馬太福音 四福音合參 線上收聽:中文和合本 現代中文譯本修訂版 現代台語 台語聖經 台語(長老會傳播中心授權） 客語 現代客語 粵語和合本 希臘文(WH-NT) 下載檔案 關於語音聖經
7:1 批評人
(路6：37-38,41-42)
「M̄-thang批評人，chiah免受人批評。
7:2 因為lín用啥物標準來批評人，mā ē ánne受批評。Lín用啥物量器來量hō͘人，人mā ē ánne量hō͘ lín。
7:3 你無注意tio̍h kakī 目chiu 內ê柴箍，ná ē kantaⁿ看tio̍h兄弟目chiu 內ê草á幼？
7:4 你kakī 目chiu 內有柴箍，ná ē tàng kā你ê兄弟講：『你目chiu 內ê草á幼，我kā你the̍h出來？』
7:5 假好ê人，先kā你kakī 目chiu 內ê柴箍the̍h出來，chiah ē tàng看清楚，thang kā你兄弟目chiu 內ê草á幼the̍h出來。
7:6 M̄-thang用神聖ê物hiat hō͘狗食，恐驚狗會oa̍t過來咬lín；mā m̄ thang用lín ê珍珠hiat tī豬ê面前，豬ē用腳來thún踏。」
7:7 Tio̍h求，Tio̍h Chhōe，Tio̍h Phah門
(路11：9-13)
「Tio̍h求，lín to̍h ē得tio̍h；tio̍h chhōe，lín to̍h ēchhōe ·tio̍h；tio̍h phah門，就ē kā lín開門。
7:8 因為人若求to̍h ē得tio̍h；若chhōe to̍h ēchhōe ·tio̍h；若phah門就ē kā伊開門。
7:9 Lín做老父ê人，你ê kiáⁿ kā你討餅，lín kám ēthe̍h石頭hō͘伊？
7:10 Á是kā你討魚，lín kám ē掠蛇hō͘伊？
7:11 Lín雖然是pháiⁿ，iáu koh ē曉用好物hō͘ lín ê kiáⁿ兒，何況lín ê天父，祂kám bē用好物hō͘對祂祈求ê人？
7:12 所以，lín ài人án怎kā lín款待，lín mā tio̍h ánne款待人，因為這是律法kah先知ê教示。」
7:13 狹ê門
(路13：24)
「Lín tio̍h tùi hitê狹門入去，因為透到滅亡ê門真闊，hit條路真好行，tùi hia入去ê人真chē。
7:14 透到永生ê門真狹，hit條路真pháiⁿ行，chhōe tio̍h ê人真少。」
7:15 Tùi果子來認bat樹
(路6：43-44)
「Tio̍h提防假先知，in來lín chia ê時，外表假kahná綿羊，內心卻是兇惡ê豺狼。
7:16 Lín ē tàng tùi in ê果子來認bat in。Kám ē tàng tùi刺phè挽葡萄？Kám ē tàng tùi蒺藜挽無花果？
7:17 Án-ne，好樹會結好果子，pháiⁿ樹會結pháiⁿ果子；
7:18 好樹bē結pháiⁿ果子，pháiⁿ樹mā bē結好果子。
7:19 Bē結好果子ê樹，to̍h kā它剉起來，hiat落去火裡燒。
7:20 所以，lín ē tàng tùi in所結ê果子來認bat in。」
7:21 入天國之門ê要件
(路13：25-27)
「M̄是稱呼我『主ah，主ah』ê人lóng ē tàng入去天國；kantaⁿ實現我ê天父旨意ê人，chiah ē tàng入去。
7:22 Hit日到ê時，真chē人ē kā我講：『主ah，主ah，阮kám m̄是有奉祢ê名傳信息，koh奉祢ê名趕鬼，mā有奉祢ê名行真chē神跡？』
7:23 Hit時，我ē明白kā in講：『我lóng m̄ bat lín。Lín chiahê做pháiⁿ ê人，tio̍h離開我。』」
7:24 兩款地基
(路6：47-49)
「所以，聽我ê話有去實現ê人，ná親像一个聰明ê人kā伊ê厝起tòa石磐頂；
7:25 tú tio̍h大雨潑，大水來，大風掃，沖tio̍h hit間厝，厝mā bē倒，因為有堅固ê地基tī石磐頂。
7:26 聽我chiahê話無去實現ê人，ná親像一个戇人kā厝起tòa沙á頂；
7:27 tú tio̍h大雨潑，大水來，大風掃，沖tio̍h hit間厝，厝to̍h倒kah真嚴重。」
7:28 群眾ê回應
耶穌講chiahê話了後，群眾hō͘祂ê教示驚tio̍h，
7:29 因為祂教示人真有權威，kah in ê經學教師無仝款。
各聖經譯本著作權如版權說明。
本畫面由信望愛資訊中心之CBOL計畫產生，歡迎連結，無須申請。CBOL計畫之資料版權宣告採用GNU Free Documentation License。願上帝的話能建造每一位使用這系統的人，來榮耀祂自己的名。