章節 | 全民台語聖經漢羅經文 | 註釋 |
5:1 | 哀求憐憫上主ah,求祢記念阮所tú ·tio̍h ê tāichì;看阮所受ê凌辱,求祢來鑒察hitê凌辱。 | 註釋 串珠 原文 典藏 |
5:2 | 阮ê產業歸tī外邦人,阮ê厝宅歸tī別族。 | 註釋 串珠 原文 典藏 |
5:3 | 阮是無老父ê孤兒,阮ê老母親像寡婦。 | 註釋 串珠 原文 典藏 |
5:4 | 阮tio̍h出銀chiah有水thang lim,阮hiâⁿ柴mā tio̍h買柴。 | 註釋 串珠 字典 原文 典藏 |
5:5 | Jiok阮ê chhi̍h tio̍h阮ê頷頸;阮厭倦,bē tàng歇睏。 | 註釋 串珠 原文 典藏 |
5:6 | 阮投降埃及人kah亞述人,是為tio̍h beh得tio̍h米糧thang食飽。 | 註釋 串珠 字典 原文 典藏 |
5:7 | 阮ê祖先犯罪,taⁿ in死去à;阮tio̍h擔當in ê罪過。 | 註釋 串珠 原文 典藏 |
5:8 | 奴僕kā阮管轄,無人救阮脫離in ê手。 | 註釋 串珠 原文 典藏 |
5:9 | 阮piàⁿ性命來得tio̍h米糧,因為有刀劍tī曠野。 | 註釋 串珠 字典 原文 典藏 |
5:10 | 阮ê皮膚烏kah親像火爐,因為飢荒來發熱。 | 註釋 串珠 字典 原文 典藏 |
5:11 | In tī錫安強姦chabó͘人,以及偤大chiahê城ê在室女。 | 註釋 串珠 原文 典藏 |
5:12 | In縛hiahê貴族ê手,kā in吊離地;見tio̍h老大ê面,mā無尊敬。 | 註釋 串珠 原文 典藏 |
5:13 | 少年人扛石磨,gín-á擔柴,致使跋倒。 | 註釋 串珠 原文 典藏 |
5:14 | 老人無koh坐tī城門口,少年人無koh奏樂。 | 註釋 串珠 字典 原文 典藏 |
5:15 | 阮ê心快樂已經soah,阮ê跳舞變做悲哀。 | 註釋 串珠 原文 典藏 |
5:16 | 阮頭殼頂ê冕旒ka-la̍uh,阮有災禍ah!因為阮有犯罪。 | 註釋 串珠 原文 典藏 |
5:17 | 因為ánne,阮ê心暈去,因為ánne,阮ê目chiu 花。 | C註釋 註釋 串珠 原文 典藏 |
5:18 | 是為tio̍h錫安山拋荒,山狗tī hit頂面行遊。 | 註釋 串珠 字典 原文 典藏 |
5:19 | 上主ah,祢是永遠存在;祢ê寶座代代無soah。 | 註釋 串珠 字典 原文 典藏 |
5:20 | 祢ná ē永遠bē記得阮?Ná會棄sak阮到hiah久? | 註釋 串珠 原文 典藏 |
5:21 | 上主ah,求祢hō͘阮oa̍t tńg來歸祢,阮to̍h oa̍t tńg來。求祢kā阮ê日子換新,親像早時ánne。 | 註釋 串珠 原文 典藏 |
5:22 | Kám講祢beh完全棄sak阮,受氣阮到極? | 註釋 串珠 原文 典藏 |