出埃及記 線上收聽:中文和合本 現代中文譯本修訂版 現代台語 台語聖經 客語 福州話 希伯來文讀經 下載檔案 關於語音聖經
26:1 上主ê聖幕
(出36：8-38)
「你做會幕tio̍h用十幅ê帳，chiahê帳是用過紡ê幼苧kah藍色、紫色、朱紅色ê料，mā用奇巧ê工織成ê ki-lō͘-peng來做ê。
26:2 每幅帳tio̍h長二十八肘，闊四肘，帳lóng tio̍h相siâng ê寸尺。
26:3 Chit五幅帳tio̍h ta̍k幅相連，hit五幅帳mā tio̍h ta̍k幅相連。
26:4 Tī chitê相連ê帳路尾幅ê邊á，tio̍h做藍色ê鈕襻；tī hitê相連ê帳路尾幅ê邊á mā tio̍h ánne做。
26:5 你tī chit領帳做五十個鈕襻，koh tī第二領帳相連ê邊á，mā做五十個鈕襻；鈕襻lóng tio̍h兩 个兩 个相對。
26:6 Koh tio̍h做五十個金鉤來鉤，hō͘帳相連，to̍h成做一个會幕。
26:7 「你tio̍h用山羊毛織十一幅ê帳，做會幕頂ê布棚。
26:8 每幅帳tio̍h長三十肘，闊四肘；十一幅帳lóng tio̍h相siâng ê寸尺。
26:9 Tio̍h kā五幅帳連做一幅，koh kā六幅帳連做一幅，hitê第六幅ê一半，hō͘它tī布棚ê頭前垂落來。
26:10 Tī chitê相連ê帳路尾幅ê邊á，tio̍h做五十個鈕襻；tī hitê相連路尾幅ê邊á，mā做五十個鈕襻。
26:11 Koh tio̍h做五十個銅鉤，鉤tī鈕襻，hō͘布棚連做一个。
26:12 布棚ê帳所chhun垂落來，to̍h是所chhun hitê半幅帳，tio̍h垂tī會幕ê後壁。
26:13 布棚ê帳所chhun落來ê長，chit pêng一肘，hit-pêng一肘，tio̍h垂tī會幕ê雙pêng來kā它遮teh。
26:14 「Koh tio̍h用染紅ê羊káng皮，做布棚ê蓋，koh用海狗皮tī頂面做蓋。
26:15 「你tio̍h用皂莢柴做會幕柱ê板。
26:16 柱ê板長十肘，闊一肘半。
26:17 Ta̍k塊板tio̍h有兩 个榫（sún）相對排，會幕所有ê板lóng tio̍h照ánne做。
26:18 Tio̍h tī南pêng做會幕ê板二十塊。
26:19 Tī chiahê二十塊板ê下面，tio̍h做四十個銀臼，一塊板ê下面有兩 个臼來穿它ê兩支榫，koh一塊板ê下面mā有兩 个臼來穿它ê兩支榫。
26:20 會幕ê第二面，to̍h是北面，mā tio̍h做板二十塊，kah in ê銀臼四十個。
26:21 Chitê板ê下面有兩 个臼，hitê板ê下面mā有兩 个臼。
26:22 會幕ê後面，to̍h是西面，tio̍h做六塊板。
26:23 會幕後面ê兩 个角頭，tio̍h做兩塊板。
26:24 兩 个板ê下節長度相仝，一直到頂面第一个環，lóng是仝款ê做法；兩塊lóng是ánne，beh做角頭ê路用。
26:25 Tio̍h有八個板kah十六ê銀臼，chitê板ê下面有兩 个臼，hitê板ê下面mā有兩 个臼。
26:26 「你tio̍h用皂莢柴做橫栱，為tio̍h會幕chit pêng ê板做五支，
26:27 為tio̍h會幕hit-pêng ê板做五支，koh為會幕後ê西面做五支。
26:28 板ê對中hit支橫栱，tio̍h tùi chit頭透到hit頭。
26:29 板tio̍h用金來包，koh tio̍h做板ê金環來套栱，栱mā tio̍h用金來包。
26:30 Tio̍h照我tī山頂kā你指示ê款式來起會幕。
26:31 「你tio̍h用藍色、紫色、朱紅色ê料，kah過紡ê幼苧來織帳簾，chitê帳簾用奇巧ê工織成ki-lō͘-peng來做ê。
26:32 你tio̍h用皂莢柴做四支柱，用金來包，來吊帳簾，柱ê鉤tio̍h金ê，柱tī四個銀臼頂。
26:33 你吊帳簾tio̍h tī鉤ê下底ê所在，kā法櫃扛入去帳簾內；chitê帳簾是kā lín隔開聖所kah至聖所。
26:34 Koh tio̍h kā施恩所安置tī至聖所內ê法櫃頂面。
26:35 你tio̍h kā桌hē tī帳簾外，mā用燈台hē tī會幕ê南pêng，kah桌相對，hitê桌tio̍h hē tī北pêng。
26:36 「你tio̍h用藍色、紫色、朱紅色ê料kah過紡ê幼苧，用繡花ê工夫做布棚門ê門簾。
26:37 Tio̍h用皂莢柴kā門簾做五支柱，用金來包，柱ê鉤tio̍h金ê，koh tio̍h kā柱鑄五個銅臼。」
各聖經譯本著作權如版權說明。
本畫面由信望愛資訊中心之CBOL計畫產生，歡迎連結，無須申請。CBOL計畫之資料版權宣告採用GNU Free Documentation License。願上帝的話能建造每一位使用這系統的人，來榮耀祂自己的名。