章節 | 現代台語2021版漢字經文 | 註釋 |
5:1 | 耶穌呼召門徒( 太 4:18-22 可 1:16-20 )有一遍,耶穌徛佇革尼撒勒湖邊,有一陣人揢倚去欲聽上帝的話。 | |
5:2 | 伊看著兩隻船停佇湖邊,掠魚的離開船啲洗網。 | |
5:3 | 其中一隻是西門的;耶穌上彼隻船,叫伊划小可離開岸,然後坐落去,對船頂教示眾人。 | |
5:4 | 耶穌講煞,對西門講:「給船划去深的所在,拋網落去掠魚。」 | |
5:5 | 西門應講:「老師,阮拼歸暝掠攏無,毋拘你都啲講啊,我就來落網。」 | |
5:6 | 𪜶一下放落去,網著真多魚,網煞強欲破去。 | |
5:7 | 𪜶搧手叫別隻船的同伴來鬥腳手。𪜶就來,將魚貯佇兩隻船,貯到滿滿煞強欲沉落去。 | |
5:8 | 西門‧彼得一下看著,就跪落去耶穌的腳前,講:「主啊,請離開我!我是一個有罪的人。」 | |
5:9 | 西門及伊的同伴因為掠著赫多魚真著驚。 | |
5:10 | 西門的同伴西庇太的子雅各及約翰嘛真著驚。耶穌給西門講:「毋免驚,對今以後,你會得著人。」 | |
5:11 | 𪜶拖船倚岸了後,將一切放咧,去隨耶穌。 | |
5:12 | 耶穌醫好痲瘋病人( 太 8:1-4 可 1:40-45 )有一遍耶穌佇一個城,佇遐有一個人歸身軀染著痲瘋。伊看著耶穌就仆落去祈求講:「主啊,你若肯,會當互我清氣。」 | |
5:13 | 耶穌伸手給伊摸,講:「我肯,互你清氣!」伊的痲瘋隨時無去。 | |
5:14 | 耶穌命令伊,講:「毋通給人講;著去互祭司驗,閣照摩西的規定,為著你有得著清氣獻祭物,通對眾人證明。」 | |
5:15 | 耶穌的名聲愈傳愈闊;歸大陣人聚集來欲聽道理,閣求伊互𪜶的病得著醫好。 | |
5:16 | 毋拘耶穌退去偏僻的所在祈禱。 | |
5:17 | 耶穌醫好半身不遂的人( 太 9:1-8 可 2:1-12 )有一日,耶穌啲教示人的時,有法利賽派的人及律法教師佇遐啲坐。𪜶是對加利利及猶太逐庄社,以及耶路撒冷來的。主的權能及耶穌同在,互伊會當醫好病人。 | |
5:18 | 彼時,有人用床扛一個半身不遂的人來,想欲扛入去下佇耶穌的面前; | |
5:19 | 毋拘因為人真多,尋無路通扛入去,就𬦰去厝頂,拆厝瓦,將彼個半身不遂的連床縋落去眾人的中間,下佇耶穌的面前。 | |
5:20 | 耶穌看見𪜶的信心,就講:「朋友啊,你的罪赦免啦。」 | |
5:21 | 許個經學教師及法利賽派的人議論講:「此個啲褻瀆上帝的是啥人?上帝以外,什麼人會當赦罪?」 | |
5:22 | 耶穌知影𪜶啲質問什麼,就對𪜶講:「是按怎恁心內啲質問? | |
5:23 | 講『你的罪赦免啦』,抑是講『起來行』,叨一項較簡單? | |
5:24 | 不過我欲互恁知人子佇地上有赦罪的權柄。」耶穌對彼個半身不遂的人講:「我給你講,起來,夯你的床,轉去恁兜!」 | |
5:25 | 彼個人隨時佇眾人的面前𬦰起來,夯伊所倒的床轉去𪜶兜,那行那歸榮光互上帝。 | |
5:26 | 眾人攏真著驚,歸榮光互上帝,心內充滿敬畏講:「阮今仔日有看著奇妙的代誌!」 | |
5:27 | 耶穌呼召利未( 太 9:9-13 可 2:13-17 )諸個代誌以後,耶穌出去,看著一個貿稅的,名叫做利未,坐佇稅關,就對伊講:「來隨我!」 | |
5:28 | 利未就放拺一切,起來隨伊。 | |
5:29 | 利未佇𪜶兜為著耶穌辦大宴席。有一大陣貿稅的以及其他的人及𪜶做夥坐桌食飯。 | |
5:30 | 有一寡法利賽派的人及屬𪜶的經學教師對耶穌的門徒埋怨,講:「是按怎恁及貿稅的以及罪人做夥飲食?」 | |
5:31 | 耶穌應講:「健康的無需要醫生,破病的才有需要。 | |
5:32 | 我來,毋是欲招義人,是欲招罪人悔改。」 | |
5:33 | 禁食的問題( 太 9:14-17 可 2:18-22 )後來𪜶對耶穌講:「約翰的門徒常常禁食祈禱,法利賽派的門徒嘛是按呢,毋拘你的門徒亦食亦飲。」 | |
5:34 | 耶穌對𪜶講:「新郎猶及婚宴的人客做夥的時,恁豈會互人客禁食? | |
5:35 | 日子啲欲到,新郎會互人對𪜶中間掠去,佇許個日𪜶就會禁食。」 | |
5:36 | 耶穌閣用一個譬喻給𪜶講:「無人拆新衫來補舊衫,若按呢做,毋若新衫拆破,拆起來彼塊新布及舊衫嘛𣍐合。 | |
5:37 | 嘛無人將新酒入佇舊皮袋。若按呢做,新酒會給皮袋爆破,酒流出來,皮袋嘛歹去。 | |
5:38 | 新酒著入佇新皮袋。 | |
5:39 | 無人飲舊酒了後愛飲新酒,人攏會講『猶是舊酒較好。』」 |