章節 | 全民台語聖經漢羅經文 | 註釋 |
21:1 | 耶穌光榮進入耶路撒冷(可11:1-11;路19:28-38;約12:12-19)耶穌kah門徒行beh到耶路撒冷,來到橄欖山附近ê Pek-hoat-kî。耶穌差兩 个門徒, | 註釋 串珠 康來昌 字典 原文 典藏 |
21:2 | kā in吩咐講:「Lín去對面ê庄頭,隨時會tú tio̍h一隻驢á縛teh,koh有一隻驢á-kiáⁿ做伙tī hia。Lín kā in tháu開,牽來我chia。 | 註釋 串珠 康來昌 字典 原文 典藏 |
21:3 | 若有人kā lín講啥物,lín tio̍h講:『主beh使用祂。』Hitê人隨時ē hō͘ lín牽來。」 | 註釋 串珠 康來昌 原文 典藏 |
21:4 | Chitê tāichì是beh應驗上帝託先知所講ê話: | 註釋 串珠 康來昌 原文 典藏 |
21:5 | Tio̍h kā錫安ê chabó͘ kiáⁿ講:你ê王beh來你chia,溫柔koh騎驢á,騎一隻驢á-kiáⁿ,to̍h是載貨ê驢á-kiáⁿ。(註:賽62:11;亞9:9) | 註釋 串珠 康來昌 字典 原文 典藏 |
21:6 | 門徒就照耶穌所吩咐ê去做。 | 註釋 串珠 康來昌 原文 典藏 |
21:7 | In牽驢á kah驢á-kiáⁿ來,用kakī ê衫chhu tī in頂面,耶穌就peh起lí騎。 | 註釋 串珠 康來昌 字典 原文 典藏 |
21:8 | 群眾真chē人用kakī ê衫舖tòa路裡,mā有人剉樹枝來舖tòa路裡。 | 註釋 串珠 康來昌 字典 原文 典藏 |
21:9 | 前行後tòe ê群眾大聲hoah:「大衛ê kiáⁿ孫,和散那! 奉主ê名來ê hit位應該得tio̍h oló!(註:詩118:26)和散那!至koân上帝。」 | 註釋 串珠 康來昌 原文 典藏 |
21:10 | 耶穌一下入去耶路撒冷,全城ê人lóng hán起來講:「Chitê是啥人?」 | 註釋 串珠 康來昌 原文 典藏 |
21:11 | 眾人講:「Chitê是耶穌先知,加利利省ê拿撒勒人。」 | 註釋 串珠 康來昌 原文 典藏 |
21:12 | 耶穌清氣聖殿(可11:15-19;路19:45-48;約2:13-22)耶穌入去聖殿,kā tī hia teh做senglí ê人lóng趕出去,chhia倒換錢ê人ê桌á kah賣粉鳥ê人ê椅á。 | 註釋 串珠 康來昌 字典 原文 典藏 |
21:13 | 耶穌對in講:「有記載:我ê厝beh叫做祈禱ê厝,(註:賽56:7;耶7:11) m̄ koh,lín soah hō͘它變做賊巢。」 | 註釋 串珠 康來昌 字典 原文 典藏 |
21:14 | 有chheⁿmê ·ê、跛腳ê,來聖殿chhōe耶穌,祂to̍h kā in醫好。 | 註釋 串珠 康來昌 字典 原文 典藏 |
21:15 | Chiahê祭司長kah經學教師看tio̍h耶穌所做ê奇事,又koh看tio̍h gín-á tī聖殿hoah:「和散那! 大衛ê kiáⁿ孫。」to̍h真受氣, | 註釋 串珠 康來昌 字典 原文 典藏 |
21:16 | kā祂講:「In teh講ê,祢有聽tio̍h無?」耶穌應講:「有。經典有記載:Tùi gín-á kah嬰á ê嘴,祢hō͘ in講出oló ê話。(註:詩8:3 LXX) Lín kám m̄ bat讀tio̍h?」 | 註釋 串珠 康來昌 原文 典藏 |
21:17 | 耶穌to̍h離開in,出城去到伯大尼,tī hia歇暝。 | 註釋 串珠 康來昌 原文 典藏 |
21:18 | 耶穌咒詛無花果樹(可11:12-14,20-24)隔工早起,beh tńg來耶路撒冷城ê時,耶穌腹肚iau。 | 註釋 串珠 康來昌 原文 典藏 |
21:19 | 祂看tio̍h路邊有一欉無花果樹,to̍h行óa去,樹頂lóng無果子,只有葉á niā-niā。耶穌對hit欉樹講:「Tùi chitmá起,你永遠bē koh結果子。」Hit欉無花果樹隨時就乾去。 | 註釋 串珠 康來昌 字典 原文 典藏 |
21:20 | 門徒看了真tio̍h驚,講:「無花果樹ná ē隨時乾去?」 | 註釋 串珠 康來昌 字典 原文 典藏 |
21:21 | 耶穌應講:「我實在kā lín講,lín若有信心無憢疑,m̄ nā ē tàng做我對chit欉無花果樹所做ê tāichì,甚至命令chit座山講:『Tio̍h徙去thiām海。」mā ē實現。 | 註釋 串珠 康來昌 字典 原文 典藏 |
21:22 | 祈禱ê時,lín所求ê,若有信心to̍h ē得tio̍h。」 | 註釋 串珠 康來昌 原文 典藏 |
21:23 | 質問耶穌ê權柄(可11:27-33;路20:1-8)耶穌入去聖殿教示人ê時,祭司長kah民間ê長老óa來問祂講:「祢用啥物權柄來做chiahê tāichì?啥人hō͘祢chitê權柄?」 | 註釋 串珠 康來昌 字典 原文 典藏 |
