章節 | 全民台語聖經漢羅經文 | 註釋 |
38:1 | 造祭壇(出27:1-8)伊用皂莢柴做燒祭ê壇,長五肘,闊五肘,chitê壇是四角形ê,koân三肘。 | |
38:2 | Tī壇ê四角頭做四支角,kah壇相連做一个,用銅包起來。 | |
38:3 | Koh做壇一切ê器具,它ê盆、托á、盤、叉、火鼎,所有ê器具lóng用銅來做。 | |
38:4 | Koh為tio̍h壇用銅網做一个燈柵,安置tī壇四面圍腰板 ê下面,hō͘它透到壇ê半腰。 | |
38:5 | 為tio̍h銅ê燈柵ê四角鑄四個環,做穿槓ê路用。 | |
38:6 | 用皂莢柴做槓,用銅包起來。 | |
38:7 | Kā槓穿tī壇ê雙pêng ê環內,用它來扛壇,mā用板做壇,壇是空殼。 | |
38:8 | 造銅盆(出30:18)伊用銅做洗盪ê盆kah銅座,是用會幕門前teh做工ê chabó͘人ê銅鏡做ê。 | |
38:9 | 造上主聖幕ê院(出27:9-19)伊造會幕ê埕,hitê埕ê南pêng,用過紡ê幼苧做帷,一百肘。 | |
38:10 | 帷ê柱二十支,銅做ê臼二十個,柱ê鉤kah橫桿是用銀做ê。 | |
38:11 | 北面mā一百肘,帷ê柱二十支,銅做ê臼二十個,柱ê鉤kah橫桿是用銀做ê。 | |
38:12 | 西面有帷五十肘,帷ê柱十支,臼十個,柱ê鉤kah橫桿是用銀做ê。 | |
38:13 | 東面ê東pêng,五十肘。 | |
38:14 | 門chit pêng ê帷十五肘,帷ê柱三支,有臼三个。 | |
38:15 | Hit-pêng mā是ánne,埕門ê左右,各有帷十五肘,帷ê柱三支,臼三个。 | |
38:16 | 埕四面ê帳帷lóng是用過紡ê幼苧做ê。 | |
38:17 | 柱ê臼是銅ê,柱ê鉤kah橫桿是銀ê,柱斗是用銀包ê;埕所有ê柱是用銀ê橫桿穿相連ê。 | |
38:18 | 埕門ê門簾是用繡花ê工夫,用藍色、紫色、朱紅色ê料kah過紡ê幼苧做ê,長二十肘,高五肘,kah埕ê帷相配。 | |
38:19 | In ê柱四支,銅ê臼四個,柱ê鉤是銀ê,柱斗是用銀包ê,橫桿是銀ê。 | |
38:20 | 會幕以及埕內四箍圍所釘(tèng)ê釘,lóng是銅ê。 | |
38:21 | 聖幕所用ê金屬Chitê ē幕ê物件有過清點,hit中間利未人所beh用ê所有物件,lóng是照摩西所吩咐,經過祭司亞倫ê kiáⁿ以他瑪ê手所點算ê。 | |
38:22 | 見若上主所吩咐摩西ê,偤大ê支族戶珥ê孫—烏利ê kiáⁿ比撒列 lóng kā伊做。 | |
38:23 | Kah伊做伙做ê,有但ê支族A-hi-sat-boat ê kiáⁿ亞何利亞伯,伊是gâu雕刻koh有奇巧ê師傅,koh ē用藍色、紫色、朱紅色ê料kah幼苧來繡花。 | |
38:24 | 做聖所一切ê工所用ê金,to̍h是人所獻ê金,照聖所ê秤á來秤,有二十九他連得koh七百三十舍客勒。 | |
38:25 | 會中受算ê人所出ê銀,照聖所ê秤á來秤,有一百他連得koh一千七百七十五舍客勒。 | |
38:26 | 見若過去歸tī hiahê經過點算ê,tùi二十歲以上,有六十萬khòng三千五百五十人,照聖所ê秤á來秤,ta̍k人出銀半舍客勒,to̍h是一比加。 | |
38:27 | 用hitê一百他連得ê銀,鑄聖所ê臼kah帳簾柱ê臼;一百他連得做一百ê臼,一个臼用一他連得。 | |
38:28 | 用hitê一千七百七十五舍客勒ê銀做柱ê鉤,mā包柱斗,mā做它ê橫桿。 | |
38:29 | 所獻ê銅有七十他連得koh二千四百舍客勒。 | |
38:30 | 用chitê銅做會幕門ê臼kah銅壇,kah它ê銅網ê燈柵,kah壇所有ê器具, | |
38:31 | 以及埕四箍圍ê臼,kah埕門ê臼,kah會幕所有所釘ê釘,kah埕四箍圍所釘ê釘。 |