( Ta-bi̍t ê si, kau hō͘ ga̍k-koaⁿ. )Góa só͘ oló ê Siōng-tè ah, kiû Lí m̄ thang tiām-tiām, 109:2 In-ūi pháiⁿ lâng ê chhùi kah kan-chà ê chhùi í-keng thí-khui lâi kong-kek góa; in ēng pe̍h-chha̍t ê chi̍h tùi góa kóng ōe. 109:3 In ēng oàn-hūn ê ōe pau-ûi góa, koh bô-iân bô-kò͘ lâi kong-kek góa. 109:4 Góa thiàⁿ in, in tian-tò chò góa ê tùi-te̍k, m̄ koh, góa iáu koh choan-sim ūi in kî-tó. 109:5 In tùi góa ēng pháiⁿ pò hó, ēng oàn-hūn pò thiàⁿ-sim. 109:6 Goān Lí phài chi̍t-ê pháiⁿ lâng kā i koán-hat, phài chi̍t-ê tùi-te̍k khiā tī i ê chiàⁿ pêng! 109:7 I siū sím-phòaⁿ ê sî, goān i chhut-lâi siū tēng chōe! Goān i ê kî-tó piàn-sêng chōe-kò! 109:8 Goān i it-seng ê ji̍t-chí sok-té! Goān pa̍t lâng lâi tāi-thè i ê chit ūi! 109:9 Goān i ê kiáⁿ-jî piàn-chò ko͘-jî, i ê bó͘ piàn-sêng kóaⁿ-hū! 109:10 Goān i ê kiáⁿ-jî sì-kè khì kiû 乞, tùi in pha-hng ê só͘-chāi chhut-lâi thó-chia̍h! 109:11 Goān chè-chú ēng kè-tì kā i cheng-ho̍k it-chhè só͘-ū ê! Goān chheⁿ-hūn lâng chhiúⁿ i thoa-bôa só͘ tit tio̍h ê châi-sán! 109:12 Goān bô lâng sòa-chiap si un hō͘ i! Goān bô lâng khó-liân i ê ko͘-jî! 109:13 Goān i ê kiáⁿ-sun toān-choa̍t, in ê miâ-jī siū chhat-siau, bô thoân tī ē-tāi! 109:14 Goān in chó͘-sian ê chōe-ok hō͘ Siōng-chú ē kì-tit! Goān i ê lāu-bú ê chōe-kò bô tit tio̍h chhat-siau! 109:15 Goān hiahê chōe-ok tiāⁿtiāⁿ tī Siōng-chú ê bīn-chêng, tì-sú I kā in ê miâ tùi sè-kan siau-bia̍t! 109:16 In-ūi i bô siūⁿ beh si liân-bín, hoán-tńg pek-hāi sànchhiah khùn-khó͘ ê lâng, beh hāi-sí hiahê siong-sim ê lâng. 109:17 I ài chiù-chó͘, goān chiù-chó͘ lîm-kàu i; I bô ài chiok-hok, goān chiok-hok lī-khui i hn̄g-hn̄g! 109:18 I ēng chiù-chó͘ chò saⁿ lâi chhēng; chiù-chó͘ chiū chhin-chhiūⁿ chúi ji̍p-khì i ê pak-tó͘ lāi, chhin-chhiūⁿ iû ji̍p-khì i ê kut-thâu. 109:19 Goān chit-ê chiù-chó͘ chò i chhēng tī seng-khu ê saⁿ-khò͘, chò i tiāⁿtiāⁿ teh hâ ê io-tòa! 109:20 Che to̍h-sī góa ê tùi-te̍k kah ēng pháiⁿ ōe kong-kek góa sîn-hûn ê lâng, tùi Siōng-chú só͘ siū ê pò-èng. 109:21 Chì-koân Siōng-chú ah, kiû Lí in-ūi Lí ê miâ hó khoán-thāi; in-ūi Lí ê chû-ài chin hó, kiû Lí kā góa khan-kiù! 109:22 In-ūi góa sànchhiah khùn-khó͘, góa ê lāi-sim siū-siong. 109:23 Góa ê hòe-siū chhin-chhiūⁿ ji̍t-iáⁿ chiām-chiām chhiâ; góa chhin-chhiūⁿ chháu-meh hông kóaⁿ chhut-.khì. 109:24 Góa in-ūi kìm-chia̍h kha-thâu-u sng-nńg; góa ê bah siau-sán bô chu-jūn. 109:25 Góa siū in ê húi-pòng, in khòaⁿ tio̍h góa chiū iô thâu. 109:26 Siōng-chú — góa ê Siōng-tè ah, kiû Lí pang-chān góa, chiàu Lí ê chû-ài chín-kiù góa, 109:27 Hō͘ in chai-iáⁿ che sī chhut tī Lí ê chhiú, sī Lí — Siōng-chú só͘ chò ê tāichì. 109:28 Chhut-chāi in chiù-chó͘, kiû Lí iû-goân kā góa sù-hok; in khí-lâi kong-kek ê sî ē tú tio̍h kiàn-siàu, m̄ koh Lí ê lô͘-po̍k ē hoaⁿ-hí. 109:29 Goān góa ê tùi-te̍k ēng lêng-jio̍k chò saⁿ-chhēng! Goān in ēng in ê kiàn-siàu chò phâu moa seng-khu! 109:30 Góa beh ēng góa ê chhùi tōa-tōa kám-siā Siōng-chú; góa beh tī kûn-chiòng ê tiong-kan oló I; 109:31 In-ūi I ē khiā tī sànchhiah lâng ê chiàⁿ pêng, Beh kiù i thoat-lī phòaⁿ i sí-chōe ê lâng.