以西結書 線上收聽:中文和合本 現代中文譯本修訂版 現代台語 台語聖經 客語 福州話 希伯來文讀經 下載檔案 關於語音聖經
36:1 Siōng-chú Sù-hok I-su-la-el
" Jîn-chú, lí tio̍h tùi I-su-la-el chiahê soaⁿ lâi soan-pò͘, kóng: I-su-la-el chiahê soaⁿ, tio̍h thiaⁿ Siōng-chú ê ōe.
36:2 Chì-koân Siōng-chú ánne kóng: In-ūi tùi-te̍k kong-kek lí kóng, ' Ha-hah! Kó͘-chá koân ê só͘-chāi lóng hō͘ goán chò sán-gia̍p à! '
36:3 " Só͘-í, lí tio̍h soan-pò͘ kóng, chì-koân Siōng-chú ánne kóng: In-ūi in hō͘ lí pha-hng, tī sì-kho͘-ûi kā lí thun-kā, beh hō͘ lí kui tī só͘ chhun lo̍h-.lâi ê gōa-pang lâng chò sán-gia̍p, mā hō͘ kāu-ōe ê lâng kā lí gī-lūn, hō͘ chèng lâng kā lí húi-pòng.
36:4 Só͘-í, I-su-la-el chiahê soaⁿ, lí tio̍h thiaⁿ chì-koân Siōng-chú ê ōe. Chì-koân Siōng-chú tùi chiahê soaⁿ, chiahê niá, chiahê kheⁿ-kau, chiahê soaⁿ-kok, chiahê pha-hng ê só͘-chāi, siū khì-sak ê siâⁿ, hō͘ sì-kho͘-ûi só͘ chhun lo̍h-.lâi ê gōa-pang lâng chhiúⁿ-kiap khau-sé ê, ánne kóng.
36:5 " Só͘-í, chì-koân Siōng-chú ánne kóng: Góa si̍t-chāi tī jia̍t-jia̍t ê oàn-tò͘, ēng ōe chek-pī lia̍t pang só͘ chhun lo̍h-.lâi ê í-ki̍p E-tóm ê choân tē. In-ūi in hun-phài Góa ê tē chò i kakī ê sán-gia̍p, móa-sim hoaⁿ-hí, sîn-hûn biáu-sī, ài kóaⁿ-tio̍k i ê jîn-bîn, lâi kā i chhiúⁿ-kiap.
36:6 " Só͘-í, lí tio̍h lūn I-su-la-el tē lâi soan-pò͘, tùi chiahê soaⁿ, chiahê niá, chiahê kheⁿ-kau, chiahê soaⁿ-kok kóng, chì-koân Siōng-chú ánne kóng: Lí khòaⁿ, Góa tī Góa ê oàn-tò͘ kah Góa ê tōa siū-khì lâi kóng, in-ūi lí í-keng siū ī-pang lâng ê lêng-jio̍k;
36:7 só͘-í, chì-koân Siōng-chú ánne kóng: Góa kí-khí Góa ê chhiú, kóng: Tī lín sì-kho͘-ûi ê ī-pang lâng si̍t-chāi ē siū lêng-jio̍k.
36:8 " Chóng-.sī, lín I-su-la-el chiahê soaⁿ, lín it-tēng ē hoat-chhut lín ê ki-oe, koh ē kiat kóe-chí hō͘ Góa ê chú-bîn — I-su-la-el, in-ūi in teh beh tńg-kàu kò͘-hiong à.
36:9 Lí khòaⁿ, Góa sī ūi lín ê, Góa beh oa̍t tńg-lâi ǹg lín, lín chiū ē hō͘ lâng chèng-choh.
36:10 Góa koh beh ke-thiⁿ lâng tī lín ê téng-bīn, to̍h-sī I-su-la-el ê ke-ke hō͘-hō͘ it-chhè lóng ánne; chiahê siâⁿ chiū ē ū lâng tòa, pha-hng ê só͘-chāi ē tit tio̍h khí-chō.
36:11 Góa mā beh ke-thiⁿ lâng kah chengseⁿ tī lín ê téng-bīn; in ē seⁿ-thòaⁿ chin chē. Góa beh hō͘ lín chiàu kū ū lâng tòa, koh beh kā lín hó khoán-thāi, iâⁿ-kòe khí-thâu ê sî; lín chiū ē chai Góa sī Siōng-chú.
