章節 | 全民台語聖經漢羅經文 | 註釋 |
9:1 | 上帝kah挪亞定契約上主賜福hō͘挪亞kah伊ê kiáⁿ,mā對in講:「Lín tio̍h生湠真chē,充滿地chiūⁿ。 | |
9:2 | 見若地chiūⁿê走獸kah天頂ê鳥,lóng ē驚畏lín;連地chiūⁿ一切ê蟲thōa kah海裡一切ê魚,lóng beh交付tī lín ê手。 | |
9:3 | 見若活ê動物lóng做lín ê食物,chiahê一切我lóng beh做lín ê食物。Chiahê一切我lóng beh hō͘ lín,親像我hō͘ lín菜蔬仝款。 | |
9:4 | 總是,有活命ê肉,to̍h是有kâⁿ血ê,lín m̄ thang食。 | |
9:5 | 流lín ê血,to̍h是流lín活命ê血ê罪,我beh kā伊討。我beh對ta̍k樣ê走獸討,mā beh對人ê手,以及ta̍k人兄弟ê手,來討人ê活命。 | |
9:6 | 見若hō͘人流血ê,人mā beh hō͘伊流血,因為上帝造人,是親像祂kakī ê像。 | |
9:7 | Lín tio̍h生湠真chē,tī地面上tio̍h興旺,加添真chē。」 | |
9:8 | 上帝kā挪亞kah伊ê kiáⁿ講: | |
9:9 | 「我beh kah lín以及lín ê kiáⁿ孫立我ê約; | |
9:10 | mā beh kah hiahê kah lín做伙ê一切活物,to̍h是kah lín tī ·leh ê飛鳥、chengseⁿ,以及一切ê走獸;見若tùi大船出來地chiūⁿê一切走獸立約。 | |
9:11 | 我kah lín立我ê約:見若有肉體ê,bē koh hō͘大水滅亡,mā無koh有大水毀壞土地。」 | |
9:12 | 上帝講:「我kah lín mā kah hiahê kah lín同在ê ta̍k種活物所立永世代ê約,是有記號ê。 | |
9:13 | 我kā我ê虹hē tī雲裡,thang做我kah地立約ê記號。 | |
9:14 | 以後我hō͘雲起來遮地ê時,ē有虹出現tī雲裡, | |
9:15 | 我to̍hē記得我kah lín以及ta̍k種有肉體ê活物所立ê約,水無koh氾濫,損壞一切有肉體ê物。 | |
9:16 | 虹ē出現tī雲裡,我beh看它,hō͘我記念上帝kah地chiūⁿta̍k種有肉體ê活物所立永遠ê約。」 | |
9:17 | 上帝對挪亞講:「這to̍h是我kah地chiūⁿ一切有肉體ê物所立ê約ê記號。」 | |
9:18 | 挪亞ê Kiáⁿ兒挪亞ê kiáⁿ,kah伊做伙出大船ê,to̍h是閃、含、雅弗。含是迦南ê老父。 | |
9:19 | Chit三个是挪亞ê kiáⁿ,tùi in出ê kiáⁿ孫遍滿全地。 | |
9:20 | 挪亞起頭做農夫,栽種葡萄園。 | |
9:21 | 伊lim酒醉,thǹgpaktheh倒tī布棚內。 | |
9:22 | 迦南ê老父—含,看in老父thǹgpaktheh,to̍h去外面kā in兩 个兄弟講。 | |
9:23 | 閃kah雅弗the̍h一領衫,掛tī in ê肩胛頭,倒退行來遮老父ê 身軀,in ê面向外口,無看tio̍h老父thǹgpaktheh。 | |
9:24 | 挪亞酒醉醒,chiah知第二kiáⁿ ê所做。 | |
9:25 | to̍h講:「迦南tio̍h受咒詛,伊ē做伊ê兄弟奴僕ê奴僕。」Koh講: | |
9:26 | 「Tio̍h oló上主—閃ê上帝,迦南做閃ê奴僕。 | |
9:27 | 願上帝hō͘雅弗發展,hō͘伊tòa tī閃ê布棚,迦南mā做伊ê奴僕。」 | |
9:28 | 大水了後,挪亞koh再活三百五十年。 | |
9:29 | 挪亞食到九百五十歲chiah死。 |