路加福音 四福音合參 線上收聽:中文和合本 現代中文譯本修訂版 現代台語 台語聖經 台語(長老會傳播中心授權） 客語 現代客語 粵語和合本 希臘文(WH-NT) 下載檔案 關於語音聖經
8:1 跟隨耶穌的婦仁人
過無偌久，耶穌逐城市逐庄社行透透傳道，宣揚上帝國的福音。十二使徒及伊做陣，
8:2 有一寡曾互邪神附身抑是破病互耶穌醫好的婦仁人嘛及伊做夥去，其中有末大拉的馬利亞 — 耶穌曾對伊身上趕出七個鬼，
8:3 希律的管家苦撒的某約亞娜，及蘇撒娜，以及其他真多婦仁人，𪜶曾用家己的財物服事耶穌及伊的門徒。
8:4 撒種籽的譬喻
( 太 13:1-9 可 4:1-9 )
有一大陣人對逐個城市一直聚集來耶穌遐的時，伊用譬喻給𪜶講：
8:5 「有一個撒種籽的人出去撒種籽。伊撒的時，有的落佇路邊，互人踏，空中的鳥給伊食了了。
8:6 有的落佇石頭地，因為無水分，發出來就焦去。
8:7 有的落佇莿內，刺仔及種籽平平大欉起來，煞給伊翕死。
8:8 有的落落去好土地，大欉起來，結實一百倍。」
諸個話講煞，耶穌閣大聲講：「有耳孔通聽的人，著聽！」
8:9 譬喻的目的
( 太 13:10-17 可 4:10-12 )
耶穌的門徒問伊此個譬喻是什麼意思。
8:10 伊講：「上帝國的奧祕已經有互恁知，毋拘對別人就用譬喻，欲互
𪜶看，嘛看無，
聽，嘛無了解。」
8:11 耶穌解說撒種籽的譬喻
( 太 13:18-23 可 4:13-20 )
「此個譬喻的意思是按呢：種籽是上帝的信息。
8:12 落佇路邊的，是人聽著信息，魔鬼隨時來，對𪜶心內將信息搶去，才𣍐互𪜶信來得救。
8:13 落佇石頭地的，是人聽著信息，隨時歡喜接受，不過無釘根，只有暫時信，一下抵著試煉就放拺。
8:14 落佇莿內的，是人聽著信息了後，受著生活的掛慮，錢財及享樂的阻礙，信息受翕死煞𣍐成熟。
8:15 落佇好土地的，是人聽著信息，用誠實善良的心接受，耐心聽候到結實。」
8:16 甕仔下的燈
( 可 4:21-25 )
「無人燈點了用甕仔蓋起來抑是囥佇眠床腳，是給伊𫞼佇燈台頂，通互入來的人看著光。
8:17 因為無一項隱密的𣍐顯露；無一項掩蓋的𣍐露現，𣍐互人知。
8:18 「所以，著注意欲按怎聽；因為有的，欲互伊閣較多；無的，連伊家己想講有的嘛欲給伊搶起來。」
8:19 耶穌的老母及兄弟
( 太 12:46-50 可 3:31-35 )
耶穌的老母及兄弟來尋伊，毋拘人真多，𣍐當倚去。
8:20 有人給伊講：「你的老母及兄弟徛佇外面欲見你。」
8:21 耶穌對𪜶講：「聽上帝的話有去實行的人就是我的老母，我的兄弟。」
8:22 耶穌平靜風湧
( 太 8:23-27 可 4:35-41 )
有一日，耶穌及伊的門徒上船的時給𪜶講：「咱過來去彼旁岸。」𪜶就開船。
8:23 船啲行的時，耶穌睏去。忽然有一陣大風掃落來湖裡，船互水淹到欲滿，真危險。
8:24 門徒去給伊叫醒，講：「老師，老師，咱欲無命囉！」
耶穌醒起來，責備風及大湧，風湧定，一切就靜靜。
8:25 耶穌對門徒講：「恁哪赫呢無信心？」
𪜶驚惶閣奇怪，大家講來講去：「此個是什麼人？伊一下命令，連風及湧攏順服。」
8:26 耶穌醫好邪神附身的人
( 太 8:28-34 可 5:1-20 )
耶穌及門徒坐船去加利利的對面岸，格拉森人的地區。
8:27 耶穌落船上岸；有一個鬼附身的人對城裡出來抵著伊。此個人已經真久無穿衫，嘛無住佇厝內，攏住佇墓仔埔。
8:28 伊一下看著耶穌，就仆佇伊的面前，大聲喝：「至高上帝的子耶穌，你插我！我懇求你，毋通給我苦楚！」