36:12 Góa beh hō͘ lâng kiâⁿ tī lín ê téng-bīn, to̍h-sī Góa ê chú-bîn — I-su-la-el. In ē tit tio̍h lí, lí ē chò in ê sán-gia̍p; lí mā bô koh hō͘ in choa̍t-sû.
36:13 " Chì-koân Siōng-chú ánne kóng: In-ūi lâng tùi lín kóng, ' Lí sī thun-chia̍h lâng ê, koh hō͘ jîn-bîn choa̍t-sû',
36:14 só͘-í, chì-koân Siōng-chú ánne kóng: Lí bô beh koh thun-chia̍h lâng, mā bô beh koh hō͘ lí ê jîn-bîn choa̍t-sû.
36:15 Góa bô beh hō͘ lí koh thiaⁿ tio̍h gōa-pang lâng ê lêng-jio̍k, lí mā bô koh siū bān-bîn ê húi-pòng, lí mā bô koh hō͘ lí ê jîn-bîn kha that tio̍h. Che sī chì-koân Siōng-chú kóng ê. "
36:16 I-su-la-el ê Sin Seng-oa̍h
Siōng-chú ê ōe koh lîm-kàu góa, kóng,
36:17 " Jîn-chú, I-su-la-el ê chú-bîn tòa tī pún só͘-chāi ê sî, ēng in ê só͘ kiâⁿ, só͘ chò kā i òe lahsap. In ê só͘ kiâⁿ, tī Góa ê bīn-chêng sī chhin-chhiūⁿ chabó͘ lâng keng-kî kàu ê lahsap.
36:18 In-ūi in tī hit-ê só͘-chāi lâu lâng ê hoeh, koh in-ūi in ēng ngó͘-siōng kā i òe lahsap, só͘-í, Góa piàⁿ-chhut Góa ê siū-khì tī i ê téng-bīn.
36:19 Góa kā in hun-sòaⁿ khì tī lia̍t kok, in chiū sì-sòaⁿ tī lia̍t pang tiong; Góa chiū chiàu in ê só͘ kiâⁿ kah in ê só͘ chò, lâi kā in sím-phòaⁿ.
36:20 In khì-kàu in só͘ kàu ê gōa-pang lâng hia, siat-to̍k Góa ê sèng-miâ; in-ūi lâng kí in lâi kóng, che sī Siōng-chú ê chú-bîn, tùi I ê tē chhut-.lâi ê.
36:21 Chóng-.sī, Góa pó-sioh Góa ê sèng-miâ, to̍h-sī I-su-la-el ê chú-bîn tī in só͘ khì-kàu ê lia̍t kok tiong só͘ siat-to̍k ê.
36:22 " Só͘-í, lí tio̍h tùi I-su-la-el ê chú-bîn kóng, chì-koân Siōng-chú ánne kóng: I-su-la-el ê chú-bîn, Góa kiâⁿ chit-ê m̄-sī ūi tio̍h lín ê iân-kò͘, to̍h-sī ūi tio̍h Góa ê sèng-miâ ê iân-kò͘, to̍h-sī lín tī kiâⁿ kàu ê lia̍t kok tiong só͘ siat-to̍k ê.
36:23 Góa ê tōa miâ tī ī-pang tiong siū siat-to̍k, to̍h-sī lín tī in tiong-kan só͘ siat-to̍k ê; Góa beh hō͘ Góa ê tōa miâ chò sèng; Góa koh beh tùi lín hián-bêng Góa kakī chò sèng tī in ê ba̍k-chiu chêng, ī-pang lâng chiū ē chai Góa sī Siōng-chú. Che sī chì-koân Siōng-chú só͘ kóng ê.
36:24 Góa beh chhōa lín lī-khui lia̍t pang, tùi lia̍t kok tiong kā lín chū-chi̍p, chhōa lín ji̍p-khì lín ê pún só͘-chāi.
36:25 Góa mā beh ēng chheng ê chúi hiù lín, lín chiū sé chheng-khì; Góa beh kā lín sé-chheng, tû-khì lín it-chhè ê lahsap kah lín só͘-ū ê ngó͘-siōng.
