申命記 線上收聽:中文和合本 現代中文譯本修訂版 現代台語 台語聖經 客語 福州話 希伯來文讀經 下載檔案 關於語音聖經
22:1 「你若看tio̍h你ê兄弟ê牛á是羊行迷路，你m̄ thang tèⁿ無看tio̍h，你一定tio̍h hō͘牠倒tńg來你ê兄弟hia。
22:2 你ê兄弟若離開你遠，á是你m̄ bat伊，to̍h tio̍h牽到你ê厝，留tī你hia，thèng候你ê兄弟來chhōe，你chiah還伊。
22:3 你ê兄弟ê驢á是伊ê衫，無論伊失落啥物，伊失落，你所拾tio̍h ê，lóng tio̍h ánne行，m̄ thang tèⁿ做無看tio̍h。
22:4 「你若看tio̍h你ê兄弟ê驢á是牛，跋倒tī路裡，m̄ thang tèⁿ做無看tio̍h，一定tio̍h kā牠幫贊，kā牠扶起來。
22:5 「Cha-bó͘人m̄ thang穿chapo͘人所穿ê，chapo͘人mā m̄ thang穿chabó͘人ê衫，因為見若ánne行ê，是上主—你ê上帝所討厭ê。
22:6 「你若tī路裡tú tio̍h鳥巢，á是tī樹裡，á是tī地裡，內面有鳥á-kiáⁿ á是鳥卵，鳥母àⁿ鳥kiáⁿ á是孵卵，你m̄ thang掠鳥kiáⁿ續掠鳥母。
22:7 一定tio̍h放鳥母去，總是，鳥á-kiáⁿ你thang掠去；ánne，你to̍h thang享受福氣koh食長歲壽。
22:8 「你若起新厝，tio̍h做欄杆tī厝頂，免得人tùi hia跋落來，流血ê罪就歸tī你ê厝。
22:9 「M̄-thang kā兩樣ê種籽掖tī你ê葡萄園，恐驚做一下死去，to̍h是你所掖ê種籽結實ê kah你ê葡萄園結實ê，lóng無thang私khia用。
22:10 「M̄-thang用牛kah驢做伙犁田。
22:11 M̄-thang穿參插ê布料，to̍h是羊毛kah幼苧合織ê。
22:12 「你所moa ê衫tio̍h tī它ê四箍圍做鬚。」
22:13 在室女憑據ê規定
「人若娶bó͘ kah她同房，
22:14 後來，怨恨她，譭謗她ê pháiⁿ事，phah-pháiⁿ她ê名聲，講：『我娶chitê chabó͘ kiáⁿ，kah她同房，看她無在室女ê憑據。』
22:15 Cha-bó͘ kiáⁿ ê父母tio̍h the̍h chabó͘ kiáⁿ在室女ê憑據出來，帶到伊本城門ê長老hia。
22:16 Cha-bó͘ kiáⁿ ê老父tio̍h對長老講：『我kā我ê chabó͘ kiáⁿ hō͘ chitê人做bó͘，伊怨恨她，
22:17 你看，伊譭謗她ê pháiⁿ事，講：『我看你ê chabó͘ kiáⁿ無在室女ê憑據，其實chitê是我ê chabó͘ kiáⁿ在室女ê憑據。』父母to̍h kā hitê布排tī本城長老ê面前。
22:18 Hitê城ê長老tio̍h掠hitê人來kā伊責罰，
22:19 mā tio̍h kā伊罰一百銀hō͘ chabó͘ kiáⁿ ê老父，因為伊有誣賴以色列在室女ê pháiⁿ名聲。Cha-bó͘ kiáⁿ猶原做伊ê bó͘，一世人m̄ thang kā她離掉。
22:20 「總是，chitê tāichì若是真ê，chabó͘ kiáⁿ無在室女ê憑據，
22:21 in tio̍h掠hitê chabó͘ kiáⁿ到她ê老父ê厝ê門口，她本城ê人tio̍h用石頭kā她tìm死，因為她tī以色列中行見笑ê tāichì，tī她ê老父ê家行姦淫。Án-neto̍h ē tàng tùi lín中間除去hitê pháiⁿ。
22:22 「若tú tio̍h有人kah有丈夫ê chabó͘人同房，姦夫kah hitê chabó͘人lóng tio̍h hō͘ in死。Án-neto̍h ē tàng tùi以色列ê中間除去hitê pháiⁿ。
22:23 「若有chabó͘ kiáⁿ是在室女ê，已經做人定tio̍h，有人tī城內tú tio̍h她，kah她同房，
22:24 lín tio̍h掠chit兩 个人出去到hitê城門，用石頭kā in tìm死。Cha-bó͘ kiáⁿ因為她tī城內iáu koh無hoah救人；chapo͘人因為伊凌辱伊ê厝邊ê bó͘。Án-neto̍h ē tàng tùi lín中間除去hitê pháiⁿ。
22:25 「總是，若有人tī田野tú tio̍h已經聘定tio̍h ê chabó͘ kiáⁿ，hitê人kā她強姦，kantaⁿ hitê kā她強姦ê人tio̍h死。
22:26 總是，hitê chabó͘ kiáⁿ你m̄ thang án怎kā她辦，因為hitê chabó͘ kiáⁿ無應該死ê tāichì，chitê tāichì是親像人去攻擊伊ê厝邊，kā伊thâi死相siâng。
22:27 因為伊tī田野tú tio̍h她，hitê做人定tio̍h ê chabó͘ gín-á有hoah救人，mā無人kā她救。
22:28 「若chapo͘人tú tio̍h iáu未做 ·人ê在室女，kā她掠來kah她私通，hō͘人看tio̍h，
22:29 hitê kah她私通ê人，tio̍h the̍h五十個銀hō͘ chabó͘ gín-á ê老父，因為伊已經kā她凌辱，to̍h tio̍h娶她做bó͘，一世人m̄ thang kā她離掉。
22:30 「人m̄ thang娶老父ê後bó͘做bó͘，m̄ thang掀開伊ê老父ê衫á裾。」
各聖經譯本著作權如版權說明。
本畫面由信望愛資訊中心之CBOL計畫產生，歡迎連結，無須申請。CBOL計畫之資料版權宣告採用GNU Free Documentation License。願上帝的話能建造每一位使用這系統的人，來榮耀祂自己的名。