章節 | 全民台語聖經漢羅經文 | 註釋 |
1:1 | 福音ê開始上帝ê Kiáⁿ耶穌基督ê福音是ánne開始。 | 註釋 串珠 康來昌 異文 原文 典藏 |
1:2 | 以賽亞先知ê冊有記載:我差我ê使者tòa你ê頭前,做你ê開路先鋒。 | 註釋 串珠 康來昌 異文 字典 原文 典藏 |
1:3 | 有聲tī曠野teh hoah:Tio̍h為主準備道路,修直祂beh行ê小路。(註:賽40:3;瑪3:1;出23:20) | 註釋 串珠 康來昌 字典 原文 典藏 |
1:4 | 行洗禮約翰ê傳道(太3:1-12;路3:1-9, 15-17;約1:19-28)約翰果然tī曠野出現,kā人洗禮,宣揚講:「Tio̍h悔改來領受洗禮,上帝to̍h ē赦免人ê罪。」 | C註釋 註釋 串珠 康來昌 異文 原文 典藏 |
1:5 | 偤太地區kah耶路撒冷ê民眾lóng去約翰hia,告白kakī ê罪。約翰to̍h tī約旦河kā in洗禮。 | 註釋 串珠 康來昌 原文 典藏 |
1:6 | Chitê約翰身穿駱駝毛ê衫,腰縖皮帶,食草蜢kah野蜜。 | 註釋 串珠 康來昌 異文 字典 原文 典藏 |
1:7 | 伊宣講講:「有一个比我khah有權能ê tòe我ê後面來。我連屈落來tháu祂ê鞋帶都bē堪得。 | 註釋 串珠 康來昌 字典 原文 典藏 |
1:8 | 我用水kā lín洗禮,祂beh用聖神kā lín洗禮。」 | 註釋 串珠 康來昌 異文 原文 典藏 |
1:9 | 耶穌受洗禮(太3:13-17;路3:21-22)過無幾日,耶穌tùi加利利省ê拿撒勒來,tī約旦河tùi約翰領受洗禮。 | 註釋 串珠 康來昌 原文 典藏 |
1:10 | 耶穌一下tùi水裡起來,to̍h看tio̍h天裂開,聖神親像粉鳥降臨tī祂ê身軀頂面。 | 註釋 串珠 康來昌 字典 原文 典藏 |
1:11 | Koh tùi天有聲講:「祢是我所疼ê Kiáⁿ,我真kah意祢。」 | 註釋 串珠 康來昌 異文 原文 典藏 |
1:12 | 耶穌受試探(太4:1-11;路4:1-13)聖神隨時催逼耶穌去曠野。 | 註釋 串珠 康來昌 原文 典藏 |
1:13 | 祂tī曠野四十工,受撒旦ê試探,mā kah野獸tòa做伙,有天使teh kā祂侍候。 | 註釋 串珠 康來昌 字典 原文 典藏 |
1:14 | 耶穌tī加利利省開始工作(太4:12-17;路4:14-15)約翰hông掠去關監了後,耶穌去加利利省宣揚上帝ê福音, | 註釋 串珠 康來昌 異文 原文 典藏 |
1:15 | 講:「時期已經到à,上帝國度teh beh來臨ā。Lín tio̍h悔改來信福音。」 | 註釋 串珠 康來昌 原文 典藏 |
1:16 | 耶穌呼召四個掠魚人(太4:18-22;路5:1-11)耶穌經過加利利湖邊ê時,看tio̍h西門kah伊ê兄弟安得烈tī湖裡teh拋網,in是掠魚人。 | 註釋 串珠 康來昌 字典 原文 典藏 |
1:17 | 耶穌kā in講:「來tòe我,我beh hō͘ lín得tio̍h人親像掠魚人得tio̍h魚。」 | C註釋 註釋 串珠 康來昌 原文 典藏 |
1:18 | In隨時放落魚網去tòe耶穌。 | 註釋 串珠 康來昌 字典 原文 典藏 |
1:19 | Koh略á行進前,耶穌看tio̍h西庇太ê kiáⁿ雅各kah伊ê兄弟約翰tī船頂teh補魚網。 | 註釋 串珠 康來昌 字典 原文 典藏 |
1:20 | 耶穌隨時呼召in。Into̍h kah in老父西庇太kah 倩工相辭來tòe耶穌去。 | 註釋 串珠 康來昌 字典 原文 典藏 |
1:21 | 耶穌醫好邪神附身ê人(路4:31-37)耶穌kah門徒來到迦百農。安息日一下到,祂to̍h入去會堂教示人。 | 註釋 串珠 康來昌 字典 原文 典藏 |
1:22 | 聽tio̍h耶穌教示ê人lóng感覺真奇妙,因為祂ê教示真有權威,無親像hiahê經學教師。 | 註釋 串珠 康來昌 原文 典藏 |