36:26 Góa beh ēng sin ê sim siúⁿ-sù hō͘ lín, mā beh ēng sin ê sîn-lêng hē tī lín ê lāi-bīn, koh beh tùi lín ê jio̍k-thé tiong tû-khì chhin-chhiūⁿ chio̍h-thâu ê sim, siúⁿ-sù hō͘ lín chhin-chhiūⁿ bah ê sim.
36:27 Góa beh kā Góa ê sîn-lêng hē tī lín ê lāi-bīn, hō͘ lín sūn-ho̍k Góa ê lu̍t-lē, siú Góa ê hoat-tō͘ lâi kiâⁿ.
36:28 Lín ē tòa tī Góa só͘ siúⁿ-sù hō͘ lín chó͘-sian ê tē. Lín ē chò Góa ê chú-bîn, Góa beh chò lín ê Siōng-tè.
36:29 Góa beh kiù lín thoat-lī lín it-chhè ê ù-òe, mā beh kiò ngó͘-kok hō͘ i hong-sēng, bô hō͘ lín tú tio̍h ki-hng.
36:30 Góa beh ke-thiⁿ chhiū-ba̍k ê kóe-chí, í-ki̍p chhân-hn̂g ê lông-sán-bu̍t, hō͘ lín bô koh in-ūi ki-hng siū gōa-pang lâng ê lêng-jio̍k.
36:31 Hit sî, lín ē kì-tit lín ê pháiⁿ só͘ kiâⁿ kah lín m̄-hó ê só͘ chò, in-ūi lín ê chōe-kò kah khó-ò͘ⁿ ê tāichì, lín chiū tī kakī ê bīn-chêng lâi thó-ià kakī.
36:32 Chì-koân Siōng-chú kóng: Lín tio̍h chai, Góa ánne kiâⁿ m̄-sī ūi tio̍h lín ê iân-kò͘. I-su-la-el ê chú-bîn, lín tio̍h ūi kakī ê só͘ kiâⁿ lâi làu-khùi, kiàn-siàu.
36:33 " Chì-koân Siōng-chú ánne kóng: Góa kā lín sé chheng-khì, tû-khì lín it-chhè chōe-kò ê ji̍t, beh hō͘ lín ê siâⁿ ū lâng tòa, pha-hng ê só͘-chāi koh tit tio̍h khí-chō.
36:34 Chá-chêng kòe lō͘ ê lâng khòaⁿ-chò hong-hùi ê tē, taⁿ chit-ê hong-hùi ê tē koh ū lâng chèng-choh.
36:35 Lâng ē kóng, ' Chá chêng chò hong-hùi ê tē, taⁿ chhin-chhiūⁿ E-tiân ê hn̂g; chit-ê hong-hùi, hi-bî, húi-hoāi ê siâⁿ, taⁿ khí kah chin kian-kò͘, ū lâng tòa. '
36:36 Hit sî, tī lín sì-kho͘-ûi só͘ chhun lo̍h-.lâi ê gōa-pang lâng, ē chai Góa — Siōng-chú khí-chō hiahê tó-hoāi ê só͘-chāi, chai-pôe hong-hùi ê tē. Góa — Siōng-chú ū ánne kóng, it-tēng ē kā i chiâⁿ.
36:37 " Chì-koân Siōng-chú ánne kóng: Góa beh hō͘ I-su-la-el ê chú-bîn ūi tio̍h chit-ê tāichì lâi kiû Góa, tì-sú Góa kā in chiâⁿ. Góa beh ke-thiⁿ in ê lâng-gia̍h, chhin-chhiūⁿ iûⁿ-kûn.
36:38 Chhin-chhiūⁿ hiàn chè ê iûⁿ-kûn, to̍h-sī chhin-chhiūⁿ Ê-lú-sa-lèm siú cheh ê sî ê iûⁿ-kûn; ánne, chiahê pha-hng ê siâⁿ, it-tēng ū kui tīn lâng móa-móa. In chiū ē chai Góa sī Siōng-chú. "
各聖經譯本著作權如版權說明。
本畫面由信望愛資訊中心之CBOL計畫產生，歡迎連結，無須申請。CBOL計畫之資料版權宣告採用GNU Free Documentation License。願上帝的話能建造每一位使用這系統的人，來榮耀祂自己的名。