章節 | 現代台語2021版漢字經文 | 註釋 |
9:1 | 耶穌醫好半身不遂的人( 可 2:1-12 路 5:17-26 )耶穌坐船過湖,轉去家己的城。 | |
9:2 | 有人用床扛一個半身不遂的人來耶穌遐。伊看見𪜶的信心,就對彼個半身不遂的人講:「少年人,安心,你的罪赦免啦!」 | |
9:3 | 有幾若個經學教師心內想:「此個人啲褻瀆上帝!」 | |
9:4 | 耶穌知𪜶的心思就問𪜶:「是按怎恁心內有此款歹念頭? | |
9:5 | 對此個人講『你的罪赦免啦』,抑是講『你起來行』,叨一項較簡單? | |
9:6 | 不過我欲互恁知,人子佇地上有赦罪的權柄。」然後伊對彼個半身不遂的人講:「起來,夯你的床,轉去恁兜!」 | |
9:7 | 彼個人就起來,轉去𪜶兜。 | |
9:8 | 眾人看著真著驚,歸榮光互上帝,因為伊有將此款權柄賜互人。 | |
9:9 | 耶穌呼召馬太( 可 2:13-17 路 5:27-32 )耶穌離開遐向頭前行的時看著一個人,名叫做馬太,坐佇稅關。耶穌給伊講:「來隨我!」伊就起來隨伊。 | |
9:10 | 耶穌佇馬太的厝食飯的時,有真多貿稅的及罪人嘛來及耶穌以及伊的門徒做夥食。 | |
9:11 | 法利賽派的人看著就對伊的門徒講:「是按怎恁老師及貿稅的以及罪人做夥食飯?」 | |
9:12 | 耶穌聽著就講:「健康的無需要醫生,破病的才有需要。 | |
9:13 | 恁去學習此句聖經的話:『我愛憐憫,無愛祭物。』因為我來,毋是欲招義人,是欲招罪人。」 | |
9:14 | 禁食的問題( 可 2:18-22 路 5:33-39 )有一遍,約翰的門徒來見耶穌,對伊講:「阮及法利賽派的人常常禁食,是按怎你的門徒無禁食?」 | |
9:15 | 耶穌應講:「新郎猶及婚宴的人客做夥的時,人客豈會哀傷?日子啲欲到,新郎會互人對𪜶中間掠去,彼時𪜶就會禁食。 | |
9:16 | 「無人用無勼水的布去補舊衫,因為補的彼塊會給衫糾裂,顛倒破閣較大孔。 | |
9:17 | 嘛無人將新酒入佇舊皮袋。若按呢做,皮袋會爆破,酒流出來,皮袋嘛歹去。新酒應該入佇新皮袋,按呢兩項就攏保全。」 | |
9:18 | 會堂主管的查某子及致著血漏病的婦仁人( 可 5:21-43 路 8:40-56 )耶穌對𪜶講諸個話的時,有一個會堂的主管來跪佇伊的面前,講:「我的查某子抵仔死去,請你來給伊按手,伊就會活起來。」 | |
9:19 | 耶穌就起來,隨伊去;伊的門徒嘛去。 | |
9:20 | 抵彼時,有一個致著血漏病十二年久的婦仁人行倚去耶穌的後面,摸伊衫仔裾的鬚。 | |
9:21 | 因為伊心內想:「我干焦摸著伊的衫,病就會好。」 | |
9:22 | 耶穌越過來看伊,給伊講:「查某子,安心;你的信心互你好去啦!」婦仁人隨時得著醫好。 | |
9:23 | 耶穌來到會堂主管的厝,看著歕𥰔仔的及歸大陣人浪浪滾, | |
9:24 | 就給𪜶講:「恁攏出去,此個查某囝仔毋是死去,是啲睏。」𪜶就給伊恥笑。 | |
9:25 | 趕群眾出去了後,耶穌入去查某囝仔的房間,牽伊的手,查某囝仔就起來。 | |
9:26 | 對按呢,此個消息傳到彼地區的逐所在。 | |
9:27 | 耶穌醫好兩個盲人耶穌離開遐的時,有兩個盲人隨伊去;𪜶大聲喝:「大闢的子,憐憫阮!」 | |
9:28 | 耶穌入去厝內,盲人就行倚去。耶穌問𪜶:「恁信我會當給恁做此個代誌是無?」𪜶應講:「主啊,你會。」 | |
9:29 | 然後,耶穌摸𪜶的目睭,講:「照恁的信心互恁實現。」 | |
9:30 | 𪜶的目睭就開,會看見。耶穌嚴嚴吩咐𪜶講:「千萬毋通互人知此個代誌。」 | |
9:31 | 毋拘𪜶一下出去,煞將耶穌的代誌傳遍彼地區的逐所在。 | |
9:32 | 耶穌醫好一個𣍐講話的人𪜶出去的時,有人導一個互鬼附身𣍐講話的人來耶穌遐。 | |
9:33 | 鬼一下互耶穌趕出去,彼個𣍐講話的人就講話。群眾攏著驚,講:「佇以色列阮毋曾看著此款代誌。」 | |
9:34 | 不過法利賽派的人講:「伊是靠鬼王啲趕鬼。」 | |
9:35 | 耶穌可憐群眾耶穌行透周圍所有的城市及庄社,佇𪜶的會堂教示人,傳天國的福音,醫好逐款的症頭及病疼。 | |
9:36 | 伊看著赫大陣的人,就可憐𪜶,因為𪜶親像羊無牧者,困苦,無人照顧。 | |
9:37 | 耶穌就對伊的門徒講:「通收成的真多,作工的人真少。 | |
9:38 | 所以,恁著祈求管收成的主派工人去收成。」 |