民數記 線上收聽:中文和合本 現代中文譯本修訂版 現代台語 台語聖經 客語 福州話 希伯來文讀經 下載檔案 關於語音聖經
2:1 各支族tī營地ê位置
上主吩咐摩西kah亞倫講:
2:2 「以色列人tio̍h ta̍k个搭伊kakī ê布棚,tī kakī ê大旗下,tī本族ê旗號hia,圍圍ǹg會幕紮營。
2:3 Tī東pêng ǹg日出ê所在,照in ê軍隊紮營ê,是偤大營ê大旗,有亞米拿達ê kiáⁿ拿順做偤大人ê首領。
2:4 伊所經過點算ê軍隊,總共有七萬四千六百名。
2:5 Óa近伊紮營ê是以薩迦ê支族,有蘇押ê kiáⁿ拿坦業做以薩迦人ê首領。
2:6 伊所經過點算ê軍隊,總共有五萬四千四百名。
2:7 Koh有西布倫ê支族,希倫ê kiáⁿ以利押做西布倫人ê首領。
2:8 伊所經過點算ê軍隊,總共有五萬七千四百名。
2:9 屬偤大營,照伊所經過點算ê軍隊,總共有十八萬六千四百名,in tio̍h做頭前出發。
2:10 Tī南pêng,照in ê軍隊,是流便營ê大旗,有示丟珥ê kiáⁿ以利蓿做流便人ê首領。
2:11 伊所經過點算ê軍隊,總共有四萬六千五百名。
2:12 Óa近伊紮營ê是西緬ê支族,蘇利沙代ê kiáⁿ示路蔑做西緬人ê首領。
2:13 伊所經過點算ê軍隊,總共有五萬九千三百名。
2:14 Koh有迦得ê支族,丟珥ê kiáⁿ以利雅薩做迦得人ê首領。
2:15 伊所經過點算ê軍隊,總共有四萬五千六百五十名。
2:16 屬流便營,照伊所經過點算ê軍隊,總共有十五萬一千四百五十名,in tio̍h做第二隊出發。
2:17 然後會幕tio̍h出發,有利未人ê營tī chiahê營ê中間,in ánne紮營,tio̍h照ánne出發,各照伊ê大旗。
2:18 Tī西pêng,照in ê軍隊,是以法連營ê大旗,亞米忽 ê kiáⁿ以利沙瑪做以法連人ê首領。
2:19 伊所經過點算ê軍隊,總共有四萬khòng五百名。
2:20 Óa近伊ê是瑪拿西ê支族,比大蓿ê kiáⁿ迦瑪列做瑪拿西人ê首領。
2:21 伊所經過點算ê軍隊,總共有三萬二千兩百名。
2:22 Koh有便雅憫ê支族,基多尼ê kiáⁿ亞比但做便雅憫人ê首領。
2:23 伊所經過點算ê軍隊,總共有三萬五千四百名。
2:24 屬以法連營,照伊所經過點算ê軍隊,總共有十萬八千一百名,in tio̍h做第三隊出發。
2:25 Tī北pêng,照in ê軍隊是但ê營ê大旗,亞米沙代ê kiáⁿ亞希以謝做但ê人ê首領。
2:26 伊所經過點算ê軍隊,總共有六萬二千七百名。
2:27 Óa近伊紮營ê是亞設ê支族,俄蘭ê kiáⁿ帕結做亞設人ê首領。
2:28 伊所經過點算ê軍隊,總共有四萬一千五百名。
2:29 Koh有拿弗他利ê支族,以南ê kiáⁿ亞希拉做拿弗他利人ê首領。
2:30 伊所經過點算ê軍隊,總共有五萬三千四百名。
2:31 屬但ê營,所有經過點算ê,有十五萬七千六百名,tio̍h 歸in ê大旗,做路尾隊出發。
2:32 Chiahê是以色列人,照in ê宗族經過點算ê,照in ê軍隊,tī chiahê營中所有經過點算ê,有六十萬三千五百五十名。
2:33 總是,利未人無算tī以色列人ê內面,是照上主所命令摩西ê。
2:34 以色列人ánne行,ta̍k人照in ê家口,in ê宗族,歸in ê大旗,ánne紮營,ánne出發,lóng是照上主所命令摩西ê來行。
各聖經譯本著作權如版權說明。
本畫面由信望愛資訊中心之CBOL計畫產生,歡迎連結,無須申請。CBOL計畫之資料版權宣告採用GNU Free Documentation License。願上帝的話能建造每一位使用這系統的人,來榮耀祂自己的名。