21:24 | 耶穌應講:「我mā有一句話beh問lín。Lín若kā我講,我chiah beh kā lín講我靠啥物權柄來做chiahê tāichì。 | 註釋 串珠 康來昌 原文 典藏 |
21:25 | 約翰kā人行洗禮ê權柄是tùi tó位來?是tùi天á是tùi人?」In私下互相議論講:「若講『Tùi天』,祂ē kā咱講:『Án-ne lín án怎m̄信約翰?』 | 註釋 串珠 康來昌 原文 典藏 |
21:26 | 若講『Tùi人』,咱koh驚chiahê群眾,因為in lóng想講約翰是先知。」 | 註釋 串珠 康來昌 原文 典藏 |
21:27 | Into̍h應耶穌講:「阮m̄知。」耶穌kā in講:「Án-ne我mā無beh kā lín講我是靠啥物權柄來做chiahê tāichì。」 | 註釋 串珠 康來昌 原文 典藏 |
21:28 | 兩 个Kiáⁿ ê譬喻耶穌繼續講:「下面ê問題看lín án怎想?有一个人,伊有兩 个kiáⁿ,伊來kā大kiáⁿ講:『Kiáⁿ,你今á日去葡萄園做工。』 | C註釋 註釋 串珠 康來昌 字典 原文 典藏 |
21:29 | 大kiáⁿ應講:『我m̄去。』後來,改變心意,有去。 | 註釋 串珠 康來昌 原文 典藏 |
21:30 | 伊koh來kā第二kiáⁿ講仝款ê話。第二kiáⁿ應講:『阿爸,我beh去。』M̄ koh,後來,伊無去。 | 註釋 串珠 康來昌 原文 典藏 |
21:31 | Án-ne,chit兩 个kiáⁿ tó一个有照老父ê意思去做?」In講:「大kiáⁿ。」耶穌kā in講:「我實在kā lín講,chiahê抽稅ê kah娼妓ē比lín tāi先進入上帝國度。 | C註釋 註釋 串珠 康來昌 原文 典藏 |
21:32 | 因為約翰來教示lín tio̍h行上帝ê路,lín無信伊;抽稅ê kah娼妓有信;á lín看了mā無悔改來信伊。」 | 註釋 串珠 康來昌 字典 原文 典藏 |
21:33 | Pháiⁿ田佃ê譬喻(可12:1-12;路20:9-19)耶穌koh繼續講:「Lín koh聽一个譬喻:有一个園主開墾一塊葡萄園,用籬笆圍起來,內面挖一个酒窟,起一个守更樓。伊kā chit塊園租hō͘田佃,to̍h出去旅行。 | 註釋 串珠 康來昌 字典 原文 典藏 |
21:34 | 收葡萄ê時beh到,園主to̍h差伊ê奴僕去田佃hia,beh tùi in收租金。 | 註釋 串珠 康來昌 原文 典藏 |
21:35 | 佃戶kā chiahê奴僕掠起來,一个phah,一个thâi,一个用石頭tìm。 | 註釋 串珠 康來昌 原文 典藏 |
21:36 | 園主koh差另外比以前khah chē ê奴僕去。田佃猶原照ánne對待in。 | 註釋 串珠 康來昌 原文 典藏 |
21:37 | 後來,園主to̍h差kakī ê kiáⁿ去田佃hia,想講:『In會尊重我ê kiáⁿ。』 | 註釋 串珠 康來昌 原文 典藏 |
21:38 | M̄ koh,田佃看tio̍h hitê kiáⁿ,就互相講:『Chitê是伊ê繼承人,咱來kā伊thâi死,thang得伊ê產業。』 | 註釋 串珠 康來昌 原文 典藏 |
21:39 | 田佃to̍h kā伊掠起來,hiat出去園外,kā伊thâi死。 | 註釋 串珠 康來昌 字典 原文 典藏 |
21:40 | Án-ne,園主tńg來到位,ē án怎辦chiahê田佃?」 | 註釋 串珠 康來昌 字典 原文 典藏 |
21:41 | In kā耶穌講:「伊一定ēthâi死chiahê pháiⁿ人,kā葡萄園租hō͘ē照時納園租ê人。」 | 註釋 串珠 康來昌 字典 原文 典藏 |
21:42 | 耶穌對in講:「Lín kám m̄ bat讀tio̍h經典ê記載:師傅所棄sak ê石,成做厝角頭ê石。這是上帝ê作為,tùi咱來看實在真奇妙!(註:詩118:22-23) | 註釋 串珠 康來昌 字典 原文 典藏 |
21:43 | 所以,我kā lín講,上帝國度ē tùi lín搶來交hō͘會結果子ê子民。 | 註釋 串珠 康來昌 原文 典藏 |
21:44 | Koh再講:siak落去hit塊石頭頂ê人ē碎骨分屍;hō͘ hit塊石頭teh tio̍h ê人mā ē碎糊糊。」(原版本無chit節,有ê抄本加chit節。) | 註釋 串珠 康來昌 原文 典藏 |
21:45 | Chiahê祭司長kah法利賽派ê人聽tio̍h chiahê譬喻,知影耶穌是teh講in。 | 註釋 串珠 康來昌 原文 典藏 |
21:46 | Into̍h想beh kā耶穌掠起來,m̄ koh,驚群眾反彈,因為群眾kā耶穌看做是先知。 | 註釋 串珠 康來昌 原文 典藏 |