創世記 線上收聽:中文和合本 現代中文譯本修訂版 現代台語 台語聖經 客語 福州話 希伯來文讀經 下載檔案 關於語音聖經
1:1 上帝ê創造
源起頭，上帝創造天kah地ê時，
1:2 地是空空渾沌，深淵ê頂面烏暗；上帝ê靈運行tī水面。
1:3 上帝講：「Tio̍h有光」，to̍h有光。
1:4 上帝看光是好，to̍h kā光kah暗分開。
1:5 上帝叫hitê光做日，叫暗做暝。有ê-hng，有早起，這是頭一日。
1:6 上帝講：「Chiahê水ê中間tio̍h有穹蒼kā水kah水分開。」
1:7 上帝就造穹蒼，來分開穹蒼下ê水kah穹蒼頂ê水，就照ánne完成。
1:8 上帝叫穹蒼做天。有ê-hng，有早起，是第二日。
1:9 上帝講：「天下chiahê水tio̍h聚集到一个所在，乾地tio̍h出現。」就照ánne完成。
1:10 上帝叫乾地做地，叫聚集ê水做海；上帝看ánne是好。
1:11 上帝講：「地tio̍h發草kah結籽ê菜蔬，以及照類生果子ê樹，hit內面有它ê籽。」就照ánne完成。
1:12 地就發草kah照類結籽ê菜蔬，以及照類生果子ê樹，內面有它ê籽。上帝看ánne是好。
1:13 有ê-hng，有早起，是第三日。
1:14 上帝講：「天頂ê穹蒼tio̍h有發光ê體，來分別暝日，mā thang做兆頭、四季、日、年，
1:15 mā hō͘ in做光體tī天ê穹蒼，照光tī地chiūⁿ。」就照ánne完成。
1:16 上帝就造大ê光體兩 个，大ê光體來管日時，細ê光體來管暗時，mā造星辰。
1:17 上帝kā in hē tī天頂ê穹蒼，hō͘ in tī地裡照光，
1:18 管理日kah暝，分別光kah暗；上帝看ánne是好。
1:19 有ê-hng，有早起，是第四日。
1:20 上帝講：「水tio̍h生湠真chē有活命ê動物，鳥飛tī地ê頂面kah天頂ê穹蒼。」
1:21 上帝就創造海裡ê大魚，以及水所生真chē有活命ê動物，各照牠ê類；koh創造ta̍k種ê飛鳥，各照牠ê類。上帝看ánne是好。
1:22 上帝kā in賜福，講：「Tio̍h生湠加添真chē，充滿tī海裡ê水，mā hō͘鳥隻tī地裡生湠真chē。」
1:23 有ê-hng，有早起，是第五日。
1:24 上帝講：「地tio̍h生有活命ê動物，照牠ê類，chengseⁿ、蟲thōa、地chiūⁿê走獸，照牠ê類。」就照ánne完成。
1:25 上帝就造地chiūⁿê走獸照牠ê類，chengseⁿ照牠ê類，地chiūⁿ一切ê蟲thōa mā照牠ê類。上帝看ánne是好。
1:26 上帝講：「咱tio̍h造人親像咱ê像，照咱ê款，hō͘ in管理海裡ê魚、天頂ê鳥、chengseⁿ，以及全地kah地chiūⁿteh 趖（sô）ê蟲thōa。」
1:27 上帝就創造人親像祂kakī ê像，照上帝kakī ê像創造人類，創造in男ê女ê。
1:28 上帝kā in賜福，koh對in講：「Tio̍h生湠真chē，充滿tī地chiūⁿ，來贏過一切，mā tio̍h治理海裡ê魚、天頂ê鳥kah地chiūⁿ一切會振動ê活物。」
1:29 上帝講：「我有hō͘ lín全地chiūⁿ一切結籽ê菜蔬，koh有一切ê樹，其中有結籽ê樹ê果子，lóng beh hō͘ lín做食物。
1:30 若是地chiūⁿ一切ê走獸kah空中一切ê鳥，以及地chiūⁿ一切會振動有活命ê物，我kā一切ê青草hō͘ in做食物。」就照ánne完成。
1:31 上帝看祂一切所造e5to̍h講：「你看，真好。」有ê-hng，有早起，是第六日。
各聖經譯本著作權如版權說明。
本畫面由信望愛資訊中心之CBOL計畫產生，歡迎連結，無須申請。CBOL計畫之資料版權宣告採用GNU Free Documentation License。願上帝的話能建造每一位使用這系統的人，來榮耀祂自己的名。