hō͘ góa ê seng-khu bô chi̍t ūi oân-choân; góa ê chōe-kò tì-sú góa ê kut-thâu mā bô pêng-an.
4 Góa ê chōe-ok pôaⁿ-kòe góa ê thâu-khak, chhin-chhiūⁿ tāng-tàⁿ hō͘ góa taⁿ bē khí.
5 In-ūi góa ê gû-gōng, góa ê siong nōa koh chhàu.
6 Góa thàng-thiàⁿ koh khiau-ku, kui ji̍t ai-siong.
7 In-ūi góa ê io chhin-chhiūⁿ hóe teh to̍h; góa ê seng-khu bô kah chi̍t ūi oân-choân.
8 Góa siū phah-siong, kui seng-khu bô khùi-la̍t; in-ūi góa ê sim put-an, chiū tōa-siaⁿ ai-kiò.
9 Chú ah, góa ê sim-goān lóng tī Lí ê bīn-chêng, góa ê thó͘-khùi bô tùi Lí ún-môa.
10 Góa ê sim pho̍k-pho̍k-chhéng, góa ê khùi-la̍t soe-bî, liân góa ba̍k-chiu tiong ê kng mā lī-khui góa.
11 Thiàⁿ góa ê lâng kah góa ê pêng-iú, in-ūi góa ê pháiⁿ chèng-thâu lóng siám khì piⁿ-á; góa ê chhin-chiâⁿ mā khiā hn̄g-hn̄g.
12 Hiahê siàu-siūⁿ góa ê sèⁿ-miā ê lâng siat lô-bāng; siūⁿ beh hāi góa ê lâng kóng ok-to̍k ê ōe, in kui ji̍t teh siat-kè kúi-chà ê im-bô͘.
13 Chóng-.sī, góa chhin-chhiūⁿ chhàu-hīⁿ-lâng bô thiaⁿ-.tio̍h, chhin-chhiūⁿ é-káu bô khui chhùi kóng-ōe.
14 Góa mā chhin-chhiūⁿ bô thiaⁿ-.tio̍h ê lâng, chhùi mā bô ìn-tap.
15 Siōng-chú ah, góa thèng-hāu Lí; Chú — góa ê Siōng-tè ah, Lí ē thiaⁿ góa ê kî-tó.
16 In-ūi góa bat kóng, M̄-thang hō͘ in tùi góa khoa-kháu; góa ê kha-ta̍h thu̍t khì ê sî, hō͘ in bô tùi góa kiau-ngō͘.
17 In-ūi góa hiám-hiám poa̍h-tó, góa ê iu-būn tiāⁿtiāⁿ tī góa ê bīn-chêng.
18 In-ūi góa beh jīn góa ê chōe-ok, koh ūi tio̍h góa ê chōe lâi iu-būn.
19 Chóng-.sī, góa ê tùi-te̍k chin oa̍h-tāng koh ióng-béng, bô-iân bô-kò͘ oàn-hūn góa ê lâng ke-thiⁿ ná chē.
20 Ēng pháiⁿ pò hó ê lâng kah góa chò tùi-thâu, in-ūi góa sī beh tui-kiû hó.
21 Siōng-chú ah, m̄ thang pàng-sak góa! Góa ê Siōng-tè ah, m̄ thang lī-khui góa hn̄g-hn̄g!
22 Chú — góa ê Kiù-chú ah, kiû Lí kín lâi pang-chān góa!
各聖經譯本著作權如版權說明。
本畫面由信望愛資訊中心之CBOL計畫產生,歡迎連結,無須申請。CBOL計畫之資料版權宣告採用GNU Free Documentation License。願上帝的話能建造每一位使用這系統的人,來榮耀祂自己的名。