8:29 因為耶穌有命令邪神對此個人出去。邪神曾真多擺給伊掠啲，人給伊關起來，用鐵鍊給伊鍊，用腳銬給伊銬，毋拘伊給鎖鍊攏擦斷，閣互鬼趕去曠野。
8:30 耶穌問伊：「你叫做什麼名？」
伊應講：「軍團」，因為有真多鬼給伊附身。
8:31 鬼哀求耶穌毋通命令𪜶入去深淵。
8:32 彼時，附近的山坪有一大群豬啲討食，鬼就求耶穌互𪜶入去豬群。耶穌准𪜶。
8:33 鬼就對彼個人出去，進入豬群。歸群豬就對山坪闖落去湖裡死。
8:34 許個飼豬的人看著所發生的代誌，驚甲走去城內及鄉村報人知。
8:35 眾人就出來欲看發生什麼代誌。𪜶來到耶穌遐，看著邪神已經對伊出去彼個人有穿衫，精神正常，坐佇耶穌的腳前，𪜶就真著驚。
8:36 看著此個代誌的人就將彼個互鬼附身的人按怎得著醫好的代誌給眾人報告。
8:37 格拉森附近所有的人求耶穌離開𪜶遐，因為𪜶非常驚惶。耶穌就坐船倒轉去。
8:38 鬼對伊出去彼個人求耶穌，愛欲隨伊去。
毋拘耶穌叫伊轉去，講：
8:39 「轉去恁兜，將上帝為著你所做一切的代誌報互人知。」
彼個人就轉去，將耶穌為著伊所做赫呢大的代誌傳揚互全城的人知。
8:40 會堂主管的查某子及致著血漏病的婦仁人
( 太 9:18-26 可 5:21-43 )
耶穌轉來的時，有一陣人給伊歡迎，因為𪜶攏啲聽候伊。
8:41 有一個會堂的主管名叫做葉魯來，伊一下看著耶穌就仆佇伊的腳前，懇求伊去𪜶兜。
8:42 因為伊十二歲的獨生查某子啲欲死啊。
耶穌就及伊去；有歸大陣人嘛挨挨揢揢隨伊去。
8:43 彼時，有一個婦仁人致著血漏病已經十二年久，雖然傾家蕩產尋醫生，毋拘無人會當給伊醫好。
8:44 伊行倚去耶穌的後面，摸伊衫仔裾的鬚，伊的血漏隨時止。
8:45 耶穌講：「什麼人給我摸？」
大家攏講無。彼得講：「老師，是群眾揢來揢去的時給你揢著。」
8:46 耶穌講：「有人給我摸著，因為我知有大能力對我出去。」
8:47 婦仁人知影掩蓋𣍐牢，就皮皮惙，來仆佇耶穌的腳前，佇眾人的面前講伊是按怎摸耶穌，閣伊的病按怎隨時好去。
8:48 耶穌給伊講：「查某子，你的信心互你好去啦，平安倒去。」
8:49 耶穌猶啲講的時，有人對會堂主管的厝來，給葉魯講：「你的查某子已經死去，毋通閣勞煩老師。」
8:50 耶穌聽著就給葉魯講：「毋免驚，只有信，伊會好起來。」
8:51 耶穌來到𪜶兜的時，彼得、約翰、雅各，及囝仔的父母以外，毋准別人及伊做夥入去。
8:52 大家攏為著死去的查某囝仔啲哮啲哭。耶穌講：「毋通哭，因為伊毋是死去，是啲睏。」
8:53 因為𪜶攏知彼個查某囝仔已經死去，就給伊恥笑。
8:54 耶穌牽查某囝仔的手，大聲講：「查某囝仔，起來！」
8:55 伊就回魂，隨時𬦰起來。耶穌吩咐𪜶著互查某囝仔食。
8:56 伊的父母非常著驚。耶穌命令𪜶毋通將所發生的代誌報人知。
《聖經公會現代臺語漢字譯本》©2021版權屬於台灣聖經公會，由台灣聖經公會授權信望愛站使用。現代臺語漢字譯本、現代客語漢字譯本漢字字型3.1版 Copyright (c) 2016 by UBS Open Han Bible Project. 由台灣聖經公會授權信望愛站使用。
各聖經譯本著作權如版權說明。
本畫面由信望愛資訊中心之CBOL計畫產生，歡迎連結，無須申請。CBOL計畫之資料版權宣告採用GNU Free Documentation License。願上帝的話能建造每一位使用這系統的人，來榮耀祂自己的名。