Tòa tī Ê-lú-sa-lèm ê jîn-bîn siat-li̍p Io-lâm ê soah-bóe kiáⁿ A-ha-chiah sòa-chiap i chò ông, in-ūi tòe A-la-puh lâng kàu iâⁿ ê kun-tūi, ū thâi-sí i hiahê tōa-kiáⁿ, ánne Iô-tah ông Io-lâm ê kiáⁿ A-ha-chiah chiū chò ông.
2 A-ha-chiah chē-ūi ê sî sì-cha̍p jī hòe, tī Ê-lú-sa-lèm chò ông chi̍t nî. I ê lāu-bú ê miâ kiò-chò A-tha-lí-iah, sī Om-lī ê chabó͘ sun.
3 I mā kiâⁿ A-hap ê ke ê lō͘, in-ūi i ê lāu-bú chí-hui i kiâⁿ pháiⁿ.
4 I kiâⁿ Siōng-chú só͘ khòaⁿ-chò pháiⁿ ê tāichì, chhin-chhiūⁿ A-hap ê ke, in-ūi i ê lāu-pē sí liáu-āu, ū A-hap ke ê lâng lâi kā i chí-hui, tì-sú pāi-hoāi.
5 I chun-thàn in ê kè-bô͘ kah I-su-la-el ông A-hap ê kiáⁿ Io-lâm chò-hóe khì Gi-lia̍t ê La̍h-mot kah A-lâm ông Ha-cha-el kau-chiàn.
6 A-lâm lâng phah-siong Io-lâm, i tńg-khì E-chu-le-el beh i-tī i ê siong, to̍h-sī i tī La̍h-mot kah A-lâm ông Ha-cha-el kau-chiàn ê sî só͘ siū ê siong. Iô-tah ông Io-lâm ê kiáⁿ A-cha-lí-ah lo̍h-khì E-chu-le-el, beh thàm-hóng A-hap ê kiáⁿ Io-lâm, in-ūi i ū phòa-pēⁿ.
7 A-ha-chiah lâi khòaⁿ Io-lâm chiū tú tio̍h hām-hāi, che sī chhut tī Siōng-chú ê ì-sù; in-ūi i lâi chiū kah Io-lâm chhut-.khì, tú tio̍h Nim-sī ê sun E-hú, to̍h-sī Siōng-chú só͘ boah iû, hō͘ i chián-tû A-hap ê ke ê.
8 E-hú pān A-hap ke ê chōe ê sî, tú tio̍h Iô-tah hiahê siú-léng kah A-ha-chiah hiaⁿ-tī ê kiáⁿ teh ho̍k-sāi A-ha-chiah ê, i chiū kā in thâi-sí.
9 A-ha-chiah bih tī Sa-má-lī-a, E-hú teh chhōe i, lâng kā i lia̍h-.lâi, ah i lâi-kàu E-hú hia, chiū kā i thâi-sí, lâng kā i bâi-chòng; in-ūi in kóng, i sī hit-ê choan-sim cháu-chhōe Siōng-chú ê Iô-sa-hoat ê kiáⁿ. Án-ne, A-ha-chiah ê ke chiū bô ū koân-le̍k thang pó-siú kok-ūi ê.
10
Iô-tah ê A-tha-lí-iah Thài-hō͘
( LOH 11:1-3)
A-ha-chiah ê lāu-bú A-tha-lí-iah khòaⁿ tio̍h i ê kiáⁿ í-keng sí, chiū khí-lâi kā Iô-tah ê ông-chhin choân-pō͘ châu-bia̍t.
11 Chóng-.sī, ông ê chabó͘ kiáⁿ E-ho-sí-ba, kā A-ha-chiah ê kiáⁿ Io-a-si, tùi hiahê teh beh siū thâi ê ông-chú tiong-kan thau phō chhut-.lâi, kā i kah i ê leng-bú khǹg tī khùn-pâng-.ni̍h. Iok-si-pa sī Io-lâm ông ê chabó͘ kiáⁿ, A-ha-chiah ê chí-mōe, chè-si Io-ho-iá-tah ê bó͘. I tùi A-tha-lí-iah kā i khàm ba̍t, hō͘ i bô thâi-sí Io-a-si.
12 Āu-lâi, kah in chò-hóe khǹg tī Siōng-chú ê tiān keng-kòe la̍k nî; A-tha-lí-iah koán-lí hit-ê só͘-chāi.
各聖經譯本著作權如版權說明。本畫面由信望愛資訊中心之CBOL計畫產生,歡迎連結,無須申請。CBOL計畫之資料版權宣告採用GNU Free Documentation License。願上帝的話能建造每一位使用這系統的人,來榮耀祂自己的名。
信望愛站使用cookies 技術來強化網站功能,您使用本網站,表示您同意我們使用 cookies 技術.