1:23 | Hit時,會堂內有一个hō͘邪神附身ê人大聲hoah: | 註釋 串珠 康來昌 字典 原文 典藏 |
1:24 | 「拿撒勒人耶穌,祢何必tio̍h來干涉阮?祢beh來毀滅阮,是無?我知祢是啥人,祢是上帝ê聖ê。」 | C註釋 註釋 串珠 康來昌 康來昌 原文 典藏 |
1:25 | 耶穌責備邪神講:「恬去!Tùi chitê人出去!」 | 註釋 串珠 康來昌 原文 典藏 |
1:26 | 邪神hō͘ hitê人抽chhoah了後,大聲hoah一聲,to̍h對hitê人出去。 | 註釋 串珠 康來昌 原文 典藏 |
1:27 | 眾人lóng tio̍h驚kah gāng去,就議論紛紛,講:「這是án怎?Kám是新ê教示?祂用權能命令邪神,連邪神都屈服。」 | C註釋 註釋 串珠 康來昌 異文 原文 典藏 |
1:28 | 耶穌ê名聲隨時傳到加利利省ê ta̍k所在。 | 註釋 串珠 康來昌 原文 典藏 |
1:29 | 耶穌醫好真Chē人(太8:14-17;路4:38-41)耶穌一下行出會堂,隨時chhōa雅各kah約翰入去西門kah安得烈ê厝。 | 註釋 串珠 康來昌 異文 字典 原文 典藏 |
1:30 | 西門ê丈姆tú-teh發燒,倒tī眠床。In隨時kā她ê情況kā耶穌講。 | 註釋 串珠 康來昌 原文 典藏 |
1:31 | 耶穌óa去牽她ê手,kā她扶起來,她ê熱就退。Chitê婦人人to̍h接待in。 | 註釋 串珠 康來昌 原文 典藏 |
1:32 | 到黃昏日頭落山了後,眾人to̍h chhōa破病ê kah hō͘邪神附身ê人來耶穌hia。 | 註釋 串珠 康來昌 原文 典藏 |
1:33 | 全城ê人lóng聚集tī門口。 | 註釋 串珠 康來昌 字典 原文 典藏 |
1:34 | 耶穌醫好ta̍k種ê病人,koh趕真chē鬼。耶穌m̄准邪神講話,因為in知祂是啥人。 | 註釋 串珠 康來昌 異文 原文 典藏 |
1:35 | 耶穌tī加利利省傳道(路4:42-44)隔tńg早起天iáu未光,耶穌to̍h起來,出去曠野ê所在,tī hia祈禱。 | 註釋 串珠 康來昌 原文 典藏 |
1:36 | 西門kah同伴出去chhōe祂。 | 註釋 串珠 康來昌 原文 典藏 |
1:37 | Chhōe tio̍h了後to̍h kā祂講:「眾人lóng teh chhōe祢。」 | 註釋 串珠 康來昌 原文 典藏 |
1:38 | 耶穌應講:「咱繼續來去附近ê庄頭,hō͘我thang tī hia傳福音;因為這是我出來ê使命。」 | 註釋 串珠 康來昌 原文 典藏 |
1:39 | 耶穌to̍h去訪問加利利省ê ta̍k所在,入去in ê會堂傳道koh趕鬼。 | 註釋 串珠 康來昌 異文 字典 原文 典藏 |
1:40 | 耶穌醫好癩ko病人(太8:1-4;路5:12-16)有一个癩ko ê病人來到耶穌ê面前,跪落去kā祂求,講:「祢若肯,to̍h ē tàng hō͘我清氣。」 | 註釋 串珠 康來昌 異文 原文 典藏 |
1:41 | 耶穌滿心憐憫,伸手kā伊摸,講:「我肯,你thang清氣。」 | C註釋 註釋 串珠 康來昌 異文 原文 典藏 |
1:42 | Hitê人ê癩ko隨時除去,伊to̍h清氣。 | 註釋 串珠 康來昌 原文 典藏 |
1:43 | 耶穌隨時叫伊離開,嚴嚴kā伊警戒講: | 註釋 串珠 康來昌 原文 典藏 |
1:44 | 「你tio̍h謹慎,絕對m̄ thang kā人講啥物;獨獨你tio̍h去hō͘祭司驗你ê身軀,mā ài為tio̍h你得tio̍h清氣去獻摩西所吩咐ê祭,來對眾人證明你已經清氣à。」 | 註釋 串珠 康來昌 原文 典藏 |
1:45 | 總是,hitê人一下出去,to̍h四界宣揚chitê消息,致使耶穌無法度koh公然入城,soah tio̍h tòa tī外面曠野ê所在。眾人猶原tùi ta̍k所在來chhōe耶穌。 | 註釋 串珠 康來昌 原文 典藏 |