馬太福音 四福音合參 線上收聽:中文和合本 現代中文譯本修訂版 現代台語 台語聖經 台語(長老會傳播中心授權) 客語 現代客語 粵語和合本 希臘文(WH-NT) 下載檔案 關於語音聖經
6:1 關係做善事ê教示
「Lín tio̍h謹慎,m̄ thang為tio̍h beh hō͘人看,thiau故意tī人ê面前做好事。若ánne做,lín bē tàng得tio̍h天父ê報賞。
6:2 所以,你賑濟ê時,m̄ thang親像假好ê人tī會堂á是街路pûn鼓吹宣傳,ài hō͘人kā伊oló。我實在kā lín講,in已經得tio̍h in ê報賞à。
6:3 你賑濟ê時,正手所做ê tāichì m̄ thang hō͘你ê 倒手知影。
6:4 你若恬恬á賑濟人,tī暗中teh鑒察人ê天父ē kā你報賞。」
6:5 關係祈禱ê教示
(路11:2-4)
「Lín祈禱ê時,m̄ thang親像假好ê人,為tio̍h ài beh hō͘人看tio̍h,thiau故意khiā tī會堂á是大街路口祈禱。我實在kā lín講,in已經得tio̍h in ê報賞à。
6:6 你祈禱ê時,tio̍h入去你ê房間內,門關起來,對你ê天父祈求,tī暗中teh看ê天父ē kā你報賞。
6:7 Lín祈禱ê時,m̄ thang親像外邦人講了koh再講。因為in想講,tio̍h講khah chē話,上帝chiah ē聽tio̍h。
6:8 Lín m̄ thang kah in仝款,因為lín iáu未求chìn前,天父已經知影lín ê需要。
6:9 所以,lín tio̍h ánne祈禱:阮tī天裡ê父,願祢ê名聖。
6:10 祢ê國臨到。祢ê旨意得成,tī地裡親像tī天裡。
6:11 求祢賞賜阮今á日所需要ê食物。
6:12 求祢赦免阮ê辜負,親像阮mā有赦免辜負阮ê人。
6:13 求祢m̄ thang hō͘阮陷落tī擔當bē起ê試探。求祢救阮脫離hitê pháiⁿ ê。(註:有ê抄本加添下面chit句話:「因為國、權能、榮光lóng是祢所有,代代無盡。阿們!」)
6:14 因為lín若赦免人ê過失,天父mā ē赦免lín。
6:15 Lín若無赦免人ê過失,天父mā無beh赦免lín ê過失。」
6:16 關係禁食ê教示
「Lín禁食ê時,m̄ thang親像假好ê人面帶憂愁;因為in刁工kā面變pháiⁿ看,beh hō͘人看出 in teh禁食。我實在kā lín講,in已經得tio̍h in ê報賞à。
6:17 獨獨你禁食ê時,頭毛tio̍h抹油,面mā tio̍h洗清氣,
6:18 無beh hō͘人看出你teh禁食,kantaⁿ hō͘天父看tio̍h;ánne恬恬á teh觀察ê天父就ē kā你報賞。」
6:19 世間kah天頂ê財寶
(路12:33-34)
「M̄-thang為tio̍h kakī 積聚財寶tī地chiūⁿ;因為tī hia有蟲咬,會生sian pháiⁿ去,mā有賊á會挖孔來偷the̍h。
6:20 Tio̍h為kakī 積聚財寶tī天頂;tī hia無蟲咬,bē生sian phah-pháiⁿ,mā無賊á挖孔來偷the̍h。
6:21 因為lín ê財寶tī tó位,lín ê心to̍h ētī hia。」
6:22 身軀ê燈
(路11:34-36)
「目chiu 親像人身軀ê燈。你ê目chiu 若金,全身軀就光。
6:23 你ê目chiu 若花,全身軀就暗。你內面ê光若暗,hitê烏暗是gōani̍h'á厲害!」
6:24 上帝kah錢財
(路16:13)
「無人ē tàng服事兩 个主人,因為伊ē怨恨chitê,疼hitê;á是會尊重chitê,看輕hitê。Lín bē tàng服事上帝同時koh服事錢財。
6:25 操煩生活用品
(路12:22-34)
「所以,我kā lín講,m̄ thang操煩lín ê性命beh食啥物,beh lim啥物,á是lín ê身軀beh穿啥物。Lín ê性命kám無比食物khah重要?Lín ê身軀kám無比衫á褲khah要緊?
6:26 Lín看空中ê飛鳥,in無種作,無收成,無積聚tī粟倉,lín ê天父mā teh kā in養飼。Lín kám無比hiahê鳥á khah貴重?
6:27 Lín kám有人想講操煩ē tàng hō͘性命khah長一時á久?
6:28 Lín ná tio̍h為衫á褲來操煩?Lín想看māi,山裡ê百合花án怎teh大欉?In無勞苦,mā無紡織。
6:29 M̄ koh,我kā lín講,連所羅門王siōng榮華富貴ê時,伊所穿ê衫都無比chiahê任何一蕊花khah súi。
6:30 山裡ê花草,今á日teh活,明á載to̍h hō͘人hiat落去火爐,上帝都ánne teh kā它打扮,你想,祂kám bē koh khah kā lín打扮?Lín ná ē hiahni̍h無信心?
6:31 所以,lín m̄ thang操煩講:『阮beh食啥物?Beh lim啥物?Beh穿啥物?』
6:32 因為chiahê lóng是外邦人所追求ê物件,lín ê天父mā知影chiahê lóng是lín所需要ê。
6:33 Tio̍h先追求上帝國度kah照祂ê旨意來行,chiahê物to̍h lóng ē順續賞賜hō͘ lín。
6:34 所以,m̄ thang為tio̍h明á載來操煩。明á載ê tāichì明á載chiah來操煩;一日ê艱苦一日當。」
各聖經譯本著作權如版權說明。
本畫面由信望愛資訊中心之CBOL計畫產生,歡迎連結,無須申請。CBOL計畫之資料版權宣告採用GNU Free Documentation License。願上帝的話能建造每一位使用這系統的人,來榮耀祂自己的名。